भांगरभूंय | प्रतिनिधी
कदंब येरादारी म्हामंडळ सुरू जालें 1980 त. वर्सां उलगत रावलीं, पूण लुकसाणाचो सोनसडो वाडतूच रावलो. बऱ्याच उसरां, 2012 त तो उणो जावचो म्हूण म्हामंडळान प्रवाशां खातीर पास पद्दत सुरू केली. सामान्य प्रवाशां खातीर म्हयन्याचे तिकेटीचेर 40 टक्के सवलत. जाल्यार शिकपी विद्यार्थी आनी ज्येश्ठ नागरिकां खातीर 70 टक्के सवलत. कोरोना उपरांतच्या काळांत हे तिकेट सवलतीच्या टक्केवारींत ‘कदंबा’न इल्लो बदल केलो, पूण प्रवाशांचे संख्येंत तसो फरक पडलो ना. बऱ्योच खाजगी बशी बंद जाल्ल्यो, ताचोय फायदो म्हामंडळाक जालो. हे पास सेवेचो म्हामंडळाक फायदो जालो, हें तांचे अधिकारीच मान्य करतात. आतां म्हामंडळान व्हडलो निर्णय घेतला. 1 जुलयाच्यान तो लागू जातलो. राज्य आनी केंद्र सरकाराचीं खातीं, म्हामंडळां, स्वायत्त संस्था, सरकारी अनुदान घेवपी संस्था (हातूंत शिक्षणीक संस्थाय आयल्यो) हांगा काम करपी कर्मचाऱ्यांक हाचे मुखार सवलतीच्या पास सेवेचो लाव मेळचो ना. तसो आदेश म्हामंडळान मंगळारा काडला. क्रांती दिसा घेतिल्लो हो निर्णय कदंब म्हामंडळांत क्रांती घडोवन हाडटा काय तो लुकसाणाचो थारता, तें येवपी काळ सांगतलो. तश्यो सदच्या प्रवाशांक तिकेटींत सवलत दिवपी खाजगी बशी आसात, पूण तांचो आंकडो खूबच उणो जाला. एप्रील 2020 सावन पणजेच्यान दनपरां उपरांत रातची निमाणी कदंब बस वच मेरेन मुळगांव, दिवचले वचपाक एकूय खाजगी बस ना खंय. येरादारी खात्याक घडये हें खबर आसचें ना. नाजाल्यार तें कारवाय करपाचें!!
नोकरेंत कायम जाल्ल्या सरकारी कर्मचाऱ्यांक बरो पगार मेळटा. मूळ पगारांत प्रवास भत्तोय दितात. ताकाच लागून कदंब म्हामंडळान तांकां पास सेवेंतल्यान भायर दवरल्यात. साडेतीन हजारां वयर सरकारी कर्मचारी पास सेवेचो लाव घेतात. कारण सरकारी कार्यालयांक सुटी आसता तेन्ना थोड्यो कदंब बशी बंद आसतात, उरिल्ल्यांचीं अर्दीं सिटां रिकामी आसतात. कदंब बशी आनी पास सेवा फक्त सरकारी कर्मचाऱ्यांक बरी, अशें हेर प्रवासी उलयतात. ह्या ‘धाडसी’ निर्णयाक लागून म्हामंडळाची खंय वर्साक 18 लाख रुपया बचत जातली. सध्या पास सेवेचो लाव घेवपी एकान एक सरकारी कर्मचारी 1 जुलया उपरांतूय कदंबांतल्यान प्रवास करीत जाल्यारूच ही बचत जातली. जर तांणी खाजगी बस लागीं केली जाल्यार सध्या मेळटात ताचे परस उणे दुडू मेळटले. सदच्या प्रवाशांक तिकेटींत 30- 40 टक्के सवलत दिवपी खाजगी बशी आसात. ओगीच हे प्रवासी ती बस येयसर ताटकळत उबे रावनात. 1 जुलयाच्यान येरादारी खातें फुडाकार घेवन खाजगी बशींचो आंकडो वाडयतलें, अशी आस्त. कारण कदंब म्हामंडळाच्या ह्या निर्णयाक लागून येरादारी पद्दतींत बदल जावपाचो आसा. मनोहर पर्रीकार मुख्यमंत्री आसतना सरकारी कर्मचाऱ्यांक मेळपी ही पास सेवा बंद करपाचो निर्णय जावपाचो. पूण ऐनवेळार तो रद्द जालो. कारण खाजगी येरादारी वयलो ताण वाडूं येता, अशें तेन्ना कांय जाणांचें मत आशिल्लें.
ह्या पास सेवा रद्द करपाच्या निर्णयाचेर सरकारी कर्मचाऱ्यांच्यो प्रतिक्रिया अजून येवंक नात. तांच्या कर्मचारी संघटणेक हें मान्य ना. तरीय सरकारी प्रवासी मनांतल्यान बेजार जाल्या आसतलेच. टक्केवारींत बदल जाल्ल्यान आतां तिकेटींत पयलीं सारकी सवलत मेळना आसली तरी बरेच सरकारी कर्मचारी पास सेवा घेतात. विद्यार्थी उणे जाल्यात. कारण प्रत्येक शाळेक, हायर सेकंडरीक बालरथ दिल्यात. हे पास सेवेक लागून दिव्यांग, ज्येश्ठ नागरीक मुद्दाम कदंब बशीची वाट पळयतात, तेंय म्हामंडळान मतींत घेवपाक जाय.
दोनूय विमानतळांचेर सेवा दिवपी कदंब बशी पळयत तेन्ना रिकामी दिसतात, अशें कांय नेटिझन्स म्हणटात. ह्या व्हडल्या बशीं बदला मिनीबशी सुरू करप शक्य ना? इलेक्ट्रीक एसी बशी आसात, त्यो गडगंज आसात, म्हणटकच गांवांतल्या ल्हान रस्त्यांचेर त्यो चलोवप त्रासाचें थारूं येता. सध्या तरी त्यो मुखेल रस्त्याचेरूच धांवतात. ताची तिकेट पांच रुपया चड आसली तरी बरेच प्रवासी ते बशींत वचप पसंत करतात. मात साध्या कदंब बशी परस तिका उणेंच अर्द वर चड लागता. कांय गांवांनी व्हडल्यो बशी वतात, त्योय बरेच फावटी रिकामी आसतात. सांगपाचो हेतू येरादारीचो पुराय अभ्यास करून खंयचो मार्ग फायद्याचो, खंयच्या मार्गार उणे प्रवासी आसतात, तें कदंब अधिकाऱ्यांक खबर आसपाक जाय. हांगा एक बस भरतली इतले प्रवासी पणजी बसस्टॅण्डार आसतात, तेन्ना कदंब म्हामंडळा कडेन तांकां दिवपाक जादा बस, कंडक्टर, ड्रायव्हर नासता. कदंबान एक वेगळो निर्णय घेतला, ताचो तांकां खरेंच फायदो जाता काय लुकसाण, खाजगी बशींक तो बऱ्याक पडटा, सरकारी कर्मचारी कितें प्रतिक्रिया दितात काय हो निर्णयूय रद्द जाता…. तें पळोवपाचें. 1 जुलय लागीं पावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
