भांगरभूंय | प्रतिनिधी
पणजी : करंझाळेच्या एका भांगराच्या दुकानांतल्यान भांगराच्या सरपळ्यांची चोरी करपी दुबाविताक पणजी पुलिसांनी अटक केली. ताचे कडल्यान वट्ट ३.६० लाख रुपयांचे भांगर हस्तगत केलें.
राजेश शिरोडकार (५०, पर्वरी) हांणी पणजी पुलीस स्टेशनांत दिल्ले कागाळी प्रमाण २६ मार्च आनी १ एप्रिलाक रातच्या ८ ते ८.३० ह्या वेळार तांच्या दुकानांतल्यान तीन भांगराच्यो सरपळ्यो चोरी जाल्ल्यो. चोरी केल्ल्या तिनाय सरपळ्यांचें वजन १०.८ग्रॅम, ७.०८ ग्रॅम आनी १८.०२ ग्रॅम आशिल्ल्या, तांचें मोल ३.६० लाख आशिल्लें.
तपासा मजगतीं, सीसीटीव्ही फुटेजीच्या आधारार पुलिसांनी सुरज दोड्डामणी (२४, करंझाळे, मूळ कर्नाटक) हाका वळखून ताका ताब्यांत घेतलो आनी ताची चवकशी केली. उपरांत पुलिसां फुडें तांणी चोरयेची कबुली दिली. उपरांत पुलिसांनी ताचे कडल्यान तिनूय सरपळ्यो जप्त घेतल्यो.
उत्तर गोंय पुलीस अधीक्षक अक्षत कौशल, पणजेचे उप-अधीक्षक सुदेश नायक हांच्या मार्गदर्शना खाला आनी पुलीस निरीक्षक विजयकुमार चोडणकार हांचे देखरेखी खाला हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
