भांगरभूंय | प्रतिनिधी
पणजी ः राष्ट्रीय तंत्रज्ञान दीस ११ मेक मनयतात. डिजिटल रुपांतराची गती कृत्रीम बुद्धिमत्तेपसून ऑटोमेशन मेरेन वाडत आसा. गोंयांत ही उदरगत दर दिसा शाळेच्या वर्गांत आसूं, गांवांनी आसूं, स्टार्टअपांनी आसूं वा सरकारी सेवांनी आसूं ती दिसून येता.
अंदूंचो विशय “नवनिर्माणा वरवीं शाश्वत, फाल्यांचे सशक्तीकरण” हो गोंय सरकाराच्या म्हायती तंत्रज्ञान, इलॅक्ट्रॉनिक्स आनी संचारण खात्याच्या दृश्टीकोना कडेन जुळपी आसा. गोंयांतल्या गांवगिऱ्या वाठारांनी डिजिटल सेवा मेळप हें एका काळार खूब कठीण आशिल्लें. डिजिटल अंतर उणो करपाच्या यत्नांतलो एक भाग आशिल्ले वाय-फाय हॉटस्पॉट गोंयभर 75 सुवातींनी सक्रीय आसात. आनीक 75 सुवातींनी वाय-फाय हॉटस्पॉटां खातीर काम सुरू आसा.
हर घर फायबर उपक्रमांतल्यान तालुका, पंचायती, सरकारी कार्यालयां आनी घरां मेरेन ऑप्टिकल फायबर केबल (ओएफसी) नेटवर्काचो विस्तार केलां. तेच बरोबर मोबायल टॉवर 4जी आनी 5जी कव्हरेजांत सुदारणा जाता. बीएसएनएल भारत नेट 3.0 खाला सरकारी शाळांक मुफत इंटरनॅट दिता. पंदरा टॉवर्स पयलींच कार्यरत आसात, चड पयसुल्ल्या वाठारांनी लेगीत जोडणी मेळची हे खातीर चड येवजण केल्यात.
स्टार्टअप आनी आयटी प्रमोशन सेल हांणी सुरू केल्लें गोवा ओपन इनोव्हेशन चॅलेंज 2025 पर्यटन, शेती, कोयर वेवस्थापन, नाबार्ड, जीपीएससी आनी उद्देग ह्या सारक्या क्षेत्रांतल्या वास्तवीक आव्हानांचेर काम करपाक स्टार्टअपांक आमंत्रण दिता. हो बदल प्रशासनांतय दिसता. 2017 वर्सा सुरू जाल्ल्या गोवा ऑनलायनान गरजेच्यो सेवा डिजिटल रितीन उपलब्ध करून दिल्यात.
खात्यान एआय संचालित व्हॉट्सअॅप प्लॅटफॉर्म सुरू केला, जाका लागून नागरिकांक 241 सरकारी सेवांचो बेगीन लाव मेळटा. ह्या राष्ट्रीय तंत्रगिन्यान दिसा गोंय नवीन उपक्रमाचेर लक्ष केंद्रीत करता. तेच बरोबर गोंयान दाखोवन दिलां, तंत्रगिन्यान उद्देश आनी लोकां वरवीं समर्थीत करता तेन्ना चड समावेशक आनी शाश्वत फुडाराची बुन्याद घालूंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
