भांगरभूंय | प्रतिनिधी
आमदार विरेश बोरकार हांचो आरोप
पणजीः करमळीे मेगा प्रकल्पा आड आंदोलनाचो सुड घेवपा खातीर भुवनेश्वर फातर्पेंकार हांचेर हल्लो जाला. जो मनीस विरोधांत उलयता वा आवाज काडटा ताचेर हे भशेन हल्ले जावपाची शक्यताय निर्माण जाल्या. हे विशीं मुख्यमंत्री डॉ. प्रमोद सावंत हांचेकडेन उलोवन दोशींचेर कारवाय करपाची मागणी करतलों, अशें सांत आंद्रेचे आमदार विरेश बोरकार हांणी सांगलें.
फातर्पेकार हे बुधवारा सकाळीं दुचाकी वयतना तांकां एक गाडी मोखून गेली. हे घडणुकेंत ते गंभीर जखमी जावन गोंय वैजकी महाविद्यालयांत उपचार घेतात. आमदार विरेश बोरकार आनी आरजीपीच्या वावुरप्यांनी ताची खबर घेतली. ह्या वेळार बोरकार उलयताले.
फातर्पेंकार करमळेच्या मेगा प्रकल्पा आड झुंजतालो आनी लोकांचो आवाज म्हण ताणें हो विशय लावन धरिल्लो, अशें बोरकार हांणी म्हणलें.
फातर्पेकार पोरणें गोंयां वचपी म्हामार्गाच्या अंडरपास लागसार चडावाचेर सकाळीं १०.१५ सुमार दुचाकी घेवन वयताले तेन्ना कुशीच्यान एक गाडी येवन ताचे स्कुटरीक दाव्या वटेन मोखून थंयच्यान पळ काडली.
पुराय गोंयभर अंदाधुंदीचो कारभार चल्ला. तशेंच कायदो आनी सुवेस्थेची स्थिती बाबत जाल्ल्यान कोण कितें करता ताचो नेम ना, असो आरोप बोरकार हांणी केलो.
दोन दिसां पयलीं आमी फातर्पेंेकार हाच्या फुडारपणा खाला टीसीपीत मेगा प्रकल्पा आड आंदोलन केलें. काल आमकां स्टोप वर्क ओर्डर मेळ्ळी आनी आयज तिसर्या दिसा ताचेर हल्लो जाला. पुलिसांनी हे विशीं चवकशी चालू आशिल्ल्याचें सांगलां. ते प्रकल्पा आड वावुरिल्ल्यान तांचो सुड घेतला, असोय आरोप बोरकार हांणी केलो.
फातर्पेंकराचे तकलेक, हाताक आनी भेंडाक मार लागला. कोणूय विरोधान उलयता, आपलो आवाज काडटा ताचेर अशे भशेन हल्ले जावपाची शक्यता निर्माण जाल्या. ह्यान फुडें कोण आवाज काडटा ताचेर असोच हल्लो जातलो काय हाची जाप मुख्यमंत्र्यान दिवची. हांव मुख्यमंत्री प्रमोद सावंत हांचे कडेन हे घडणुकेची दखल घेवन फावो ती कारवाय करपाची मागणी करतलो, अशें बोरकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
