भांगरभूंय | प्रतिनिधी
भांगरभूंय । प्रतिनिधी
पणजीः करंजाळे वाठारांत सुरू केल्ले इंडियन इन्स्टिट्यूट ऑप वॉटर स्पोर्ट्स प्रशिक्षण बंद करून करंजाळे दर्या वेळ नुस्तेंमार वाठार म्हणून घोशीत करपाची मागणी थळाव्या नुस्तेमार संघटनेचो अध्यक्ष फ्रान्सिस वाझ हाणे एका पत्रकार परिशदेंत केली.. करंजाळे दर्यांत चलतात ते वॉटर स्पोर्ट्स बंद केले ना जाल्यार आंदोलन करपाची शिटकावणी ताणे सरकाराक दिल्या.
करंजाळें, आयव्हांवचे नुस्तेकार सुमार शंबर वर्सां सावन करंजाळें हांगा पारंपरीक पद्दतीन नुस्तेमारी करता. ह्या वाठारांत आशिल्ले रापणकार, मागकार, होडयेकार करंजाळे दर्यांत नुस्तेंमारी करून आपलें पोट भरतात. मात सध्या वॉटर स्पोर्ट्साच्या नांवान जें किदें चल्लां ताका लागून करंजाळें दर्या देग वाठार वॉटर स्पोर्ट्स इन्स्टिट्युटा खातीर सरकार राखीव दवोरतलो अशी भिरांत तांचे मदीं पातळ्ळ्या.
पर्यटन खातें आनी नुस्तें उद्देग खातें आमका सतायता. करंजाळें दर्यां रापणे वरवीं नुस्तेमारीचो वेवसाय आमी नवी पिळगी फुडें व्हरात मात तांचो सरकार विचार करना. करंजाळे दर्या देगेर नुस्तेंमारी सोडून हेर कसल्याच गजालींक सरकारान परवानगी दिवपाक जायना. हांगा हजारांनी टन नुस्तें मारतात. आयव्हांव हांगा खडपांनी शिनाणी, खुबे, कालवां आनी कुल्ल्यो व्हडा प्रमाणांत मेळटात. वॉटर स्पोर्ट्स बोटींक लागून उदक दुशीत जावंन त्यो मरपाक शकतात अशें फ्रान्सिस वाझ हाणे सांगलें.
दर्यात चलपी बोटींक लागून दर्यांतलें नुस्तें पयस वता. जानेरा सांवन आमच्या रापणेंत नुस्तें मेळप सामकेच कमी जालां. देखून आमचेर पातीशेर जावपाची पाळी आयल्या. रांपणीचेर करंजाळें आनी आयव्हांवचे 100 घराबे आनी 200 कामगार निंबून आसात. करंजाळे दर्यादेग वॉटर स्पोर्टस वाठार म्हण आरक्षीत करून सरकारान तांच्या पोटाचेर पांय दवोरचो न्हय अशी मागणी नुस्तेकार अॅथनी वाझ हाणे केल्या.
यांत्रिकी बोटी इंडियन इंन्स्टिट्यूट ऑफ वॉटर स्पोर्ट्सांत वापरचो न्हय अशें तांकां दिल्ल्या परवान्यांत नमूद केलां. मात ताचें उल्लंघन करून हांगासर ट्रेनींग चलता. ह्या दर्यादेगेर पेंवपाच्या प्रशिक्षणाक आनी तसल्या हेर गजालींक आमचो विरोध ना. मात यांत्रिकी बोटींक आमचो खर विरोद आसा अशें संघटनेचो सचीव मॅन्युएल पॉल हाणे सांगलें. आमी किदेंय विचारल्यार पुलीस कारवाय करपाची धमकी दितात अशेंय ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
