भांगरभूंय | प्रतिनिधी
कदंब येरादारी म्हामंडळाच्या वरिश्ठ अधिकाऱ्यांक आस्त
भांगरभूंय । प्रतिनिधी
पणजीः कदंब येरादारी म्हामंडळाच्या कर्मचाऱ्यांचे प्रस्न सोडोवपा खातीर येरादारी संचालनालय आनी मुख्य सचिवा वांगडा वेगवगेळ्यो दोन बसका जाल्यात. कदंब कर्मचाऱ्यांनी मांडिल्ले प्रस्न हे बसकेंत मांडल्यात. सोमार मेरेन कर्मचाऱ्यांचे सगळे प्रस्न सुटावे जावपाची आस्त आसा, अशें कदंब येरादारी म्हामंडळाच्या वरिश्ठ अधिकाऱ्यान सांगलें.
पयलींच्यो मागण्यो सरकारान अजून मेरेन पुराय करूंक ना. हाका लागून कदंब कर्मचारी फुर्योज जाल्यात. ह्यो मागण्यो मान्य करपा खातीर कदंब कर्मचारी संघटणेन कितलीशींच निदर्शनां केलीं. संघटणेन सरकाराक 19 मार्च मेरेनची मुजत दिल्या आनी जर ह्यो मागण्यो मान्य जावंक ना जाल्यार संप करून सगळ्यो बशी बंद उडोवपाची शिटकावणी संघटणेन दिल्या.
हे शिटकावणे उपरांत कदंब म्हामंडळाचे अधिकारी शिटूक जाल्यात आनी हे विशय सोडवपा खातीर बसकांचें सत्र घेवप चालू केलां. पयली बसका बुधवारा येरादारी संचालकान घेतली. त्या वेळार कदंब म्हामंडळाचे वेवस्थापकी संचालक आनी हेर कर्मचारी हजर आशिल्ले. बिरेस्तारा मुखेल सचिवान बसका घेवन येरादारी संचालका कडेन जाल्ले बसकेंत आयिल्ल्या मुद्द्यांचेर चर्चा जाली.
हे विशीं म्हायती दितना कदंब म्हामंडळाचे वरिश्ठ अधिकाऱ्यान सांगलें, येरादारी संचालकान घेतिल्ले बसकेंत कर्मचाऱ्यांचे सगळे मुद्दे मांडल्यात. उपरांत ह्या मुद्द्यांची फाटपुरवण करपा खातीर गोंयच्या मुखेल सचिवां कडेन बसका जाली.
मुखेल सचिवा कडेन जाल्ले बसकेंत सकारात्मक चर्चा जाल्या. जे जे विशय कदंब कर्मचारी संघटणेन मांडल्यात त्या सगळ्या विशयांचेर चर्चा जाल्या. ह्या सगळ्या मुद्द्यांचेर तात्वीक निर्णय घेवन हे विशींची नवी बसका परतून येरादारी संचालका कडेन घेवपाचे निर्देश दिल्यात. सोमारा परतून एक बसका येरादारी संचालका कडेन जावन हे बसकेंत हे सगळे विशय जाग्यार पडटले, अशी आमकां आस्त आसा, अशें अधिकाऱ्यान म्हणलें.
जानेवारी 2016 ते जानेवारी 2018 मेरेन 34 म्हयन्यांची उरल्ली थकबाकी दिवची, डिसेंबर 2009 सावन पीएफ 12 टक्यां वयल्यान 10 टक्क्यांचेर हाडिल्लो तो परतून 12 टक्क्यांचेर हाडचो, कदंबाचे सुमार 350 कामगार जे 7 ते 10 वर्सां दिसावड्यार काम करतात तांकां सेवेंत आस्पावन घेवचे, अश्यो मागण्यो कदंब कर्मचाऱ्यांनी केल्यात. मुख्यमंत्र्यान ह्यो मागण्यो पुराय करपाचें आस्वासन दिल्लें, पूण तें आस्वासन अजून मेरेन पुराय जावंक नाशिल्ल्यान 19 मार्चाक गोंयभर संप करपाची शिटकावणी कदंब कर्मचाऱ्यांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
