भांगरभूंय | प्रतिनिधी
सकाळ फुडे खबरांपत्र वाचपाची संवय. सकाळची सुरवात मोबायलार ई- पेपर वाचून जाली. राज्यांत किदें चल्लां हें पळोवपाक फेसबुक उक्तो केलो. एक सुखद बातमी वाचपाक मेळ्ळी. समाज माध्यमाचेर तशे चडशे लोक वैयक्तिक गजालीच पोस्ट करतात, पुण हो पोस्ट प्रसार माध्यमान प्रसिद्ध केल्ली बातमी आशिल्ली. मनीस आज सुवार्थी जायत चल्ला. अशें हे दुनियेत सत्कार्याचो दिश्टावो घडोवपी बातमी वाचून बरें दिसलें. मनिसपण जिवें आसा हें समजलें.
कदंब महामंडळाची सेवा गोंय सरकाराच्या विवीध उपक्रमा मदली एक. सकाळची ती खबर. कामाचे धांवपळींतले प्रवाशी. पावसाच्या वातावरणांत झडझडटालो वारो भायर. कदंब बसींत पत्रादेवी ते मडगाव प्रवास करपी एक जाण्टे बायलेची प्रकृती बिघडली. बस ड्रायव्हर अशोक हरिजन आनी कंडक्टर संकेत कारवारकार हांणी ते अस्तुरेक म्हापशेंच्या जिल्हो हाॅस्पिटलांत व्हेली.
ती बायल उगवे वा तोर्सें गांवांतली आसुंये. तिचे वांगडा घरचे आसले. तिचो पूत आनी सुन तेच बसींत प्रवास करतालीं. अचकीत धुळेरांत तिची भलायकी इबाडली. बोवाळ जालो. 108 आपयात. तेन्ना मुखा वयल्या सिटार बशिल्ल्या दोग तरणाट्यांनी सगळ्यांक शांत केले. ते संदीप हळदणकार आनी केशव शेट्ये. तांणी 108 येता म्हणसर चड कळाव जातलो, आमी तिका हेच बसीन हाॅस्पिटलांत व्हरुया अशें सुचयलें. सगल्यांक कामांक वेळार पावपाक उशीर जावपाची शक्यता आसली. पूण कामाक वेळार पावपा परस कोणाचो तरी जीव वाचोवप म्हत्वाचें, अशें सगल्यांनी चिंतलें.
संदिप आनी केशव हांणी वेळ व्हगडाय नासतना अशोक व संकेत हांकां सांगलें की बस सरळ जिल्हो हाॅस्पिटला कडेन बस व्हरया. घटनेचे गांभीर्य समजून तांणी मान्यताय दिली. कर्मचाऱ्यांक आनी बसींत प्रवास करप्यांक वालोर.जर 108 ची वाट पळयत बशिल्ले जाल्यार अर्द वर तरी वचपाचें आनी ते जाण्टेलेचो जीव वांचोवप कठीण जावपाचें.
भारतांत समाजीक वावराची गिरेस्त परंपरा आसा. बऱ्याच लोकांनी आपलें जिवीत दुसऱ्याचे सेवे खातीर समर्पित केलां. जायत्या जाणांक मदत केल्या, समाजीक योगदान दिलां. निर्धारान तांणी धोरण, समुदाय उदरगत आनी स्वताचो विचार हातूंत बदल करून समाजांत बदल घडोवन हाडला, जो कांय प्रमाणांत क्रांतीकारी जाला. ह्या व्यक्तींक नव्या भारताचें लक्षण मानूं येता, जंय समानताय आनी समृद्धी आसूं येता. भारतांतले १० नामनेचे समाजसेवकांचीं नांवां घेवचीं जाल्यार कैलाश सत्यार्थी, अण्णा हजारे, इला भट, वंदना शिव, सालुमरादा थिम्मक्का, मेधा पाटकार.
समाजसेवक हे समाजीक प्रस्न सोडोवपी सुपरहीरो. देश, विदेश पातळवेल्यो समस्या ते सुटाव्यो करतात. सामान्य लोकां मदीं अश्यो कांय व्यक्ती आसतात ज्यो गरजेवंतांक निसुवार्थी भावनेन मदत करपाक मुखार येतात. जाचे बरे आदर्श उदाहरण म्हळ्यार संदिप, संकेत, अशोक आनी केशव. हे गजालीक दर्शवपी एक श्लोक याद जाता. “सर्वे भवन्तु सुखिनः सर्वे सन्तु निरामयाः सर्वे भद्राणि पश्यन्तु मा कश्चिद्दुःखभाग्भवेत्॥” अर्थ – सगळे सुखी जावं, सगळे रोगमुक्त जावं, सगळ्यांक शुभ/ उदात्त सत्य पळोवचें, कोणाक दुख्ख भोगचें न्हय.
हें पाठांतल्यान समाजीक वावराच्या संदर्भांत चड करून उल्लेख केल्लो एक संस्कृत श्लोक .”सगले सुखी जावं, सगळे दुयेंस मुक्त जावं, शुभ आसा तें सगळ्यांनी पळोवचें, कोणाक त्रास जावचे न्हय.” समाजांतल्या सगळ्या व्यक्तींच्या बरेपणाक आनी सुखाक चालना दिवन समाजीक वावराचें सार ह्या श्लोकांत आस्पावता. हो श्लोक आनी जाल्ली घटना आमकां विचारमंथन करपाक लावपी. समाजीक जाणिीव दाखोवपी सामान्यांतले सुपरहीरो.
कात्यायनी घाटवळ
9975293808
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
