भांगरभूंय | प्रतिनिधी
खंयचोय उद्देग हो फायद्यांत चलपाक जाय. तो तसो चलतलोच हाची खात्री नासता. पूण, ते नदरेन ताच्या धनयान, तातूंत काम करपी अधिकारी, कर्मचाऱ्यांनी आपले परीन प्रामाणीकपणान कश्ट करपाक जाय. आपणाक शक्य तितलें योगदान दिवपाक जाय. वेगळ्योवेगळ्यो कल्पना, उपक्रम, येवजण्यो चालीक लावन उद्देग फायद्यांत कसो येतलो, निदान लुकसाण जावचें ना, हाचेर भर दिवपाक जाय. हें जेन्ना जायना तेन्ना तो उद्देग ल्हवू ल्हवू बावता आनी नकळटां ताच्यो पाकळ्यो झडटात. दोन दिसां पयलीं एके कार्यावळींत ‘प्रवाशांचें हीत पळयता म्हणूनच कदंब म्हामंडळ लुकसाणांत चलता. दरवर्सा सरकारा कडल्यान निधी घेवचो पडटा’, अशी खंत म्हामंडळाचे अध्यक्ष, आमदार उल्हास तुयेंकार हांणी उक्तायली. हे घडयेक पसून कदंबाक पगार घालपाक मेळचो म्हूण सरकार दर म्हयन्याक 9 कोटी रुपया दिता, अशेंय तांणी स्पश्ट केलें. हाचो अर्थ 43 वर्सां पिरायेचें कदंब म्हामंडळ अजून स्वताच्या पांयाचेर उबें रावंक ना.
दसऱ्याच्या म्हुर्तार 1980 वर्सा कदंब येरादारी मंडळ जीडीएक्स 1 क्रमांकाचे गाडयेन सुरू जालें. त्या आनी ताच्या पयलींच्या काळांत खाजगी बसधनयांचो राज्यांतले पुराय येरादारीचेर शेक आशिल्लो. काॅलेजींत वचपी विद्यार्थ्यांक बस कंडक्टर अर्दी तिकेट दिना म्हूण तेन्ना व्हडलें आंदोलनूय जाल्लें. त्या काळार शशिकलाताई मुख्यमंत्री. उपरांत काँग्रेस सरकार सत्तेर आयलें आनी मुख्यमंत्री प्रतापसिंह राणे हांणी रोखडेंच कदंब म्हामंडळ स्थापन केलें. जंय फायदो ना, अशा मार्गांचेर पसून कदंबान गाडयो चलयल्यो. अजूनय चलयता. सुरवातेक सावन म्हामंडळाक कुचकुचीत म्हणटात तसो फायदो जालोच ना. मदीं 1- 2 वर्सां तें फायद्यांत आयिल्लें, अशें कांय जाण म्हणटात! तें कितेंय आसलें तरी कदंबान गोंयच्या समाजीक मळाचेर क्रांती केल्या. आयज गांवगिऱ्या वाठारांतले चले, चलयो शिक्षणा खातीर, नोकरे खातीर भोंवतात, कश्टकरी समाजांतल्यो विक्रेत्यो बायलो बाजारांत वतात हातूंत कदंब म्हामंडळाचें मळबा येदें योगदान आसा, हें कडवो विरोधक पसून न्हयकारपाक शकना. आतांचे पिळगेक घडये आदलें कांय खबर नासत. पूण कोरोना आनी उपरांतच्या काळांत गोंयचे येरादारीची शीर (रक्तवाहिनी) तंदुरुस्त दवरली, ती कदंबानूच, निदान हें तरी खबर आसतलें!!
कदंब म्हामंडळान स्वता कडेन सेवा कंपनी म्हूण पळोवचेंच, पूण उद्देग म्हूणय पळोवपाची गरज आसा. नाजाल्यार तें फायद्यांत येवचेंच ना. कदंबांत भ्रश्टाचार चलता, तो खंय चलता, ताका आळाबंद हाडपाक कितें करपाक जाय, कदंबा फायद्यांत हाडपाक कितें जाय…. हें सांगपाची कांय अभियंत्यांची तयारी आशिल्ली. तांणी फक्त तीन म्हयने म्हामंडळ आमचे देखरेखी खाला दियात, अशेंय म्हणिल्लें. मात म्हामंडळ आनी सरकार पक्षांतल्या कोणेच वेळ दिवंक ना, अशें तांणी म्हणिल्लें. हाका चार वर्सां जाल्यांत आसतलीं. मनोहर पर्रीकार आसतनाची ही गजाल. वास्तवीक त्या तरणाट्यांनी कदंब म्हामंडळ फायद्यांत हाडपाक कितें उपाय सांगल्यात, ते आयकून घेवपाक जाय आशिल्ले वा तांणी दिल्लो अहवाल चालीक लावपाचो.
सध्या कांय गांवांनी रिकामी व्हडल्यो कदंब बसी चलतात, थंय मिनीबसी घालूं येतात. पोरण्या बशींच्या जाग्यार नव्यो बशी घालूं येतात. आपल्या ड्रायव्हर, कंडक्टरां कडल्यान बशी फायद्यांत कश्यो हाडच्यो ताचेर विचार घेवं येतात. कदंब बशींतल्यान सोऱ्याची तस्करी जाता, दुसऱ्या राज्यांतल्यान कुरियर सेवे भशेन सामान हाडटात, व्हरतात, ताचे पयशे कदंब म्हामंडळाक मेळचे सोडून भलतेच कडेन वतात, डिझॅल, टायर भायले भायर गायब जातात, अशे जायते आरोप जातात. हालींच तेलंगणांत एक ड्रायव्हर आनी कंडक्टर सोरो व्हरतना सांपडले. तांकां निलंबीत केल्यात. पूण हें कितलो तेंप चलतालें, तांचे भशेन आनिकूय कोण तशें करता ह्या प्रस्नांच्यो जापो सोदच्यो पडटल्यो. आतां पणजी सीटी बशींच्या जाग्यार कदंबाच्यो एसी बसी येतल्यो. म्हणजे सेवेचो विस्तार जातलो. अर्थीक वजें वाडटलें. ह्यो बशी ल्हान काय सध्या आसा तसल्योच एसी तें कळना. 15 वर्सां जाल्ल्यो खाजगी बशी बंद जातल्यो. जावंक नात, तांकां वेगळे मार्ग दितले आनी पणजी कदंब म्हामंडळाच्या ताब्यांत येतली. ही सीटी बस सेवा फायद्यांत चलूं येता. एसी बशींक प्रवाशांचो विरोध ना. पूण मिनीबशी चड फायद्याच्यो थारतल्यो. कदंब ही गोंयकारांची स्वताची येरादारी सेवा. तिका आतां फायद्यांत हाडुयाच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
