भांगरभूंय | प्रतिनिधी
कमरेक कळो येवप कमर दुखप ही सद्या एक सामान्य समस्या जाल्या. व्यायामाचो उणाव, आधुनीक जिणेशैली,
खंयचेय शारिरीक स्थितींत बसप ह्या गजालींक लागून तरणाट्यां मदीं लेगीत हें दुयेंस व्हड प्रमाणांत पातळत चल्लां. एकेच सुवातेर खूब वेळ बसून काम करप हें लेगीत हाका कारण आसा. सुरवातेक ही दूख उणी आसता ते खातीर आमी ताचे कडेन व्हडलेशें लक्ष दिनात. पूण जशे जशे दीत वतात आनी आमी हाचेर कांयच उपाय करिनात तेन्ना ही दूख वाडत वता. ती इतली वाडटा की ती केन्नाय त्रास दिवंक शकता. अशा वेळार वैजकी सल्लो घेतले बगर दुसरो पर्याय आमचे कडेन उरना. तातूंत खर्च लेगीत खूब येता.
कमर दुखीचीं मुखेल कारणां
कमर दुखीचीं कांय मुखेल कारणां आमी पळोवया. जर हीं कारणां तुमी आडायलीं जाल्यार ताचो लेगीत फायदो दिसूंक शकता. सामकी मोव आशिल्ले गादयेर न्हिदप, चड वेळ मेरेन उंच खोटाची जोतीं वापरप, चड वजन वाडोवप, कुडीक कॅल्शियमाचो उणाव आसप, वरांचीं वरां एकेच सुवातेर बसप, कुडीची हालचाल चड वेळ न करप, व्यायाम करपाक टाळप, योग्य स्थितींत बसप अश्यो गजाली कमर दुखीक कारण थारतात. ताका लागून उपचारा सयत ह्यो गजाली लेगीत थांबोवंक जाय.
सादारणपणान दर 10 मनशां मदीं 8 मनशांक जिणेंत मानेची दूख आनी कमराची दूख केन्ना ना केन्ना तरी अणभविल्ली आसताच. दीसपट्टे जिणेंतली बदलती जिणेशैली आनी चुकीचे पद्दतीन हाताळिल्ल्यो शारिरीक हालचाली हीं मुखेलपणान ह्या व्याधीच्या प्रमाणांत वाड जावपाक कारण थारतात. पूण सांद्याच्या रोपणा प्रमाण मणक्याचें रोपण जावंक शकना. म्हणूनच मणक्याच्या दुयेंसा वयली उपाय येवजण समजून घेवप गरजेचें आसा.
मनशाचे फाटीचो कणो हो मणको आनी दोन मणक्यां मदली गादी अशे पद्दतीन ही एक माळ आसता. वट्ट 33 मणक्यांनी ही माळ तयार जाल्ली आसता. तातूंत 7 मानेचे मणके (सर्व्हायकल), 12 फाटीचे मणके (थोरॅसीक) 5 कमेरेचे (लंबार), 5 जोडिल्ले सेक्रम आनी 4 जोडिल्ले मणके (कॉसिक्स) अशे आसतात. हे मणके एकठांय जोडून एक पोकळी निर्माण जाता. तातूंत नसांचे बंडल तकले सावन कमरे मेरेन वता ताका मज्जारज्जू संस्था म्हणल्यार स्पायनल कॉर्ड अशें म्हणटात. दोन मणक्यांचे मदल्यान आशिल्ले पोकळेंतल्यान क्रमश: दावी आनी उजवी नस येता. ह्यो नसो स्नायूंक शक्त आनी त्वचेक संवेदना दितात. ज्या वेळार ह्या नसांचेर ताण येता त्या वेळार वेदनां जातात.
जंय ह्या नसांचेर दाब येता, जसो मानेतल्या मणक्या कुशीक वा कमरेच्या मणक्या कुशीक ते प्रमाण कमश: वेदनां जातात. तळ हाताक तशेंच पांयाक, पोटरेंत आनी तळ पांया मेरेन कळ येता. तेच प्रमाण हातापांयाक येवपी मुयो हाका लागूनच जाणवतात. अती दाबाक लागून क्वचीत दुयेंतीक स्नायूंची ताकद उणी जाल्ल्याचें जाणवता. मणक्याक आदार दिवपा खातीर आनी सुयोग्य हालचालीं खातीर ही मणक्यांची रचणूक लिगामेंटस आनी स्नायूंनी सक्षम आसता. 90 टक्के मान दुखी आनी कमर दुखी ही यांत्रीक स्वरुपाची म्हणल्यार मॅकानिकल आसता. हाताच्या बोटांक जर फाटले वटेन वळयत आनी तेच स्थितींत चड वेळ मेरेन दाब दीत जाल्यार कळ येता. जो मेरेन दाब उणो जायना तो मेरेन कळ वाडतूच वता आनी स्नायूं मदीं पातळटा. ही कळ एक शारिरीक संकेत आसता. मुखार जावपी इंज्युरी टाळपा खातीर होच प्रकार मणक्यां मदली कळ तयार जावपाक कारण आसता.
मानेची दूख आनी कमरेची दूख हाचीं मुखेल कारणां म्हणल्यार चुकीचे पद्दतीन उठप आनी बसप. जशें खूब वेळ मेरेन बसप, चड वेळ मेरेन बागोवन काम करप, परतून परतून बागचे पडप, जड वस्तू उबारप, चुकीचो ताण पडटलो अशे स्थितींत न्हिदप, हांव सद्दां व्यायाम करतां वा योगासनां करतां ताका लागून म्हाका मानेची दूख वा कमराची दूख जावंकूच शकना अशे तरेचो समज, गैरसमज हाका लागून योग्य उपचार पद्दत मेळपाक कळाव जाता आनी तितलोच चड वेळ रिकव्हरीक लागता. तशेंच हाका लागून निश्क्रियताय वाडटा. दीसपट्टे जिणेंतली कार्यशील जिणेशैली मंदावता, ताका लागून निरशेवणी, चिडचीड जावप, कोणाचेर तरी आपूण निंबून आशिल्ल्याची भावना न्यूनगंड निर्माण करता. समाजीक कार्यांत सहजतायेन वांटेकार जावपाक स्वारस्य उरना. थोडे भितर सांगपाचें म्हणल्यार ह्यो वेदना दुयेंतीची दीसपट्टी जीण विस्कळीत करता.
उपचार पद्दती
फिजिथोरपी वरवीं अशे तरेच्या कमर दुखीचेर आनी मानेचे दुखीचेर सहजतायेन मात करूं येता. दुयेंतीक वेदनांचे मुक्तताये खातीर म्हत्वाची टीप म्हणल्यार जावपी वेदना दोन दिसां परस चड काळ आसत जाल्यार रोखडेंच योग्य मार्गदर्शन घेवप. उपचारतज्ञ होमिओपॅथीक दोतोर आनी व्यायाम हांच्या एकवटीत मार्गदर्शनान आनी उपचारा वरवीं वेदना मुक्ती सहज शक्य आसा. तुमच्या मणक्यांची भलायकी तुमच्या हातांत हें लक्षांत आसुंदी. रुटा, रसटॉक्स, प्लंबम मेट, लेडम पाल सारकीं वखदां वापरूं येतात. मणके पुर्णता पुर्ववत जायनात, पूण झीज जावपाचे प्रमाण उणें जाता. दुखप हें 90 टक्के उणें जाता.
डॉ. सोनाली सरनोबत
बेळगांव, 9632613269
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
