भांगरभूंय | प्रतिनिधी
सांखळे नेपकॅप वतीन राष्ट्रीय उपशामक काळजी अधिवेशन
दिवचल: गंभीर दुयेंस जाल्ल्या ज्येश्ठ दुयेतींची काळजी घेवप काळाची गरज जावन आसा. ह्या दुयेतींक जावपी दुखण्यान पुराय कुटुंबांतल्या लोकांकूय बरेंच दुख्ख, मनस्ताप जाता. गोंय सरकार समग्र उपचारां खातीर आयुर्वेद होमिओपॅथी आनी योगीक विज्ञाना सयत आधुचीक वखदांचें एकत्रीकरण करपाक बांदील आशिल्ल्यान गोंय सरकाराच्या उपशामक काळजी धोरणा खाला गोंयांत केंद्र चलोवपी नोंदणीकृत संस्थांक अडेज लाखांची अर्थीक मजत मेळतूच आसता. ज्येश्ठ, गंभीर दुयेंती आनी दुख जाणवपी दुयेतीं खातीर सहानुभूती हें उदरगतीचें खरें माप. तांची सुश्रुशा करपाक समाजांतल्या सगल्या डॉक्टर्स, नर्सेस हांच्या यत्नांक लागून ह्या ज्येश्ठ नागरिकांचें दुखणें उणें करप शक्य जाता, अशें मुख्यमंत्री डॉ. प्रमोद सावंत हांणी सांखळे सांगलें.
नॅपकॅम गोवा प्रभागा खातीर राष्ट्रीय पेलेटीव्ह केअर म्हळ्यार गंभीर दुयेंस आशिल्ल्या ज्येश्ठ दुयेतींची काळजी कशी घेवची ह्या विशयाचेर एका दिसाचे राष्ट्रीय परिशदेचें आयोजन सांखळेच्या साई नर्सिंग इन्स्टिट्यूटांत केल्लें. ताच्या उक्तावण कार्यावळीक मुख्यमंत्री उलयताले.
गोंयांत हे राष्ट्रीय परिशदेचे आयोजन केल्ले खातीर आयोजकांक परबीं भेटयलीं.
गोंयांत समुपदेशन करतात तशेंच खुबशे उपक्रम राबयतना सर्वसमावेशक पद्धतीचो वापर करून ज्येश्ठ आनी गंभीर दुयेंस जाल्ल्या दुयेतींचेर एकठांय येवन उपचार पद्धती आनी भावनीक नातें जोडून दिलासो दिवप शक्य आसा अशें मुख्यमंत्र्यान मुखार म्हणलें.
ह्या एका दिसाचे परिशदेंत गोंय आनी हेर राज्यांतले सुमार 400 प्रतिनिधी हाजीर आशिल्ले. राष्ट्रीय असोसिएशन ऑफ पेलेटीव्ह केअर फोर आयुष इंटिग्रेटिव्ह मेडिसिन गोवा, साई नर्सिंग इन्स्टिट्यूट, आय एम ए चॅरिटेबल ट्रस्ट फोंडें हांच्या सहकार्यान ही राष्ट्रीय परिशद आयोजित केल्ली.
ह्या वेळार माचयेर डॉ. संतोष उजगांवकार, पद्मिनी एज्युकेशन सोसायटीचे अध्यक्ष पांडुरंग कुर्टीकार, संतोष मळीक, डॉ. वल्लभ धायमोडकार, डॉ. स्नेहा भागवत, अदिती सावंत, डॉ. दत्ताराम देसाई, डॉ. गीता जोशी, सुलक्षणा सावंत आनी हेर हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
