करियर भाशेंतलें

भांगरभूंय | प्रतिनिधी

भाशेंतल्या करियरा विशीं ह्या सदरांत चार फावटीं बरयलां, हे फावट परत एकदां बरयतां. कारण भाशा फांट्यांतलो विद्यार्थी खंयचेय पिरायेचेर शिकपाक शकता. गोंयांत तुमी कोंकणी, मराठी, हिंदी, संस्कृत, इंग्लीश, पुर्तुगेज, फ्रेंच, इटालियन, उर्दू ह्या भाशा सोंपेपणी शिकपाक शकता. मात रशियन, जर्मन हे सारक्यो भाशा शिकपाक तुमकां मार्गदर्शक सोदचे पडटले. आॅनलायन वर्गान हें काम सोंपें केलां.
मुंबय सारक्या शारांत तर एक संस्था 55 कोर्स दिता. हांलींच तांणी जर्मन भाशा शिकपाक आॅनलायन वर्ग सुरू केल्यात. मागणी आसत जाल्यार ते हे वर्ग विद्यार्थ्यां खातीर सुरू करपाक शकतात. परदेशांत वचप्यांक तर हे उपेगाचे पडपाक शकतात. खेरीज दिसाळ्यांचो अभ्यास करतना ही कला उपेगी पडूं येता. नवे शिक्षण पद्दतींत थळाव्या भाशांक चड म्हत्व दिल्लें आसलें तरी विदेशी भाशांचें म्हत्व कमी जायना. उरफाटें तें चड वाडटा.
भाशा कोणूय शिकपाक शकता. काॅलेजीक वचपी भुरग्यांक तर करियराचे नदरेन हें सामकें म्हत्वाचें. विज्ञानाचो फांटो सोडल्यार हेर विद्यार्थ्यांक खूब वेळ मेळटा. त्या वेळार ते भाशा शिकपाक शकतात. विदेशी भाशेचे खूब फायदे आसात. गोंय हें आंतरराष्ट्रीय मळा वयलें पर्यटन थळ. हांगा जायत्या देशांतले पर्यटक येतात. सगल्यांकूच इंग्लीश येताच अशें ना. देखीक ते आपापली भाशा उलयतात. तांकां आपली भाशा उलोवपी मनीस मेळत जाल्यार बऱ्याक पडटा. कोणूच मेळनात जाल्यार तुमी त्या देशांत कितें नोकरी आसा जाल्यार पळोवची आनी थंय वच्चें.
एक वेपारी आपले मुलाखतींत सांगतालो. ताका एकदां फ्रान्साक वच्चें पडलें. तेन्ना थंयच्या कर्मचाऱ्यांनी फ्रेंच भाशेंतल्यान ताचे कडेन उलोवप केलें. तांकां हरशी इंग्लीश कळटाली, पूण ते मुद्दाम फ्रेंच उलयले. तो वेपारी शाळेंत फ्रेंच शिकिल्लो, देखून ताणें तांबडी फ्रेंच उलोवन वेळ मारून व्हेलो. खंयची भाशा आयज गरजेची जाल्या, ताचो अभ्यास करात. ती शिकात. वेपार, वकिलातीं नोकरी करपाक सोदता जाल्यार विदेशी भाशा येवप गरजेचें.
पयलीं भाशा शिकप कठीण आशिल्लें. आतां मोबायल फोना वयल्या सोशल मिडिया, इंटरनेटाक लागून तें सोंपें जालां. गोंयांत अजुनय पुर्तुगेज भाशेचें म्हत्व आसा. आॅनलायन, आॅफलायनूय वर्ग आसात. कामोईश केंद्र हे भाशे खातीर हे बाबतींत लोकप्रीय आसा. तांचे वर्ग आतां मडगांव चौगुले काॅलेजींत आनी म्हापशेंच्या सेंट झेवियर काॅलेजींत आसात. काम करपी लोकांक बऱ्याक पडचें म्हूण हे वर्ग साजंवेळार पांचा उपरांत पसून घेतात. दिसाळ्यांनी हाची म्हायती वाचूंक मेळटा.
गोंय विद्यापीठांत पसून शिकपाची सुविधा आसा. फ्रेंच भाशा तुमकां एलियन्स फ्रेंचायसे ही संस्था शिकोवपाक शकता. तांचे वर्ग वेगवेगळ्या जाग्यांचेर जाता. मुंबयचो पौरस देशपांडे जर्मन भाशा आॅनलायन शिकयता. खंयचीय भाशा शिकतलो जाल्यार ती आयकप, उलोवप, बरोवप गरजेचें. तशेंच ते भाशेचो शब्दकोश घेवपाक जाय. खेरीच ते भाशेंतले पर्यायी शब्द दिवपीय कोश घेवंक जाय. सद्दां पानभर शुद्धलेखन बरोवपाक जाय. नवीं उतरां बरोवन घेवंक जाय. नवीं वाक्यांय तयार करूंक जाय. www. spreadingknowledge ही बेवसायट देशपांडे चलयतात. तातूंत तुमकां जायत्यो भाशा शिकपाक मेळटात. जर्मन भाशा खंय मराठीक लागीं. वैजकी मळाचेर आसूं वा तंत्रगिन्यानाच्या, जर्मन भाशा खूब लोकप्रीय आसा. शर्वरी देशपांडे हे वर्ग घेता. तांकां शिकोवपाचो बऱ्याच वर्सांचो अणभव आसा. भाशा शिकतना ती तुमकां जर्मन संस्कृतायेची म्हायतीय दितात. आॅनलायन लॅग्वेज टिचींक कोर्स अशें गुगल सर्चाचेर मारल्यार तुमकां जायत्या वर्गांची म्हायती मेळटली. तुमकां खंयची भाशा शिकपाक जाय तेंय सर्च करचें.

प्रा रामदास केळकार
9822583275