कनेक्शन गोंय- हैदराबाद

भांगरभूंय | प्रतिनिधी

येयात, येयात म्हज्या गोंयां येयात अशें उषा आमोणकार हांचें गीत आसा. तातूंत गोंयांतली समाजीक, संस्कृतीक जिणेचीं तासां ओंवल्यांत. तीं अणभवपाक गोंयां येवचें अशें आमंत्रण गीतकार दिता. आतां मात परिस्थिती खूबच बदल्ल्या. गोंय बरेंच मुदार जालां. सैम काबार जायत आयला. लोक झटपट पयशां फाटल्यान लागल्यात. आनीकूय नाका जाल्ल्यो जायत्यो गजाली गोंयांत रुजल्यात. तातूंतली एक म्हणल्यार घुंवळे वखदां. कालूच गोंय आनी हैदराबाद हांचे मजगतचें ड्रग्स तस्करी आनी हवाला वेव्हाराचें रॅकेट उक्तडार आयलां. तेलंगण आनी गोंय पुलिसांनी मेळून ताचेर कारवाय केली. सादारण 50 लाख रुपयांची रोखड वाॅशिंग मशिनांत सांपडल्या. तर हैदराबादांत धरिल्ल्या एका नायजेरियन नागरिका कडल्यान सवाय कोटींचें ड्रग्स जप्त केलां. तो म्हारगीं ड्रग्सां गोंयच्यान हैदराबाद, बंगळुरू, कोची वाठारांत धाडटालो. त्या राज्यांनी मागीर ती ‘सब एजंटां’ वरवीं पातळटालीं. हणजुण, पर्रा, कळंगुटे, शिवोले वाठारांनी रावपी नायजेरियन नागरिकांचो वापर करून तो आनी हेर तें ड्रग्स गिरायकांक पावयताले. पुलिसांक ताच्या चाळीसां वयर गिरायकांचीं नांवां आनी पत्ते मेळ्ळ्यात. म्हणटकच ह्या सगल्यांची चवकशी जातली अशी आस्त. सैमसुंदर गोंय हांगा येवन नाका जाल्ले धंदे करपी परप्रांतीय, विदेशी नागरिकांनी खंय व्हरून दवरलां, ताचो शांत चित्तान नियाळ घेतल्यार परिस्थिती भिवपा सारकी आसा, अशें दिसले बगर रावचेंना.
हो नायजेरियन नागरिक फाटलीं 22 वर्सां गोंयांत येता खंय. तो एकलोच आसचोना. चार नायजेरियनांक अटक जाल्या. ते ताचे वांगडी आसूं येतात. उत्तम सिंग नांवाच्या एकल्याक धरला. तो खंय ड्रग्सा वरवीं मेळिल्ले पयशे हवाला मार्गांतल्यान नायजेरियाक धाडटालो. दोन दिसांनी ताचे कडेन 50 लाख जमिल्ले. म्हणटकच हे माफिया कितली उलाढाल करता आसतले ताचो अदमास करचो. कांय वर्सां पयलीं एका नायजेरियन नागरिकक मरण आयिल्लें तेन्ना ताची कूड पुलीस व्हरतना तांणी पर्वरे ती गाडी आडायिल्ली. येरादारी ठप्प जाल्ली. पुलीस तांकां कुशीक काडपाक भियेताले. बार्देसांतल्या कांय दर्यादेग वाठारांनी सांजच्या साता उपरांत चलयांनी भायर सरपाची माणसुकी ना, अशें वक्तव्य त्याच सुमाराक एकल्यान केल्लें. आयज हातूंत बदल जाला काय ना, तें कळना. पूण ड्रग्साची तस्करी, विक्री मात उणी जावंक ना, हें पुलिसांच्या कामगिरी वयल्यान स्पश्ट दिसता.
पुलिसांनी 2024 वर्सा दर दुसऱ्या दिसा एकल्याक अटक केल्या. तो कसले ना कसले नशेंत आशिल्लो. मागीर तो सोरो जावं वा ड्रग्स. पोरूं 10 कोटी रुपयां परस चड मोलाचें ड्रग्स राज्यभरांत जप्त केलां. कितलें सुटलां तो आंकडो मेळप शक्य ना. एके आंकडेवारी प्रमाण 188 जाणांक धरिल्ले, तातूंत उणेच 54 गोंयकार आशिल्ले. 23 विदेशी नागरीक. गांजो सदांच मेळटा. पूण एकदां सात कोटी मोलाचें ड्रग्स धरिल्ले. अंदूंय वास्को धरलां. कितलें? 43 कोटींचें! कोणाक धरल्यात? हय करबट सांपडलां, शेंवटो मेळना. गोंय- हैदराबाद प्रकरणांत तीग भारतीय दुबावीत आनी नायजेरियन हांचे मदीं ‘युती’ आशिल्ली. सगले मेळून लुट्टाले. तांणी फाटल्या वर्सभरात देडशे कोटीं वयर रुपया हवाला मार्गान नायजेरियाक धाडल्यात असो पुलिसांक दुबाव आसा. गोंयां येवन ते दर्यादेग वा आशिकुशीच्या हाॅटेलांनी रावताले. हो गैरवेव्हार फक्त गोंयां पुरतो मर्यादीत आसचो ना. ताचीं पाळां मुळां जंय- जंय ड्रग्स पार्ट्यो जाता, थंय थंय रिगल्यांत आसतलीं. सगल्याच राज्यांच्या पुलिसांनी एकवटान सोद घेतल्यार आनीक खूब सांगाडे भायर सरतले. लोकप्रतिनिधींनीय हे बाबतींत पुलिसांक सदळ हात दिवपाक जाय.
गोंयांत जायते विद्यार्थी शिक्षणा खातीर येतात. पूण ते नेमके शिकतात काय आनीक कितें करतात, ताची चवकशी कोणे करपाची? अर्थीक गरज म्हूण काॅलेजी उपरांत दुसरे कडेन नोकरी करपाक हरकत ना. पूण गुन्यांवकारी, बेकायदेशीर कामांनी ते घुस्पल्ले नात मूं, हाचो तपास जावप गरजेचें. थोडे नांवां पुरते शिक्षणीक संस्थांनी प्रवेश घेतात. कांय दीस वतात आनी मागीर हे असले धंदे करतात. संबंदीत काॅलेजी कडेन संपर्क केल्यार तांची म्हायती मेळूं येता. विदेशी वेपारी कचेरी, दुतावास हांचे कडेनूय चवकशी जावंक जाय. तांचो व्हिसाय तपासूंक जाय. पर्यटनाच्या नांवार लोक हांगा येतात आनी मागीर बेकायदेशीर कृत्यां करतात जाल्यार तें गोंयां खातीर मारक. गोंयच्या दर्यादेगांचेर जाता तितलो कडक बंदोबस्त दवरल्यार बरो. शिमेरुय जागृत रावूंक जाय. पयशां खातीर वसवशिल्ले सरकारी अधिकारी, कर्मचारी थंय नाकात.
गोंयच्यान नायजेरियाच्यान ड्रग्स येतालें, हवालाचो पयसो थंय वतालो. एकमेकांच्या सांगातान दोनूय देशांतले मूठभर नागरीक हीं देशद्रोही कृती करताले. ड्रग्स घेवप, ते विकप हाचे परिणाम कितें, ते विशीं जागृताय जावंक जाय. खास करून हायस्कूलांनी. भुरग्यांचेर संस्कार करतात, तातूंत होय एक संस्कार आसचो. ड्रग्स ओडप ना, विकप ना, भ्रश्टाचार करप ना. मायभुंये खातीर इतलें करुंयाच.