करंझाळे- पणजे उजो लागून तीन नुस्तेमार फायबर बोटी लासून गोबर

बोटीक लागिल्लो उजो पालयतना उजो पालोवपी दळाचे जवान.

भांगरभूंय | प्रतिनिधी

पणजी: करंझाळे तणाक उजो लागून तीन नुस्तेमार फायबर बोटी लासून गोबर जाल्यो. जाल्यार उजो पालोवपी दळान रोखडेंच उज्याचेर नियंत्रण मेळयिल्ल्यान तीन बोटीं वाटावंक येस मेळयलें.

उजो पालोवपी दळान दिल्ले म्हायती प्रमाण काल (बिरेस्तारा) 3.58 वरांचेर करंझाळे- पणजे तणाक उजो लागिल्ल्याची म्हायती दळाच्या नियंत्रण कक्षाक मेळ्ळी. उपरांत वयली म्हायती कक्षान पणजे उजो पालोवपी दळाक दिली.

ते प्रमाण स्टेशन फायर ऑफिसर रुपेश सामंत हांच्या मार्गदर्शना खाला सब ऑफिसर फ्रान्सीस आझावेदो, ड्राइव्हर ऑपरेटर नितीन शिरोडकार, फायर फायटर सत्यवान गांवस आनी गितेश फडते आनी हेरांनी घडणूक थळार धांव घेतली.

त्या वेळार वयल्या पंगडान उज्याचेर नियंत्रण मेळोवपाचो यत्न केलो. पूण उज्यान पेट घेतिल्ल्यान थंय दवरिल्ल्यो कावलाक काडिल्ल्यो फायबर बोटींनी पेट घेतलो. हाची म्हायती नियंत्रण कक्षाक दिवन आलायती मजत मागयली.

ते प्रमाण मुख्यालयाचे सब ऑफिसर श्याम पिळगांवकार, ड्रायव्हर ऑपरेटर निलेश फडते, लिडींग फायर फायटर रवींद्र नारुलकार, फायर फायटर गौतम पेडणेंकार, समीर खान आनी मुकुंद मांद्रेंकार ह्या पंगडान घडणूक थळार धांव घेतली. उपरांत उज्याचेर नियंत्रण मेळयलें.

मजगतीं, उजो पालोवपी दळान रोखडेंच उज्याचेर नियंत्रण मेळयिल्ल्यान तीन बोटी वाटावंक येस आयलें. ह्या प्रकरणाची पणजी पुलिसांनी उज्याची घडणूक म्हूण नोंद करून कारवाय सुरू केल्या.