भांगरभूंय | प्रतिनिधी
भांगरभूंय । प्रतिनिधी
म्हापशेंः करासवाडो- म्हापशें हांगची जमनीपोंदचे वीज केबल्सच्या कामाक लागून उदकाची मुख्य पायपलायन फुटली. ती सारकी करपाचें काम बांदकाम खात्यान हातांत घेतिल्ल्यान बुधवार आनी बिरेस्तारा (24,25 ऑगस्ट) बार्देश तालुक्यांतल्या कांय वाठारांत मर्यादीत उदका पुरवण करतले
वीज खात्या कडल्यान म्हापशें शारांत जमनीपोंदच्यान वीज केबल्स घालपाचें काम सुरू आसा. शेनवारा करासवाडो फ्लाय ओव्हरा लागीं हें काम सुरू आसतना 1 हजार एमएस आनी 350 एमएची उदका पायपलायन फुटली. ती फुडल्या हें कळटकूच बांदकाम खात्यान ती सारकी केली. 1 हजार एमएमची पायपलायन फुटिल्ल्यांचें मंगळार दनपारां कळ्ळें. टाकयेंत उदक पडना हें दिसून येतकूच पायपलायन फुटल्या हें अधिकाऱ्याच्या लक्षांत आयलें.
बांदकाम खात्याच्या अधिकाऱ्यांनी तशेंच म्हापशें पालिका मंडळाच्या नगरसेवकांनी घडणुकेचे सुवातेर वचून पळोवणी केली. कंत्राटारा कडल्यान दुरुस्तीचें काम सुरू केलें. बुधवार रातीं वा बिरेस्तारा सकाळ मेरेन हें काम पुराय जावपाची शक्यताय आसा.
वीज केबल्स घालपी कंत्राटदारा कडल्यान सेन्सर उपकरणांचो वापर जायना, तो केल्लो जाल्यार पायपलायन फुटपाची पाळी येनाशिल्ली. वीज खातें आनी बांदकाम खात्या मदीं समन्वय नाशिल्ल्यान हे प्रकार घडटात. बार्देश तालुक्याक मर्यादीत उदका पुरवण करपा खातीर दिवचल तालुक्यांतल्या कांय वाठाराक मर्यादीत उदका पुरवण करतले अशें एका वरिश्ठ अधिकाऱ्यान सांगलें.
म्हापशें, साळगांव, कळंगुटे आनी शिवोले मतदारसंघाक 1 हजार एमएम पायपलायनींतल्यान उदका पुरवण जाता. ताका लागून ताचेंर थेट परिणाम जातलो. थिवी आनी हळदोणे मतदारसंघात वेगळे पायपलायनींतल्यान उदक पुरवण जाता. पर्वरी मतादासंघा खातीर खासा उदक शुद्धिकरण प्रकल्प आसा. ताका लागून थंयच्या लोकांक उदक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
