भांगरभूंय | प्रतिनिधी
एडीजे न्यायालयाचो निकाल
बागपत, खबरां संस्था ः अलाहाबाद उच्च न्यायालयांत आनी सर्वोच्च न्यायालयांत ज्ञानवापी प्रकरणांत चालू आशिल्ल्या खटल्यांत हिंदू पक्षांक येस मेळत आयलां. आतां उत्तर प्रदेशांतल्या बागपत बदरुद्दीन शाह मजार आनी लाक्षागृह वादांत न्यायालयान हिंदू पक्षांच्या वटेन निकाल लागला. एडीजेच्या न्यायालयान (अतिरिक्त जिल्लो न्यायाधीश) वादग्रस्त शंबर बिघा (सुमार पांच एकर) जमीन हिंदू पक्षांक दिल्या. फाटलीं 50 वर्सां ही केस न्यायालयांत चालू आशिल्ली. निमाणे न्यायाधीशान आयज ह्या प्रकरणांत निकाल दिलो.
1970 वर्सा हें प्रकरण उजवाडाक आयल्लें. मुकीम खान हांणी ही बदरुद्दीन शाहाची मजार आनी कब्रस्तान (मुसलमान समाजाची मसणभुंय) अशें म्हणिल्लें. मुस्लिमांनी हे सुवातेर दावो केल्लो. मुस्लिम समाजान हे सुवातेर दावो केल्या उपरांत हिंदू संघटनांनीय ह्या प्रकरणांत याचिका दाखल केली. 1970 उपरांत जायते फावट हे वादग्रस्त जमनीचेर हिंदू आनी मुसलमान संघटनाचे वाद जाले. 50 वर्सां न्यायालयांत हे जमनीचे मालकी संबंदी केस चलताली. फाटल्या कांय दशकां सावन ह्या प्रकरणांत हिंदू पक्षांनी आपल्या वटेन खूब पुरावे सादर केले. ह्या जाग्यार महाभारत काळा सावन लक्षागृह (लाखामंडप) अस्तित्वांत आशिल्लें. ही सुवात पांडवां कडेन संबंदीत आसा असो हिंदूंनी दावो केल्लो.
एका संस्कृत शाळेचो प्राचार्य आचार्य अरविंद कुमार शास्त्री हांणी सांगिल्लें की ही ल्हान दोंगुल्ली महाभारत काळांतली लाक्षागृह आसा. हांगा पांडवकालीन बोगदोय आसा. ह्या बोगद्याचो उपेग करून पांडव लाक्षागृहांतल्यान पळून गेल्ले.
ह्या वाठारांत व्हड प्रमाणांत उत्खनन जाल्ल्याचे जाणकार सांगतात. दुसरे वटेन संबंदीत सुवातेर शेख बदरुद्दीनाची मजार आनी कब्रस्तान आसा, अशें मुसलमान पक्षांनी सांगलें. सुन्नी केंद्रीय वक्फ मंडळा कडेन दर्गा आनी कब्रस्तानाची नोंद आसा. भारताच्या पुरातत्वीय खात्यान हांगा 1952 वर्सा उत्खनन केल्लें. ह्या उत्खनना वेळार थंय दुर्मिळ अवशेश मेळ्ळे. तशेंच 4500 वर्सां आदलीं आयदनां मेळ्ळीं. हीं आयदनां महाभारत काळांतलीं आसा, अशें म्हण्टात.
लाक्षागृह म्हणल्यार कितें?
महाभारत कथे प्रमाण दुर्योधनान पांडवां विरुद्ध कट रचून वारणावतात (बरनावा) हांगा तांच्या आलाशिऱ्या खातीर लाखे पसून राजवाडो/ मंडप बांदलो. दुर्योधनान हो राजवाडो लासून पांडवांक जिवें मारपाची येवजण केल्ली. पूण पांडवांक दुर्योधनाच्या कटाची पयलींच खबर कळ्ळी आनी तांणी बोगदो खणलो. उपरांत ते बोगद्यांतल्यान पळून गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
