कदंब गोंयची जीवन वाहिनी

भांगरभूंय | प्रतिनिधी

मुख्यमंत्री : कदंब म्हामंडळान मनयलो वर्धापन दीस

भांगरभूंय । प्रतिनिधी

पणजीः ग्रामीण आनी शार वाठारांक जोडपाक, गोंयचे समाजीक आनी अर्थीक उदरगती खातीर कदंब म्हामंडळाची म्हत्वाची भुमिका आसा. कदंबा ही गोंयची जीवन वाहिनी म्हणपाक कसलीच हरकत ना, अशें मत मुख्यमंत्री डॉ. प्रमोद सावंत हांणी उक्तायलें.

कदंब येरादारी म्हामंडळान पणजी बस स्टॅण्डार आपलो 45वो वर्धापनदीस व्हड उमेदीन मनयलो. ह्या सुवाळ्यांत मुखेल सोयरे म्हूण मुख्यमंत्री डॉ. सावंत उलयताले. ह्या वेळार येरादारी मंत्री मॉवीन गुदिन्हो, कदंब येरादारी म्हामंडळाचे अध्यक्ष उल्हास तुयेंकार, येरादारी खात्याचे संचालक परिमल अभिशेक, कदंब येरादारी म्हामंडळाचे वेवस्थापकी संचालक रोहन कासकार आनी हेर मानेस्त हजर आशिल्ले.

म्हजी बस येवजणे खाला नोंद जाल्ल्या खाजगी बस धनयांक आतां मेरेन सरकारा कडल्यान 2 कोटी रुपयांचो लाव मेळ्ळा. म्हजी बस येवजणेचे सरकारी अनुदान वाडोवपाचो प्रस्ताव सरकारान दवरला. देखून हे येवजणे खाला येवपाक बस धनी जितलो कळाव करतले तितलेंच तांचें लुकसाण जातलें, अशें मुख्यमंत्री डॉ. सावंत हांणी म्हणलें.

सरकार म्हजे बस येवजणे खाला धनयांक दर म्हयन्यांक 18 हजार रुपयांचें अनुदान दिता. तशेंच फुडाराक हें अनुदान 25 हजार मेरेन वाडोवपाचो विचार करता. तशेंच नवी बस घेवपा खातीर सरकार 10 लाख रुपया मेरेनचे अनुदान लेगीत दिता. देखून हाचें- ताचें आयकुचे परस बस धनयांनी म्हजी बस येवजण आस्पावन घेवची, असो उलो मुख्यमंत्री डॉ. सावंत हांणी मारला.

कदंबचे निवृत्त आनी सेवेंत आशिल्ल्या कर्मचाऱ्यांच्या प्रलंबीत थकबाकीचो विचार सरकारान सुरू केला. हे विशीं कदंब येरादारी म्हामंडळाचे अधिकारी सरकारा कडेन फाटपुरवण करतात. सरकारान आतां मेरेन 50 टक्के थकबाकी दिल्या आनी उरिल्ली थकबाकी तीन म्हयन्यां भितर दितले, अशें आस्वासन मुख्यमंत्र्यान दिलें. कदंब ही फायदो जोडपा खातीर न्हय जाल्यार सेवा दिवपा खातीर चलयता, अशें मुख्यमंत्र्यान म्हणलें.

लोकांक चडांत चड फायदो दिवपा खातीर म्हयन्याळो पास आस्पावन घेवपाची गरज आसा. आतां सिंगल कार्ड सगल्या बशींनी चलतलें. स्मार्ट ट्रान्सीट कार्ड ही यंत्रणा कांय दिसां भितर आमी चालीक लायतले. ही यंत्रणा म्हजी बस येवजणेच्या लाभार्थ्यांक आस्पावन घेवपा खातीर आमी यत्न करतात, जे वरवीं ह्यो बशी डिजिटलायज जातल्यो, अशी म्हायती मुख्यमंत्र्यान दिली. सरकार 50 टक्के सूट विद्यार्थी आनी जाण्ट्या लोकांक दिता. 100 टक्के सूट आमी स्वातंत्र्य सैनीक, दिव्यांग, कॅन्सर आनी एचआयव्ही पेशंटांक दितात. म्हयन्याळो पास घेवपी 40 टक्के सामान्य लोकांक लाव मेळटा आनी 70 टक्के लाव हो विद्यार्थ्यांक मेळटा. 26 जानेवारी 2026 मेरेन कदंब म्हामंडळाची पुराय यंत्रणा डिजिटल जातली. अ‍ॅपा वरवीं बशींचें ट्रेकींग जातलें. बस खंय आसा आनी कितल्या वेळा भितर पावताली हें कळटलें, अशी आधुनीक सुविधा प्रवाश्यांक मेळटली, अशी म्हायती येरादारी मंत्री मॉवीन गुदिन्हो हांणी दिली.