भांगरभूंय | प्रतिनिधी
ए कूच न्हय, तिका 26 भाशा येतात. ती आसा मुंबयची अमृता जोशी. तुमकां घडये हें खबर आसतलें. करियराचे नदरेन भाशा म्हत्वाची. चडांत चड भाशा तुमकां येवपाक जाय. गोंयांतल्या विद्यार्थ्यांक फ्रेंच, पुर्तुगेज शिकपाची संद मेळटा. इंग्लीश, हिंदी तर तो शिकताच. पूण ज्यो भाशा हांगा शिकपाक मेळनात, त्यो पोटा-पाणयाच्यो भाशा म्हणटात, त्यो जपानी, जर्मन, चीनी (मेंडारिन) भाशा ताका सारक्यो उलोवपाक, बरोवपाक येवंक जाय. ही शिकपाची संद अमृताबायच्या आॅनलायन वर्गांत मेळटा. ती मुंबय शिकयता. पूण सगल्यांकूच थंय वचप शक्य ना. मात आॅनलायन वर्गाचो तुमी लाव घेवं शकतात. मात ते खातीर तुमकां अमृता भशेन भाशेची आवड जाय. तुमी खंयच्या फांट्याचे विद्यार्थी आसात, तें म्हत्वाचें ना. पूण तुमकां शिकपाची आवड, उमेद आसपाक जाय. आमचें गोंय पर्यटन राज्य. म्हणटकच गोंयकारांक करियराचे नदरेन भाशा शिकप फायद्याचें पडू येतां.
अमृता जोशी आमडेकर ही मुंबयची. बऱ्याच माध्यमांचेर तुमी तांची मुलाखत पळयल्या आसतली. वाचल्याय आसतली. ती सांगता, ‘चड भाशांचेर तुमचो शेक आसल्यार तुमकां करियराची चड संद आसात. अनुवादक, दुभाषी, प्राध्यापक, गायिका (आवाज मात गोड जाय), समालोचक आनी खूब कितें करपाक मेळटा. म्हाका ल्हानपणारुच भाशेची आवड आशिल्ली. तातूंत हांव शिकत गेलें.’
अमृताक जायते पुरस्कार फावो जाल्यात. ती सांगता, खंयचीय भाशा शिकतलो जाल्यार ते भाशेंतलें वाचन जाय. संवाद करपाक येत जाल्यार चड बरें. तुमी एखादो सिनेमा वा मालिका पळयतात, तेन्ना तातूंतले संवाद सकयल येवपी पट्टेंत दिल्ले आसतात. ते तुमकां भाशा शिकपाक उपेगी पडटात. अशे सिनेमे आनी मालिका तुमी मुद्दाम पळोवचे. एक अभ्यास म्हूण सकयल स्क्रोल जाता तो मजकूर वाच्चो. आतां जायत्यो वेबसायटी आसात. कशें उलोवचें तें सांगपी पसून वेबसायटी, युट्यूब व्हिडियो आसात. म्हज्या वेळार हें नासलें. म्हणटकच आतांच्या भुरग्यांक चड लाव जातलो. म्हजें शिक्षण किंग जाॅर्ज दादर हांगा जालें. तुमी जी भाशा शिकतले ते भाशेचो शब्दकोश तुमचे कडेन आसपाकूच जाय. खेरीच समानअर्थी उतरांचो कोश बाळगुचो. हेर पुस्तकां तुमी वाचपघरांतल्यान हाडल्यार चलता. पूण कोश मेजार जायच. भाशा तज्ञ जातलो जाल्यार कोश, व्याकरणाचें पुस्तक हे संदर्भा खातीर आसपाक जाय.
अमृतान प्रवासाचेर एक पुस्तक बरयलां. तिणें चल्याचेर अगस्त्याचेर होम स्कुलिंगाचो प्रयोग केलो. भाशा शिकयतनाय तिणें प्रयोग केले, जे परदेशांतल्या शाळांनी सुरू जाल्यात. ती म्हणटा, आतां संवसार तंत्रज्ञान, विज्ञानाक लागून लागीं आयला. देशी भाशां वांगडा परदेशी भाशाय शिकपाक मागणी आयल्या. तुमी कसल्याय कामा खातीर देशांत वा भायर वतात, तेन्ना ती भाशा तुमकां येवप फायद्याचें थारता. म्हाका स्वताक 22 विदेशी आनी आमचे कडल्यान चार अश्यो 26 भाशा येतात. हाचो फायदो हांव जे सुवातेर वता तेन्ना येता. म्हाका उलोवपाचीं आमंत्रणां येतात. कंपनीय म्हाका आपयता. लायफ कोच म्हूण म्हजी वळख जाल्या. भाशेचेर परिसंवाद जावं, चर्चा जाता, तेन्ना म्हाका आयोजक आमंत्रण दितात. भाशेक लागून म्हाका संवसार भोंवपाक मेळ्ळा. तुमकां जर म्हज्या वर्गांत येवपाक जाय जाल्यार amruthag.langs@gmail.com ह्या मेलाचेर मुजरत कळोवपाक विसरू नाकात. हे खेरीज म्हजी www.amrutaalangs.com ही वेबसायट पळयात.
गोंयांत तुमी इंग्लीश, पुर्तुगेज, इटालीयन, फ्रेंच भाशा शिकपाक शकतात. हेर खंयचीय भाशा तुमकां शिकपाक जाय जाल्यार तुमी ती शिकपाक शकतात. एक छंद म्हूण. ताचे खातीर अमूकच शिक्षण जाल्लें आसपाक जाय, अशें ना. आवड मात आसपाक जाय.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
