भांगरभूंय | प्रतिनिधी
सगलो एप्रील म्हयनो तुमकां शाळा आसतली, हें जरी खरें आसलें तरी एका अर्थान ती सुटीच आसतली. कारण मदले सुटये मेरेनूच वर्ग आसतले. मागीर प्रस्न आसा तो मेळिल्ल्या वेळाचो उपेग कसो करतले तो. टिव्ही, मोबायलाचेर गरज नाशिल्ल्यो गजाली पळोवपांत चडशे वेळ पासार करतले. पूण म्हाका दिसता हें सोडून तुमी बऱ्यो गजाली करपाक शकतात. फक्त तुमी मनाचेर घेवंक जाय. जीं कामां हांव सांगतलो तीं तुमी घरांतूच करपाचीं. भायर वचपाची गरज ना. एक चोपडी आनी पेन पुरो. तुमचें जेवण जावचे पयलीं एकूच काम करपाचें. तें कसले? एक म्हणल्यार तुमी तुमचें अक्षर नितळ करपाक शकतात. नितळ आसा जाल्यार चड नितळ करूंक शकतात.
नवें शिक्षण धोरण अंदुंच्यान आठवे यत्ते मेरेन लागू जातलें. हातूंत वाचन हो म्हत्वाचो भाग आसा. हो वावर तुमी सुटयेंतूय करपाक शकतात. तुमी एक पानभर बरोवचें आसा जाल्यार तें वाच्चें पडटलें. सादें दिसाळें घेयात, हातूंतलो अग्रलेख, प्रासंगीक लेख म्हत्वाचो. चडशे फावट तातूंत ताजे विशय येतात. चालू घडामोडींचेर तो बरयिल्लो आसता. सध्या झूज चालू आसा, गॅसाची टंचाय आसा. ताचेरुय तो आसूं शकता. हें वाचन केलें काय तुमकां बरेच फायदे जातले.
फक्त वाचनूच न्हय, तर तो बरोवन काडचो. तुमचें अक्षर सुदारतलेंच, खेरीज तुमचो बरोवपाचो वेग वाडटलो. गिन्यान वाडटलें. फकत दिसाळेंच न्हय तर अतिरिक्त वाचन करून तुमी कांय मुद्दे बरोवन घेवंक शकतात. कांय शिक्षणीक वेबसायटी पळोवन फाटलो पेपर सोडोवपाचो यत्न करूंक शकतात. चडशे विद्यार्थी हें करीनात. नेट पळोवपाची तुमकां संवय आसा जाल्यार तुमी शिक्षणीक वेबसायटी पळोवच्यो. शिक्षण चलतना, तें सोंपतकच, नोकरी करतना, निवृत्त जातकचूय कोणेंच चड सुटी घेवंक फावना. कितें ना कितें करीत रावपाक जाय. एखादो बरो छंद बाळगूं येता. पेंवपाक शिकूं येता. गोंयांत कितल्योशोच न्हंयो आसात. सरकारी जलतरण तलावूय आसा. थंय तुमकां उणी फी घेवन शिकोवपी मनीस आसता. खेरीज तुमी ड्रायव्हींग, रांदपाक शिकपाक शकतात. विद्यार्थ्यांनी सदांच शिकत रावपाक जाय. तुमी स्टँप म्हणल्यार टपाल तिकेटी एकठांय करून ताचो संग्रह करपाक शकतात. वेळ पासार जावपाक हें बरें. भुगोलाचो अभ्यास लेगीत बरो जातलो. ह्या तिकेटींचें वेगळेंपण कितें तें तुमी जाणून घेवं शकतात. त्या देशांची म्हायती घेवपाक शकतात. सद्या शाळांनी बाजार भरता. तो उपक्रम भुरग्याक उपेगी. सामान विकप कशें, खरेदी कशें करप हाची म्हायती मेळटा. बाजार करपाचो आत्मविस्वास मेळटा. सध्या बाजार कसो चलता, ताचें गिन्यान मेळटा. दिसाळ्यांचे नदर मारल्यार तुमकां विवीध कार्यावळींची म्हायती मेळटा. तुमकां लागीं आसल्यार तुमी थंय वचून ती पळोवंक शकतात. पणजेच्या इंटरनॅशनल सेंटर, कला अकादमी, पर्वरेचें सेंट झेवियर केंद्र, आल्तिनोचें सुनापरान्ता केंद्र, पिळर्णाचें मोग केंद्र हांगा जावपी कार्यावळी पळयत जाल्यार तुमकां फायदोच जातलो. निवासीं शिबिरांत आसल्यार ताचीय म्हायती घेवची. ह्यो सगल्यो गजाली तुमच्यो वळखी वाडपाक, गिन्यान वाडपाक, करियरा खातीर फायद्याच्योच थारतल्यो.
विवीध कार्यशाळा
पुण्याची विश्व मराठी परिषद ही संस्था जायत्यो आॅनलायन कार्यावळी दवरता. ते खातीर तुमी अनिकेत पाटील हांचे कडेन 75072 07645 हांचे कडेन संपर्क करूं शकतात. ई बूक कसो करप, अनुवाद टिप्स, ध्यान सारके विशय ते हाताळटात. ताचेर आॅनलायन वा चार- पांच दिसांची कार्यशाळा घेतात. अंदुंच्यान पर्तगाळी वेदांत अभ्यासक्रम सुरू करतले. ते खातीर 31 मार्च मेरेन अर्ज करूं येता.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
