भांगरभूंय | प्रतिनिधी
शिकिल्लो आसूं वा अशिक्षीत, भुरगो आसूं वा जाण्टो, गरीब आसूं वा गिरेस्त…. दरेकल्या कडेन मोबायल फोन हो आसताच. सगल्यांचो टायमपास बरो जाता आसलो तरी मोबायल फोनाक लागून वेगवेगळ्यो समस्या निर्माण जाल्यात, हें आमी न्हयकारपाक शकनात. थोड्यांत अभ्यास जावंक ना म्हूण शाळेंत वचन दिसना. अभ्यास कित्याक जावंक ना, तर सगलो वेळ मोबायल फोनाचेर सोशल मिडिया पळोवपांतूच गेलो. ताकां न्हीदूय उणीं मेळटा. ताचेंय कारण मोबायल फोन. आयच्या लेखाचो विशय आसा, अध्यात्म. तुमी म्हणटले, मोबायलाचें प्रकरण मदींच शें? एक म्हणल्यार वाचपाची आवड दिसान दीस कमी जायत आसा. मोबायलाचेर सगलीं भुरगीं दीसरात आसतात. पूण तीं वाचन करीनात. तर हलके फुलके व्हिडियो, पदां, विनोदी किस्से पळयतात. तकली दुखसर पळयतात. मागीर वायट विचार मनांत येतात, कांय जाणांक वक्ल लागता. हें सगलें मोबायल फोनाक लागूनच जालां, अशें आमी म्हणपाक शकनात. पूण तें एक कारण आसपाक शकता. प्रेमप्रसंगूय वाडल्यात, ताचेंय माध्यम मोबायला वयली सोशल मिडिया. देवळांत वचपी लोक उणे जाल्यात, हे सगलेच मान्य करतले. तुमी म्हणटले देव पळयला? हाची जाप नासली तरी ती सोदपाक मनीसूच कोण ना. देव वा अध्यात्म हो विशय केस धवे जातकच पळोवया, अशें म्हणपी जायते जाण आसात.
किर्तन आयोजीत केलें काय लोक देवळांत वतात. मागीर तो देव मानपी आसूं वा नास्तिक. किर्तन हो करियराचे नदरेन फायदेशीर वेवसाय. आदल्या तेंपार विशिश्ट जातींतलेच लोक किर्तनाच्या मळाचेर पावल दवरताले. ताका तशीं कारणांय त्या वेळार आशिल्लीं. आतां सगल्या जातींतले दादले, बायलां पसून ह्या किर्तन मळाचेर येवपाक शकतात. हाचे एक कारण म्हणल्यार ही कला सगले कडेन शिकपाक मेळटा. इतलेंच कित्याक आॅनलायन पसून वर्ग आसात. ताचो तुमी लाव घेवं शकतात. असो एक बुवा आसा, जाणें हे वर्ग सुरू केल्यात. तो एक अभियंतो, समुपदेश, किर्तन कोच, योगशिक्षक, भलायकी- आहार मार्गदर्शक, व्याख्यातो. ताचें नांव ह. भ. प. गजानन किनगेबुवा. तांकां ताचें शिक्षण तांचे बाबा स. रामदास महाराज किनगे हांचे कडल्यान मेळ्ळें. ते भागवतकार म्हूण प्रसिद्ध आसले. फाटोफाट आवयूय देवा घरा गेली. ताका लागून किनगे हांकां किर्तन सेवा करची पडली. ते तेन्ना नोकरी करताले. ती सांबाळत तांणी किर्तनां सुरू केलीं.
ते सांगतात, ‘किर्तनकाराक वाचन बरें जाय. धर्मीक, वैचारीक वाचन जाय. स्मरणशक्त जाय. आवाज म्हणल्यार ताळो बरो आसूंक जाय. घरांतलें वातावरण धर्मीक आसल्यार चड बरें. अभिनय करपाक कळूंक जाय. येना जाल्यार शिकचो.’
कितेंय शिकप आतां कठीण न्हय. युट्यूबाचेर ते शिकपाक मेळटा. किर्तनकाराक शास्त्रीय संगीत येवपाक जाय. तुमी नोकरी केली तर थंयचे कांय जाण तुमचे कडेन प्रस्न घेवन येवं शकतात. तांकां निराश करचे न्हय. गजानन बुवा सांगतात, हांव समाज प्रबोदन करता तें रितसर शिकूनच. सध्या हांव भलायकेच्या विशयाचेर शिकप करतां. वखदां बगर तुमी बरे जावं शकतात, हाचेर कोणाचोच विस्वास ना. कारण तें संशोधन अजून चलता. खेरीज एक लाॅबी तुमच्या विरोधांत सदांच आसतली. हें आदींच मतींत दवरात. हे विद्येन कितल्याशाच भावा- भयणींचो खर्च कमी करपाक मजत केल्या. हातूंतल्यान दुस्मान तयार जावं येतात, म्हजे किर्तन आयकल्लो लोक म्हजे वांगडा आसा. आमी भक्तीप्रचार करतात, ती माऊली, देव लेगीत आमचे वटेन आसात. शाळा, महाविद्यालयांनी पसून तांचे कडेन संपर्क केला. तांचो फोन नंबर आनी ईमेल आसा, 98506 50380, [email protected].
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
