भांगरभूंय | प्रतिनिधी
कपिल परमारान भारताक पॅरालिम्पीक सर्तींत ज्युडोंत इतिहासीक पदक जिखून दिलें. ताणें दादल्यांच्या 60 कील वजनाच्या जे1 गटांतले कांश्या पदकाचे लडतींत ब्राझिलाच्या एलिएल्टन डी ऑलिव्हेएराक 10-0 असो सहज हारयलो.
पॅरालिम्पीक आनी ऑलिम्पीक सर्तीच्या इतिहासांत भारताक ज्युडो खेळां प्रकारांत अजून मेरेन एकूय पदक मेळूंक नाशिल्लें. पूण, हातूंत खातें उगडपाचो पराक्रम कपिलान केलो.
भोपाळच्या कपिल परमारान 2019त राष्ट्रकूल खेळां सर्तींत भांगरा पदक, ग्रॅण्ड प्रिक्सांत भांगरा पदक, संवसारीक वस्तादपण सर्तींत कांश्या पदक आनी 2022चे आशियायी पॅरा खेळां सर्तींत रुप्या पदक जिखलां. परमार हो मूळ भोपाळचो. पूण, लखनौंत इंडीयन पॅरा ज्युडो अकादमींत प्रशिक्षक मुनावर अंजार अली सिद्दीकीच्या मार्गदर्शनाखाला प्रशिक्षण घेता. परमाराक 2009त अपघात जाल्लो. घरा खातीर उदक हाडपाच्या यत्नांत ताका विजेचो शॉक लागिल्लो. त्या वेळार तो फकत णव वर्सां पिरायेचो आशिल्लो.
ह्या अपघाताक लागून ताची बोटां एकामेका दसली. ताच्या दोळ्याचेर दिर्घकालीन परिणाम जालो आनी दिश्टीक आडखळ निर्माण जाली. जस जशे दीस मुखार वचपाक लागले ही समस्या आनीक गंभीर जायत गेली. हाय पॉवर वक्लान लेगीत ताका मजत मेळूंक ना. पॅरालिम्पिका खातीर पात्र थारपी तो पयलो दिश्टीहीन भारतीय ज्युडो खेळगडो आसा.
भारतीय खेळगड्यांनी पॅरीस पॅरालिम्पीक सर्तींत अजून मेरेन वट्ट 25 पदकां जिखल्यात. हातूंत पांच भांगरा पदकां, णव रुप्यां पदकां आनी 11 पदकांचो आस्पाव आसा.
पॅरालिम्पीक सर्तीच्या इतिहासांत भारतान अजून मेरेन केल्ली ही सर्वोकृश्ट कामगिरी आसा. टोकियो पॅरालिम्पिकांत भारतान 19 पदकां जिखिल्लीं.
मजगतीं, हरविंदर आनी पुजा हांणी तिरंदाजीच्या मिश्र गटाचे उपांत्यपुर्व फेरयेंत पोलंडाक 6-2 असो हारयलो. पूण, उपांत्य फेरयेंत तांकां इटलीच्या एलिसाबेट्टा मिजनो आनी स्टिफानो ट्रॅविसानी हांणी 6-2 अशा फरकान हारयले. हरविंदर कौलान वैयक्तीक गटांत भांगरा पदक जिखून इतिहास घडयिल्लो. टोकियोंत ताका कांश्या पदकाचेर समाधान मानचें पडिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
