भांगरभूंय | प्रतिनिधी
फोंडें: करसंगे-बोरये आयज शुक्रारा सकाळीं सुमार ११ वरांचेर विलसन वाझ हांच्या घराक उजो लागलो. उजो लागिल्ल्या वेळार घरांत कोणूच नाशिल्लो. ह्या उज्याक लागून रांदचे कुडींतलें, आनीक एके कुडी सयत घराच्या पांख्याचें बरेंच लुकसाण जालें. जरी उजो लागिल्ल्याचें कारण आजून स्पश्ट जावंक ना तरी उज्यांत ४-५ लाख रुपयांचें लुकसाण जाल्ल्याचो अदमास आसा. फोंडें उजो पालोवपी दळाच्या जवानांनी घडणुके सुवातेर वचून उजो पालयलो.
शुक्रारा सकाळीं घराक कुलूप लावन विलसन वाज आनी ताची आवय घरा भायर गेल्लीं. ताचे उपरांत घराक उजो लागलो. सगळ्यांत पयलीं उजो घरा फुडल्यान आशिल्ल्या सामानाक लागलो. उपरांत तो घराच्या पांख्याक लागले उपरांत नळे फुटिल्ल्याचो आवाज शेजारच्या एका तरणाट्याच्या कानार पडलो. त्या तरणाट्यान रोडेंच फोंडें उजो पालोवपी दळाच्या कार्यालयांत फोन करून हे विशीं म्हायती दिली. उपरांत उजो पालोपी दळाच्या कर्मचार्यांनी घडणुके सुवातेर वचून उज्याचेर नियंत्रण मेळयलें. उज्यांत घरा कडेन पार्क करून दवरिल्ली दुचाकी हुलपोन गोबोर जाली. तशेंच हेर सामानूय लासून गोबोर जालें. उजो पालोवपी दळाच्या कर्मचार्यांनी रांदचे कुडींतलो सिलिंडर भायर काडलो. मात उज्यान गॅस सिलिंडराचें पायप आनी रेगुलेटर लासून गोबोर जालो. सिलिंडरांत गॅस उणी आशिल्ल्यान स्फोट जावंक नाशिल्ल्याचो अदमास उक्तायला. ह्या उज्यांत विल्सन वाझ हांचें अर्दें घर लासलें. हातूंत घराचें ४-५ लाख रुपयांचें लुकसाण जाल्ल्याचो अदमास आसा.
विल्सन वाझ आनी ताच्या शेजराक रावपी घरांतल्या लोकांचें अदीं मदीं झगडें पेट्टालें. मात शुक्रारा विलसन वाझ हांच्या घराक उजो लागले उपरांत सगळ्यांत पयली म्हायती शेजराक रावपी तरणाट्याक मेळ्ळी. तांणी हे विशीं सगळ्यांत पयलीं उजो पालोवपी दळाच्या कार्यालयाक म्हायती दिली. उजो पालोवपी दळाचेे कर्मचारी पाव मेरेन त्या तरणाट्यान स्वता नळाक पायप लावन उजो पालोवपाचो यत्न केलो. ताका लागून थळाव्यांनी त्या तरणाट्याची तोखणाय केली. त्या तरणाट्यान जर उजो लागिल्ल्याची म्हायती उजो पालोवपी दळाक दिवंक नाशिल्ली जाल्यार विलसन वाझ हांचें पुराय घर लासून गोबोर जावपाचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
