कदंबाचें धाडस

भांगरभूंय | प्रतिनिधी

कदंब म्हामंडळान खाजगी बशी भाड्यान घेवपाचें थारायलां, ती बरी गजाल. मात विस्कटिल्ली घडी पयलीं निटायेर घालची पडटली.

कदंब येरादारी म्हामंडळान धाडशी निर्णय घेतला, तो म्हणल्यार खाजगी बशी भाड्यान घेवपाचो. ह्यो बशी वराराक न्हय, तर शाळांक बालरथ म्हूण दितले. निदान चडश्यो बशी ह्याच कामाक लायतले, अशें म्हामंडळाच्या अध्यक्षान सांगलां. अजून 100 वयर शाळांक बालरथ जाय. तांणी तशी मागणी केल्ली. बालरथ म्हूण मिनीबस वापरतात. तेन्ना व्हडली बस आसा त्या बसधनयांचें कितें? डिझेल, ड्रायव्हराचो खर्च आनी बशीची देशभाल करप ही बसधनयांची जापसालदारकी अशें म्हामंडळान स्पश्ट केलां. किलोमिटरा फाटल्यान थारावीक रक्कम दितले. ती कितली तें अजून थारूंक ना. म्हणटकच वाटाघाटी जातल्यो. बसधनयांनी, तांचे संघटनेन संपर्क सादचो असो उलो म्हामंडळान मारला. ताका सगले उत्स्फूर्तपणान तेंको दितात काय जांचे कडेन जादा बशी आसात, तेच वेवसायीक मुखार सरतात, तें पळोवपाचें.
कदंब येरादारी म्हामंडळ लुकसाणेंत चलता. कांय वेळार तें फायद्यांत येता, पूण आदलें लुकसाण जाल्ल्या फायद्या परस कितलेशेच पटीन चड आसता. कांय वर्सां पयलीं खाजगी बसधनी संघटनेन कदंब म्हामंडळ आपणाक चलोवपाक दिवचें, अशी जाहीर मागणी केल्ली. आमी तें कांय म्हयन्यां भितर फायद्यांत हाडून दाखयतां, असोय दावो तांणी केल्लो. उपरांत कोरोना घुसलो आनी सगलें आरत्याचें परतें जालें. कदंब म्हामंडळान खाजगी बशी चलोवपाक घेवच्यो, अशी मागणी बसधनयांनी केली. आतां त्यो बशी चलोवपाक घेवपाचो प्रस्ताव म्हामंडळान मुखार दवरला. सरकाराचीय ताका संमती आसा. मात किलोमिटरा फाटल्यान फावो तितले पयशे मेळना जाल्यार हो प्रस्ताव कुशीक पडूं येता. करोनाक लागून येरादारी पॅटर्न बदल्ला. आतां बशींनी चडश्यो बायलोच दिसतात. त्योय सरकारी कर्मचारी. उरिल्ले थोडे दादले, ज्येश्ठ नागरीक आनी भायलो मजूर वर्ग. 15- 20 किलोमिटर अंतराचेर कामाक वचपी सगलेच आतां स्वताचें वाहन वापरूंक लागल्यात. कोरोना काळांत बऱ्योच बशी बंद जाल्यात, त्यो खाजगी कंपनींक वा हेर कडेन चलतात. कोरोना सोंपलो तरी बऱ्योच बशी सुरू जावंक नात. बसधनी म्हणटात, प्रवाशी नात. प्रवाशी म्हणटात, बशी नात. देखून सध्या चलतात त्यो मेजक्योच खाजगी, कदंब बशी सकाळ, सांजवेळार भरिल्ल्यो आसतात. कांय मार्गांचेर पणजेच्यान रातीं 7.40 मेरेन खाजगी बशी आशिल्ल्यो. सध्या थंय पांचां उपरांत एकूय खाजगी बस ना. कदंब म्हामंडळाच्या अध्यक्षान हाचो अभ्यास करपाक जाय. धपको दिवपी म्हायती भायर सरतली. खंय बशींची गरज आसा. खंयच्यो बशी दांडी मारता, खंयच्यो भरून ओत्ता, खंयच्यो रिकाम्यो धांवतात, दोन वर्सां पयलींच्या मार्गांचेर आशिल्ल्यो बशी आसात काय बंद जाल्यात…. हाचो अभ्यास म्हामंडळान केन्ना केला? कदंब फायद्यांत कशें हाडपाचें हाचो सल्लो दिवपाक दोन वर्सां पयलीं कांय तरणाटे मुखार सरिल्ले. ताचें फक्त आयकून घेवपाक कितें जाल्लें?
कदंब म्हामंडळान आतां पास येवजणेच्या तिकेट सवलतींत बदल केला. ही येवजण बालरथ वापरिनात, अश्या विद्यार्थ्यां खातीर, ज्येश्ठ नागरिकां खातीर चड फायद्याची आसा. पास येवजण आसा, म्हूण कदंब फायद्यांत आसा, अशें कांय जाणांचें मत. खरें तें. पूण कुरीयर सेवा, आंतरराज्य येरादारी, पर्यटन थळ सहली अशा मार्गान चड येणावळ जोडूं येता. जायरातीं वरवींय पयसो करूं येता. तंबाकू, गुटख्याच्यो मात जायराती वापरच्यो न्हय! म्हामंडळान देडशीं इलेक्ट्रीक बशी हाडपाचें थारायलां. सध्या 50 बशी आसात. पूण ह्यो बशी म्हामंडळाचे मालकीच्यो काय भाड्यान चलतात? कारण फाटीं येणावळी परस भाडेंच चड जालां, अशी खबर आयिल्ली. अशा एसी बशींची तिकेट पांच रुपया वाडयली जाल्यारुय प्रवासी येतले, पूण त्यो फायद्यांत चलतल्योच हाची खात्री दिवं नज.
कदंब म्हामंडळान खाजगी बशी भाड्यान घेवपाचें थारायलां, ती बरी गजाल. मात विस्कटिल्ली घडी पयलीं निटायेर घालची पडटली. म्हापशें -पणजी, मडगांव- पणजी मार्गाचेर शटल सेवा चलता. तरीय प्रवाशांक बशीची वाट पळयत ताटकळत रावचें पडटा. खास करून म्हापशें बसस्थानकाचेर वाळपय, पेडणेंच्यान कदंब बस आयली काय प्रवाशांच्या घिट्टी पडटात. हाचे वयल्यान शटल सेवा सारकी ना, हें कोणूय सांगतलो. कदंब म्हामंडळान आपूण सध्या दिता त्यो सुविधा जाग्यार घालपाक जाय. मागीरुच नव्यो येवजण्यो हातांत घेवंक जाय, अशें कोणी म्हणलें जाल्यार वायट धरपाची गरज ना.