भांगरभूंय | प्रतिनिधी
2022-23 त 5.89 कोटींचो फायदो
भांगरभूंय । प्रतिनिदी
पणजी : गोंयांतले भौशीक येरादारी वेवस्थेंत म्हत्वाची भुमिका करपी कदंब म्हामंडळ अर्थीक नदरेन ल्हवू ल्हवू घटमूट जाता. 2022-23 त म्हामंडळान पयलेच खेपे सुमार 5.89 कोटींचो फायदो जोडलो. ते उपरांत 2023-24 त म्हामंडळाक सुमार 2.66 कोटींचें लुकसाण सोंसचें पडलें. पूण लुकसाणीचो आंकडो उणो जायत आशिल्ल्यान म्हामंडळ अर्थीक नदरेन सावरता, अशें दिसून आयलां.
म्हामंडळान कांय दिसां आदीं जारी केल्ल्या अहवालांतल्यान फाटल्या पांच वर्सांत म्हामंडळाचें जाल्लें लुकसाण आनी फायद्या संबंदांतली आंकडेवारी सादर केल्या. तातूंतल्यान ही म्हायती मुखार आयल्या.
2019-20 त म्हामंडळाक सुमार 12.68 कोटींचें लुकसाण सोंसचें पडिल्लें. 2020-21 त लुकसाणीचो आंकडो उणो जालो. त्या वर्सा सुमार 7.66 कोटींचें लुकसाण जालें. 2021-22 फक्त 83 लाखांचें लुकसाण जालें. ते उपरांत 2022-23 त मात पयलेच खेपे म्हामंडळ फायद्यांत आयलें. त्या वर्सा म्हामंडळाक सुमार 5.89 कोटींचो फायदो जालो. 2023-24 त मात सुमार 2.65 कोटींचें लुकसाण जालें, अशें आंकडेवारींतल्यान दिसून येता. मजगतीं, आतां मेरेन सदांच लुकसाणींत चलपी कदंब म्हामंडळ हाचे मुखार फायद्यांत येवचें, हे खातीर गोंय सरकारा कडल्यान विवीध तरेचे यत्न करतात. केंद्र सरकारा कडल्यान चडांत चड इलेक्ट्रीक बशी मेळोवन ताचे कडेन लोकांक आकर्शीत करतात. ताका लागून फुडल्या काळांत म्हामंडळ निश्चीत फायद्यांत येतलें, असो विस्वास म्हामंडलाच्या अधिकाऱ्यांनी उक्तायला.
फाटल्या दोन वर्सांत 98 बशींची खरेदी
कदंब म्हामंडळान 2019 ते 2023 ह्या काळांत नव्यो बशी खरेदी करूंक नाशिल्ल्यो. पूण 2023-24 आनी 2024-25 ह्या दोन वर्सांच्या काळांत 98 बशी खरेदी केल्यात. ते खातीर सुमार 84.68 कोटीं रुपया खर्च केल्यात, अशें अहवालांतले आंकडेवारींतल्यान दिसता.
चार वर्सांत 303 बशी वतल्यो कावलाक
म्हामंडळाच्यो खूबश्यो बशी 15 वर्सां पुराय जावपाचे वाटेर आसात. 15 वर्सां पुराय जाल्ल्यो गाडयो कावलाक काडच्यो, अशें निर्देश केंद्र सरकारान दिल्यात. ताका लागून 2025 ते 2028 ह्या चार वर्सांच्या काळांत म्हामंडळाच्यो 303 बशी कावलाक काडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
