भांगरभूंय | प्रतिनिधी
बंगळूर : दोन दिसां आदीं अपघात जाल्ल्या कन्नड अभिनेतो सूरज कुमार उर्फ ध्रुवाचो एक पांय कापचो पडला. अपघातांत जाल्ल्या घाव्याक लागून जीव वाटावपा खातीर दोतोरांक हो निर्णय घेतलो.
सविस्तर म्हायती प्रमाण, सूरज 24 जुनाक म्हैसूरच्यान उटी वतलो. ट्रॅक्टराक ओव्हरटेक करतना ताची दुचाकी लाॅरीक आपटली. तो गंभीर जखमी जालो. ताका हॉस्पिटलांत दाखल केल्लो. मजगतीं, ताचो जीव वाटावपा खातीर ताचो उजवो पांय कापचो पडलो अशी म्हायती मेळ्ळ्या.
24 वर्सां पिरायेचो सूरज हो निर्माते एस. ए. श्रीनिवास हांचो पूत. ‘भगवान श्रीकृष्ण परमात्मा’ ह्या चित्रपटांतल्यान तो कन्नड सिनेसृश्टींत येवपाचो. कांय कारणांक लागून हें काम बंद जालें. मदीं सूरज ‘रथम’ नांवाच्या आनीक एका सिनेमांत काम करतालो.
सूरजान ‘नॅशनल क्रश’ जाल्ली अभिनेत्री प्रिया प्रकाश वॉरियर हिचे वांगडा एक सिनेमा सायन केल्लो. पूण आतां हे घडणुकेक लागून ती फिल्म पुराय जातली आनी तातूंत सूरज भुमिका करतलो काय हाचेर प्रस्नचिन्न पडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
