भांगरभूंय | प्रतिनिधी
रस्त्यार सांचिल्ल्या उदकाक लागून वाहन चालकांक त्रास
मडगांव: कदंब बस स्टॅण्डा कुशीच्या रस्त्या वेल्या फुटपाथाचें काम अजून लेगीत सुरू आसा. ह्या कामा वेळार उदक वचपा खातीर योग्य ती वाट दवरूंक नाशिल्ल्यान हांगासरल्या रस्त्या कुशीच्या दुकानांनी ह्या वर्सा पयलेच फावटी उदक आयलें अशी म्हायती दुकानदारांनी दिली. हाचेर संबंदीत खात्या कडल्यान कारवाय करची अशी मागणी केली.
पावसान बिरेस्ताराय मडगांव वाठारांत खवदळ घालो. हाका लागून मार्केटांत येवपी गिरायकांचेरूय परिणाम जाल्ल्याचें विक्रेत्यांनी सांगलें. सुरावले अंडरपास, नावेली अंडरपास हांगा उदक सांचून येरादारीक आडखळ निर्माण जाली. मडगांव रेल्वे स्टेशना मुखा वेलो रस्तो, नावेली शांतीनगरा कडेन वचपी रस्त्यां सयत खूबशे कडेन उदक सांचून उरिल्लें.
दक्षीण गोंय जिल्हो हॉस्पिटलाच्या प्रवेश दाराचेरूय उदकाचो निचरो जायनाशिल्ल्यान उदक सांचून येवपी-वचपी लोकांकूय त्रास जातालो. तशेंच कदंब बस स्टॅण्डा कुशीक डेपोचे वटेन फलोत्पादनाचे भाजयेचें दुकान, भुसारी दुकानां आसात. ह्या रस्त्या वेल्या फुटपाथाचें काम केल्लें आसलें तरी लेगीत गटाराचें काम केल्लें ना. ताचो परिणाम म्हूण दुकानांनी सकाळीं उदक आयलें अशें वासुदेव शेटकार हांणी सांगलें.
जाल्यार सॅड्रीक परेरा हांणी सांगलें, कदंब बस स्टॅण्डा कुशीच्या फुटपाथाचें काम पुराय जायत आसा. तशेंच हाचे पयलीं घाण उदका वाहिनीचें काम करतना गटारांनी माती उडयिल्ल्यान उदकाक वचपा खातीर वाट नाशिल्ल्याचें तांणी सांगलें. थळाव्या प्रशासनान हाची दखल घेवन गटारांतल्या मातयेचो उपसा करून उदकाक वाट करून दिल्यार हो प्रस्न सुट्टलो अशें तांणी म्हणलें.
झाडां मारलीं, कोयर थंयच
मडागांव वाठारांतल्या घातक झाडांचे खांदे मारपाची परवानगी दक्षीण गोंय जिल्होधिकाऱ्यांनी दिल्ली. तेप्रमाण भौशीक बांदकाम खात्यान झाडांचे खांदे मारले. मडगांव पुलीस मुख्यालया कडल्या रस्त्यार मारिल्ले झाडांचे खांदे रोखडेच उबारले. पूण रेल्वे स्टेशन रस्त्या पसून, पावर हावस तशेंच हेर वाठारांतल्या झाडांचे खांदे रस्त्याचे कुशीक फुटपाथार उडयल्यात. हाचो त्रास चलून वचप्यां सयत लोकांक जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
