भांगरभूंय | प्रतिनिधी
राज्य सरकार फकत तज्ञांच्या निरिक्षणाच्या आदाराचेरूच कारवाय करतलें: मंत्री निळकंठ हळर्णकार
पणजी : करंझाळे दर्यादेगेवेल्या नुस्त्यांत जड धातूंचे पेड्ड्यार जाल्ले अंश चड आशिल्ल्याच्या गोंय विद्यापिठांतल्या संशोधकांच्या अहवाला उपरांत चिंता उक्तायल्या. भलायकेक निर्माण जाल्ल्या धोक्या विशीं चर्चा जाता. हेच फाटभूंयेर हे विशीं वैज्ञानीक तपासणी चल्ल्या. राज्य सरकार फकत तज्ञांच्या निरिक्षणाच्या आदाराचेरूच कारवाय करतलें अशें मत्स्यवेवसाय मंत्री निळकंठ हळर्णकार हांणी सांगलें.
सध्या ‘नॅशनल इन्स्टिट्यूट ऑफ ओशनोग्राफी (एनआयओ) आनी गोवा विद्यापीठा वतीन अभ्यास करप चालू आसा. तातूंत नुस्त्यांतल्या जड धातूं विशींच्या मुल्यांकनांचो आसपाव आसा. ह्यो देशाच्या बर्या खातीर काम करपी नामनेच्यो वैज्ञानीक संस्था. जर तांच्या निरीक्षणांत कितेंय लुकसाण आशिल्ल्याचें समजल्यार सरकार योग्य ती कारवाय करतलें, अशी म्हायती मंत्री हळर्णकार हांणी दिली.
राज्य सरकार फकत अदमास वा व्हॅरिफिकेशन करूंक नाशिल्ल्या दाव्यांचे निंबून रावचें ना आनी आपले निर्णय, पुरायेन वैज्ञानीक पुरावे आनी तज्ञांचे शिफारशींचेर आदारून आसतले अशें तांणी स्पश्ट केलें.
मत्स्य खातें बेगीनूच नुस्तेंमारीचे हालचालींचेर लक्ष दवरपाक आनी दयारदेगेवेल्या बेकायदेशीर कारवायांचेर कारवाय करपा खातीर पाळत दवरपी ड्रोन तैनात करतलें. गोंयचे हद्दींत येवन नुस्तेंमारी करपी शेजारच्या राज्यांतल्या खुबश्या ट्रॉलर्सांचेर कारवाय करतात आनी त्यो जप्त केल्यात. ड्रोनची पयलींच सुरू जाल्या. बोटींचेर लक्ष दवरपा खातीर ड्रोन कार्यान्वीत केल्ल्याचें तांणी मुटार सांगलें.
मजगतीं, गोंय विद्यापीठाच्या संशोधकांनी केल्ल्या एका वैज्ञानी अभ्यासांतल्यान एक गजाल मुखार आयिल्ले प्रमाण, करंझाळे धरपी आनी खावपी नुस्त्यांच्या खुबश्या नुस्त्यांच्या प्रजातींत धातुचें प्रमाण चड आसा आनी हे भलायकेक धोक्याचें आसा. सरकारान हाचेर खोलायेन अभ्यास करपाची मागणी मुखार येताली. हे विशीं विचारलें तेन्ना, मंत्री हळर्णकार हांणी वयली म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
