भांगरभूंय | प्रतिनिधी
भोपाळ, खबरां संस्था : मध्य प्रदेशांतल्या छिंदवाड्यार भुरग्यांक मरण आयिल्ल्या तपासांत आतां जायत्यो गजाली उक्त्या जातना दिसतात. तामिळनाडू सरकाराच्या तपासांत अशें दिसून आयलें, कफ सिरपींत वापरपी प्रोपीलीन ग्लायकॉल फार्मा न्हय, जाल्यार उद्देगीक वापर जाता. वखदांनी बंदीचो घटक आशिल्लो. तातूंत प्रोपीलीन ग्लायकॉल सवाय आसा. मात तातूंत डायथिलीन ग्लायकॉल (डीईजी) आनी इथिलीन ग्लायकॉल (ईजी) अशीं विखारी रसायनां आसात. हें भुरग्यां खातीर घातकी आसा. मरणांक कारण थारिल्ल्या सिरपींत 48% परस चड डीईजी आशिल्लें. शिफारस मर्यादा 0.1% आसा. नॉन-फार्मास्युटिकल प्रोपीलीन ग्लायकॉल सौंदर्य उत्पादनां, प्लास्टीक आनी पेंटांत वापरतात. कोल्ड्रिफ सिरप करपी कंपनी श्रीसन फार्मास्युटिकल्सान तें चेन्नयांत पार्क टावनच्या सनरायज बायोटेक कडल्यान विकती घेतली.
मध्यप्रदेशांत ४ जाणांक मरण, सरकारी डॉक्टराक अटक
एमपीत विखारी कफ सिरपाक लागून मरण आयिल्ल्या भुरग्यांचो आंकडो 12 वेल्यान 16 चेर गेलो. आयतारा आनीक 4 मरणांची नोंद जाली. वखद बरोवन दिवपी परसियाचे सरकारी डॉक्टर प्रवीण सोनी आनी सिरप करपी तामिळनाडूची कंपनी श्रीसन फार्मास्युटिकल्स हांचे आड गुन्यांव दाखल केला. सोनीक अटक जाल्या.
महाराष्ट्रांत कोल्ड्रिफ कफ सिरप विक्री, वापराचेर बंदी
मुंबय, मध्य प्रदेश आनी राजस्थानांत खुबश्या बायलांच्या मरणाक कारण थारिल्ल्या वादग्रस्त कोल्ड्रिफ कफ सिरप आड महाराष्ट्र सरकारन खर पावल उबारलां. राज्य अन्न आनी वखदां प्रशासनान (एफडीए) आयतारा हे विशीं आदेश जारी केल्यात. हे सिरपीचो एसआर तेरा ह्या बॅच नंबराच्या बाटल्यांची महाराष्ट्रांत विक्री, वाटप तशेंच वापराचेर बेगोबेग बंदी घाल्या. अन्न आनी वखदां प्रशासनान सगले परवानाधारक वखदां विक्रेत्यांक आनी सामान्य नागरिकांक हे विशीं सुचयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
