भांगरभूंय | प्रतिनिधी
अपघाता आदीं झाडां बेणपाची वा मारपाची लोकांची मागणी
भांगरभूंय । प्रतिनिधी
म्हापशें : करासवाडो म्हापश्यां रस्त्याचे कुशीक धोकादायक स्थितींत आशिल्लीं झाडां वाऱ्या पावसान हुमटून पडपाची शक्यताय आसा. आठ वर्सां आदीं हातूंतल्या एका झाडाचो खांदो पडून दुचाकी चालक जखमी जाल्ले.
पावस आनी वादळी वाऱ्याक लागून म्हापशें सयत बार्देस म्हालांतल्या विवीध वाठारांनी झाडांची पडझड चालू आसा. कांय कडेन घरांचेर झाडां वा झाडांचे खांदे पडून लुकसाण जालां. जाल्यार कांय वाठारांत रस्त्यांचेर आनी वीज सरयांचेर झाडां पडल्यांत.
करासवाड्या वयल्या गोवा ट्रॅक्टर्स आस्थापना मुखार रस्त्या कुशीक आशिल्ली झाडां धोकादायक स्थितींत आसात. हीं झाडां रस्त्यार पडून अपघात जावपाचो भंय थळाव्या लोकांनी तशेंच गाडी चलोवप्यांनी उक्तायल्या.
5 जूनाक 2017 ह्या दिसा ह्या झाडांतल्या गुलमोहराचो एक व्हड खांदो पडून सावंतवाडींतलो दुचाकी चालक आनी ताची घरकान्न जखमी जाल्ली. आतां परतून तींच झाडां रस्त्या वटेन लवंडिल्ले स्थितींत आसा आनी ती दुर्घटणेक आमंत्रण दिवपी स्थितींत आसात. एकादो अपघात जावचे आदीं पालिकेन ह्या झाडांचे खांदे मारचे, अशी मागणी वाहन चालकांनी केल्या.
मजगतीं, कांय वर्सां आदीं सरकारान धोकादायक स्थितींतलीं झाडां वळखून तीं बेणपाची वा पुराय झाड मारपाचे निर्देश दिल्ले. ते प्रमाण म्हापशें पालिकेन लेगीत धोकादायक स्थितींत आशिल्ल्या झाडांची वळेरी तयार केल्ली. ते प्रमाण पालिकेन लेगीत कांय झाडां मारिल्लीं. पोरूं लेगीत झाडां बेणिल्लीं, मात अंदूं ती जावंक ना. अंदूं सरकारान आपत्कालीन वेवस्थापन समिती वरवीं पालिका, पंचायत, भौशीक बांदकाम खातें, राष्ट्रीय म्हामार्ग प्राधिकरण हांकां धोकादायक स्थितींत आशिल्लीं झाडां बेणपाचे निर्देश दिल्यात. वयलीं झाडां भौशीक बांदकाम खात्याच्या अखत्यारींत येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
