भांगरभूंय | प्रतिनिधी
पणजी : करमळे अवैध पद्धतीन एका मेगा बांधकाम प्रकल्पाक परवाने दिल्यात. हो प्रकल्प थळाव्यांक नाका. नगर नियोजन खात्यान ह्या प्रकल्पाची परवानगी फाटीं घेवची. जो मेरेन परवानगी फाटीं घेनात, तो मेरेन खात्याच्या दारांत आंदोलन चालूच उरतलें अशी शिटकावणी आमदार वीरेश बोरकार हांणी दिली. सोमारा तांकां ह्या प्रकल्पा आड खात्याच्या कार्यालयाचेर मोर्चा काडलो. ह्या वेळार थळावे व्हडा संख्येन हाजीर आशिल्ले.
करमळेच्या मसंडभूंये लागसार ह्या प्रकल्पाक परवानगी दिल्या. हातूंत ८४ फ्लॅट, उदकास्रोत तळें आनी ४६ गाडे आसतले. गांवांत उदक सारकें नासतना असो व्हड प्रकल्प नाका, अशी मागणी गावकारांनी केल्ली. हाचे आड आमी ह्यान पयलींच आंदोलन केल्लें. तेन्ना मुख्य नगर नियोजकांनी प्रकल्पाची पळोवणी करपाचें आस्वासन दिल्लें. उपरांत सेगीत मागणी करून आमकां पळोवणेचो अहवाल दिवंक ना, अशें बोरकार हांणी म्हणलें.
खात्यान ह्या प्रकल्पाक ६० मिटर बफर झोन दिला. मात हाचें बांदकाम सामकें सुवातेचे शिमेर तेंकून सुरू आसा. प्रकल्पाच्या लागसारूच नामनेचें करमळेचें तळें आसा. प्रकल्पाक लागून ह्या तळ्याक धोको आसपाची शक्यताय आसा. प्रकल्पाक लागून फुडाराक हांगचीं घरां, मैदानां हांकांय धोको आसा. थळावे लोक फाटल्या स म्हयन्यां सावन प्रकल्पाक विरोध करतात.मात लोकप्रतिनिधी, मंत्री मात शांत बसल्यात अशें बोरकर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
