भांगरभूंय | प्रतिनिधी
म्हापशेंः करासवाडो, म्हापश्यां दुचाकी आनी गाडये मदीं जाल्ल्या अपघातांत जखमी जाल्लो मारियो डिलीमा (51, रा. कान्सा थिवी) ह्या दुचाकी चालकाक मरण आयलें.
हो अपघात 30 सप्टेंबराक वृंदावन हॉस्पिटला लागसारच्या मार्गार जाल्लो. जाल्यार बिरेस्तारा 9 आक्टोबराक सकाळीं जखमी डिलीमा हाका गोमेकॉत उपचार सुरू आसतना मरण आयलें.
महामार्गा वेल्यान जीए 04 टी 7172 ही पर्यटक टॅक्सी घेवन चालक अविनाश नागवेंकार हो पेड्यां ते करासवाडो वटेन वतालो. जाल्यार मुखारच्यान जीए 03 एबी 4030 नंबराची यमाहा स्कुटर घेवन मारियो डिलीमा येताले.
घडणुके सुवातेर दोनूय गाडयांनी एकामेकाक मुखार धपको दिलो. ह्या अपघातांत डिलीमा हे गंभीर जखमी जाले. जखमीक महामार्गा वेल्यान वचपी वाहनचालकांनी स्कुटरीचेर बसोवन म्हापशें हॉस्पिटलांत दाखल केलो. थंयच्यान ताका गोमॅकोंत हालयलो. थंय उपचार सुरू आसतना ताका मरण आयलें.
अपघाताचो पंचनामो म्हापणें पुलीस उपनिरीक्षक उत्क्रांतराव देसाय आनी हवालदार केशव नायक हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
