भांगरभूंय | प्रतिनिधी
पणजी : गोंयच्या करंजाळे दर्यादेगेर धरिल्ल्या नुस्त्यांनी जड धातू चड प्रमाणांत आसता. गोंय विद्यापिठाच्या संशोधकांनी केल्ल्या नव्या विज्ञानीक अभ्यासांतल्यान अशें दिसून आयलां. नेमान हें नुस्तें खाल्ल्यार भलायकेचो धोको निर्माण जावंक शकता, अशी शिटकावणी तांणी दिल्या.
ह्या अभ्यासांत सादारणपणान खावपी जायत्या नुस्त्यांच्या जातींनी धातूचें प्रमाण परवानगेचे योग्य मर्यादे परस चड आशिल्ल्याचें दिसून आयलां. दर्यादेग वाठारांतले नुस्तेकार आनी नुस्तें खावप्यां खातीर ही हुस्क्याची गजाल. जड धातूचें प्रमाण चड आशिल्लें नुस्तें व्हड प्रमाणांत खाल्ल्यार भलायकेक हानीकारक थारूंक शकता. गोंयच्या शारी दर्यादेगे वयल्या वाठारांतल्या नुस्त्यांचे सुरक्षेचेर चड बारीकसाणेन नदर दवरपाची गरज आसा, अशें संशोधनांत म्हणलां.
ए. एम. पाटील, एम. आर. नास्नोडकार आनी सी. जे. जी. फर्नांडीस हांणी करंजाळे दर्यादेगे वयल्या ‘चिखलांतल्या धातूंची जैवउपलब्धता आनी खावपाक योग्य नुस्त्यांतली जैवसंचय’ ह्या अभ्यासांत चिखलांतल्या धातूंचें जैवउपलब्धतेचें मुल्यांकन करप आनी नुस्त्यांच्या वेगवेगळ्या अवयवांनी म्हणल्यार स्नायू, कल्ले, फिग्द, मूत्रपिंड हातूंतल्या धातूचें प्रमाण थारावपाच्या हेतान हें संशोधन केल्लें. तातूंत दर्यांतले जीव आनी मनीस ह्या दोगां खातीर विखारी परिणामांचें मुल्यांकन करपाचेर भर दिल्लो. ह्या अभ्यासांत चडशा नुस्त्यांच्या जातींनी मूत्रपिंडांत सगळ्यांत चड धातूचें संचय दिसून आयलें. ताचे उपरांत फिग्द, कल्ले आनी स्नायू हातूंत दिसलां. बांगडो आनी तारलें ह्या सारक्या 11 प्रकारच्या नुस्त्यांनी धातूचें प्रमाण चड आशिल्ल्याचें दिसून आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
