भांगरभूंय | प्रतिनिधी
वॅस्ट इंडिजा आडचे टॅस्ट माळे खातीर भारताच्या पंगडांत देवदत्त पडिक्कलाचें पुनरागमन जालें. जाल्यार करुण नायराक भायर बसयला. दुखापतींतल्यान बरो जावपी ऋषभ पंताचे सुवातेर रवींद्र जडेजाक उप मुखेली केला. जाल्यार नारायण जगदीशन दुसरो विकेटकीपर म्हणून पंगडांतली आपली सुवात कायम राखल्या. इंग्लंड भोंवडे वयले निमाणे टॅस्टी खातीर तो पंगडांत सामील जाल्लो.
शुभमन गिल पयले खेपे घरच्या मैदानाचेर फुडारपण करतलो. इंग्लंडाचे भोंवडेर मुखेली म्हणून ताणें पदार्पण केल्लें. तशेंच जसप्रीत बुमरा लेगीत पंगडांत आसा. सध्या तो आशिया करंड सर्तींत खेळटा. लागीं लागीं इंग्लंडाचे भोंवडेर गेल्लो पंगड कायम दवरला. पूण, तिसरो ओपनर म्हणून अभिमन्यु ईश्वरनाची निवड करूंक ना. गरज पडली जाल्यार अतिरिक्त विकेटकीपर जगदीशन ही भुमिका वठोवपाक शकता.
भारताचो प्लेयींग इलेव्हन इंग्लंडा आडचे इलेव्हना परस मात्सो आसुये. ह्या वेळार फास्ट बॉलरां परस स्पिनरांचेर भर दिवपाक शकता. पंगडांत जडेजा वांगडा कुलदीप यादव, वॉशिंग्टन सुंदर तशेंच अक्षर पटेल पंगडांत आसा. टॅस्टींत अक्षराचें पुनरागमन जालां.
इंग्लंडाचे भोंवडेर गेल्ले फास्ट बॉलर अर्शदीप सिंग, आकाश दीप आनी अंशुल कंबोज हांकां सुवात मेळूंक ना. अंशुल आनी आकाश ईराणी कपांत हेर भारताच्या पंगडा वतीन खेळटले.
फास्ट बॉलर ऑलरावण्डराच्या रुपान पंगडांत फकत नितीश कुमार आसा. इंग्लंडाचे भोंवडेर लेगीत तो गेल्लो. पूण, दुखापतीक लागून भोंवडी अर्दकुटी सोडची पडिल्ली. शार्दुल ठाकूरान इंग्लंडांत निर्शेणी हाडपी प्रदर्शन केल्लें. ताका लागून ताका पंगडांत सुवात मेळची ना हें निश्चीत जाल्लें.
भारत आनी वॅस्ट इंडिज ह्या पंगडां मदली पयली टॅस्ट 2 ऑक्टोबराक अहमदाबादांत सुरू जातली, जाल्यार 10 ऑक्टोबरा सावन दुसरी टॅस्ट दिल्लीच्या जेटली स्टेडियमाचेर जातली.
पंगडः शुभमन गिल (मुखेली), यशस्वी जयस्वाल, लोकेश राहुल, साई सुदर्शन, देवदत्त पडिक्कल, ध्रुव जुरेल, रवींद्र जाडेजा (उप मुखेली), वॉशिंग्टन सुंदर, जसप्रीत बुमरा, अक्षर पटेल, नितीश रेड्डी, मोहम्मद सिराज, प्रसिद्ध कृष्णा, कुलदीप यादव आनी एन जगदीशन.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
