भांगरभूंय | प्रतिनिधी
भांगरभूंय । प्रतिनिधी
म्हापशेंः सध्याच्या तंत्रगिन्यानाच्या युगांत कॅम्पुटराचो गैरवापर करून दिसानदीस गुन्यांवाचो आंकडो वाडत चल्ला. ताचेर नियंत्रण दवोरपाक जाय आनी कम्पुटराचो वापर करतना सादूर रावपाक जाय, अशें सायबर गुन्यांव आनी दहशतवाद विरोधी विभागाचे पुलीस निरीक्षक विद्यानंद पवार हांणी सांगलां. भेंडोळें- वझरीच्या शारदा उच्च माध्यमीक विद्यालयांत सायबर गुन्यांव आनी लोक जाग्रुती ह्या विशयाचेर आयोजीत केल्ले कार्यशाळेंत
मुखेल सोयरे म्हणून ते उलयताले.
कम्प्युटर आनी मोबायल वरवीं गूगल पे, फोन पे, मेट्रोमोनिल ह्या सारक्या अॅपच्या माध्यमांतल्यान भेटवस्तूचें हांयस दाखोवन जावपी फटवणुके विशीं पवार हांणी विद्यार्थ्यांक सविस्तर म्हायती दिली. ह्या वेळार माचयेर शारदा उच्च माध्यमीक विद्यालयाचो प्राचार्य गजानन मराठे, पालक-शिक्षक संघाची अध्यक्ष संगीता गांवकार, कम्पुयर फांट्याचो शिक्षक प्रसाद चोडणकार आशिल्लो.
कार्यावळीची सुरवात येवकार गीत आनी दिवली पेटोवन जाली. मानेस्तांक रोपे भेटोवन तांकां येवकार दिलो. शिक्षिका चेतना नार्वेकारान प्रास्तावीक केलें आनी सोयऱ्यांची वळख करून दिली. प्रसाद चोडणकारान कम्पुटराचे फायदे आनी लुकसाण हे विशीं विद्यार्थ्यांक मार्गदर्शन केलें. निमाणे सुविधा मळीक हिणे उपकार मानले. कार्यावळीचें सूत्रसंचालन चेतना नार्वेकारान केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
