भांगरभूंय | प्रतिनिधी
पणजी : कांय दिसां आदीं गोंय विद्यापीठ तशेंच एनआयओ वतीन करंझाळे दर्यादेगेवेल्या नुस्त्याविशीं एक अहवाल प्रसिद्ध जाला. हातूंत नुस्त्यांत धातूचें प्रमाण अदीक आशिल्ल्याचो दावो केला. हाका लागून लोकां मदीं भंय तशेंच दुबावाचें वातावरण निर्माण जालां. हाका लागून ह्या दोनूय संस्थांनी हांगचें नुस्तें खावचें काय ना हे विशीं तीन दिसांनी स्पश्टीकरण दिवचें अशी मागणी विविध नुस्तेंमार संघटणांनी केली.
बुधवारा संघटणांच्या शिश्टमंडळान नुस्तेंमारी उप संचालक चंद्रकांत वेळीप हांची भेट घेवन तांकां हे विशीं निवेदन दिलें. हे विशीं करंझाळे रांपणकार संघटणेचे अध्यक्ष फ्रान्सीस वाझ हांणी सांगलें, अहवाला प्रमाण हांगच्या बांगडे आनी तारल्यां मदीं धातूचें प्रमाण अदीक आसा. मात हे हीं दोनूय नुस्तीं खोल अरबी दर्यांत येतात. तीं सेगीत एके कडल्यान दुसरे कडेन हालतूच आसतात. अशा वेळार करंझाळे सांपडपी ह्या नुस्त्यांत धातूचें प्रमाण चड आसा अशें म्हणप अयोग्य आसा.
तांणी म्हणलें, हांगांच उदकांत आतां एक उफेवपी टॉवर उबारला. हाका लागून आमकां नुस्तें धरतना त्रास जातात. हे विशींयआमी खात्या कडेन खागाळ केल्या. हांगचे नुस्तेंमारीचेर ५ हजार जाण निंबून आसात. असले अहवाल आमच्या पोटार आड येवपाक शकनात. कांय लोकांक करंजाळे बीच आपल्या ताब्यांत घेवपाचो आसा. हाका लागूनच असले प्रकार सुरू आसात असो आमकां दुबाव आसा. मात आमी केन्नाच हे यत्न येसस्वी जावपाक दिवचे ना.
आग्नेल रॉड्रिग्ज हांणी सांगलेंः खात्याच्या अधिकार्यांनी सोमारा एनआयओ, गोंय विद्यापीठ आनी मच्छीमार संघटणेची बसका आपयल्या. हातूंत आनी आमचे मुद्दे मांडटले. नुस्तें प्रदुशीत आसा अशें गृहीत धरल्यार प्रदूशणाचें नेमकें कारणूय सांगपाक जाय. कॅसिनो वा हेर कारणांनी नुस्तें प्रदुशीत आसा काय हें स्पश्ट करचें.
न्यायालयांत वतले
अहवालांत करंजाळेच्या नुस्तें प्रदुशीत आशिल्ल्याचें म्हणलां. खरें म्हळ्यार हें नुस्तें करंजाळेचें न्हय, अरबी दर्यांतलें. हे विशीं संस्थांनी सकारात्मक प्रतिसाद दिवंक ना जाल्यार आमी न्यायालयांत वतले अशें आग्नेल रॉड्रिग्ज हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
