भांगरभूंय | प्रतिनिधी
उपसभापती ज्योशुआ डिसोझाः करासवाडो उड्डाण पुलाच्या अलायनमेंटांत बदल करपाची सुचोवणी
भांगरभूंय । प्रतिनिधी
म्हापशें: राष्ट्रीय म्हामार्ग रुंदीकरणा वेळार म्हापशें शारांतले अशीर सर्वीस रस्ते आनी करासवाडो जंक्शना वयल्या भुंयारी मार्गाचें अलायनमेंट वेवस्थीत ना. ताचो लोकांक त्रास जाता. सरकारान हाचेर मोपा विमानतळ पुराय तांकीन सुरू जावचे आदीं सासणाचो उपाय काडचो, अशी मागणी उपसभापती ज्योशुआ डिसोझा हांणी केली.
उपसभापती डिसोझा हांणी शुक्रारा भौशीक बांदकाम खातें म्हामार्ग विभागाचे सहाय्यक अभियंते व्हिक्टर सिक्वेरा, कन्सल्टंट आनी हेर अधिकाऱ्यां सयत तार जंक्शन ते गोठणोचो व्हाळ मेरेनचो सर्वीस रस्तो आनी करासवाडो जंक्शन भुंयारी मार्गाची पळोवणी केली.
ह्या वेळार तांचे वांगडा नगरसेवक प्रकाश भिवशेट, सुशांत हरमलकार आनी नगरसेविका बार्बरा कारास्को हाजीर आशिल्ली. उपसभापती डिसोझा हांणी चार जंक्शनांची पळोवणी करून अधिकाऱ्यां मुखार तंत्रीक मुद्दे उपस्थीत केले.
उपसभापती डिसोझा हांणी सांगलें, म्हामार्ग कामाच्या रुंदीकरणा वेळार करासवाड्यार उड्डाणपूल बांदून ह्या जंक्शनाचेर अंडरपासची वेवस्था केल्या खरी, पूण ह्या अंडरपासाचें अलायनमेंट बरोबर ना. हाचें कारण म्हणल्यार कंत्राटदार आनी सल्लागार हांचे मदलो संघर्श अशें म्हणटात, पूण हें कारण दिवन चलचें ना. हाचेर उपाय काडपाक आपणे अधिकाऱ्यांक सांगलां.
करासवाडो जंक्शना वयल्या अंडरपास अलायनमेंटांत तंत्रीक नदरेन कांय उणाव आसा. ताका लागून सकाळीं आनी सांजे वेळार ह्या जंक्शनाचेर व्हड कोयंडी जाता. हाचो त्रास ह्या मार्गाचो वापर करप्यांचेर जाता. हें मुख्य जंक्शन आसा. बार्देस, पेडणें आनी सत्तरीच्या येरादारी मदलो हो म्हत्वाचो भाग आसा. तशेंच मोपा विमानतळा वयल्यान म्हापशें वटेन येतना सगळ्यांत पयलीं हें जंक्शन मेळटा. ताका लागून मोपा विमानतळ पुराय तांकीन सुरू जाले उपरांत ह्या मार्गा वयली येरादारी वाडटली. ते खातीर अलायनमेंटांत दुरुस्ती करचे खातीर गरजेचे बदल करचे, अशी सुचोवणी आपणे अधिकाऱ्यांक केल्या. तशेंच भौशीक बांदकाम मंत्री आनी मुख्यमंत्र्यांचे नदरेक हो प्रकार हाडून दिला. कंत्राटदार आनी कन्सल्टंट हांचे मदीं कांय मतभेद आसात, पूण ताचो परिणाम लोकांचेर जावपाक जायना, अशें डिसोझा हांणी सांगलें. मजगतीं, पेडें जंक्शनाचेर सर्वीस रस्तो खणूक तो आदले वरी केला, पूण ताचें डांबरीकरण करूंक नाशिल्ल्यान रस्त्या कुशीच्या घरांक फाटल्या वर्सभरा सावन धुल्लाचो त्रास सोंसचो पडटा. थळाव्या लोकांनी हे संबंदांत आमदार तशेंच उपसभापती डिसोझा हांची भेट घेवन आपली समस्या मांडली आनी ताकतिकेन रस्त्याचें डांबरीकरण करपाची मागणी केली.
सर्वीस रस्ते साडेपांच मिटर आसचेः डिसोझा
ग्रीनपार्क ते कोलवाळ मेरेनचे सगळे सर्वीस रस्ते साडेपांच मिटर आसचे, अशें उपसभापती ज्योशुआ डिसोझा हांणी अभियंत्यांक सांगलें. आराखड्याचेर हे रस्ते साडेपांच मिटर दाखयल्यात, पूण प्रत्यक्षांत मात हे रस्ते साडेतीन मिटरूच आसात. हाचो परिणाम ह्या सर्वीस रस्त्यांचेर दोन व्हड गाडयो एकाच वेळार सुटपाक शकनात. ताका लागून येरादारीची कोयंडी वाडटा, हाचेर तांणी अधिकाऱ्यांचें लक्ष ओडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
