भांगरभूंय | प्रतिनिधी
कदंब येरादारी म्हामंडळाक आतां चार- साडेचार म्हयन्यांनी 44 वर्सां पुराय जातलीं. ह्या काळांत एखादो आडवाद सोडल्यार ही सेवा केन्नाच फायद्यांत येवंक ना. अर्थांत हाचे फाटल्यान बरींच कारणां आसात. ताचेर उपाय काडपाची कोणाचीच व्हडलीशी इत्सा नाशिल्ल्यान लुकसाणेचो हो हांडो केन्नाच रिकामो जाल्लो दिसूंक ना. दरवर्सा नव्यो – नव्यो बशी घेवपाची घोशणा मात जाता. अर्थांत त्यो येतात काय नात, तेंय प्रवाशांक कळना. स्क्रॅप धोरणाक लागून कदंब म्हामंडळाच्या बशींचो आंकडो देंवता. तातूंत बशींची मागणी वाडल्या. हाचो परिणाम येरादारीचेर जाला, अशें खुद्द म्हामंडळाचे अध्यक्ष म्हणटात.
येरादारी जाग्यार घालपाचें काम आतां एकल्या कदंबाकूच करचें पडटलें. कारण खाजगी बसींचो आंकडो देंवता. उरिल्ल्यो सरकार ताब्यांत घेवपाचें आसा. ते विशींची उलोवणी चलतात. गाडी कावलाक काडपाच्या 2021 च्या केंद्र सरकाराच्या धोरणा प्रमाण 15 वर्सां जाल्ल्यो बशी आतां कुशीक काडच्यो पडटात. ह्या स्क्रॅप धोरणाक लागून बरे स्थितींत आशिल्ल्यो 50 बशी कदंबाक कावलाक काडच्यो पडल्यो. ताका लागून दुसऱ्या रस्त्यां वयल्यो उणें प्रवासी आशिल्ल्यो बसी बंद करून त्यो ह्या बशींच्या जाग्यार चलोवच्यो पडल्यो. ह्या धोरणाक लागून कदंब बसींचेर ताण आयला, तशेंच लुकसाणूय जालां. सध्या कदंबा कडेन सादारण 650 वयर बशी आसात. तातूंतल्यो कांय इलेक्ट्रीक. दरवर्सा उण्योच 30 तरी बसी स्क्रॅपाक वतात. म्हामंडळा कडेन 2000 कर्मचारी आसात. तांचो पगार दिवपाक खंय म्हयन्याक उणेच 9 कोटी रुपया खर्च जातात. म्हणटकच कदंब म्हामंडळ चलोवप ही तारे वयली कसरतूच थारल्या. अर्थांत गैरकारभार, भ्रश्टाचार ना जायत जाल्यार कदंबाक बरे दीस दिसूं येतात. कांय तरणाट्यांनी ते विशीं फुडाकार घेवन आमी म्हामंडळ फायद्यांत कशें हाडपाचें तें सांगतात, अशें कांय वर्सां पयलीं जाहीर केल्लें. मात, तांचे आयकुपाक कोण मुखार येवंक नात.
पणजी स्मार्ट सिटींत सध्या प्रवास करपी 38 खाजगी बशी (पंदरा वर्सां पुराय जाल्ल्यो.) काडून ताच्या जाग्यार कदंबाच्यो 48 इलेक्ट्रीक बसी सुरू करपाचो निर्णय सरकारान घेतला. स्मार्ट सिटीचें काम सोंपतकच (केन्ना सोंपतलें काय?) ही शारांतर्गत बससेवा सुरू जातली. ज्या खाजगी बसींक 15 वर्सां जावंक नात, तांकां वेगळे मार्ग दितले. हे विशीं कदंब म्हामंडळ आनी खाजगी बसधनयां मदीं भासाभास चलता.
शारांत बसस्टाॅप उबारपाचें काम पूर्ण जालां. मात ते भलतेच कडेन आसात, असो प्रवाशांचो आरोप. तातूंत पावसाची ल्हान दडक पसून आयल्यार प्रवासी चिप्प भिजतलो. भितर बसपाक जी वेवस्था केल्या ती ल्हान भुरगीं, ज्येश्ठ नागरिकांक फावोशी ना. बसल्यार निसरून पडपाची चड भिरांत. पूण थंय बाकडेय घाल्यार भिकारी, बेबदे ताचेर दिसरात न्हिदतले ही भिरांत. कांय बसस्टाॅपांचेर तर बिराडां पसून पळोवंक मेळटात. म्हजी बस येवजणेक फक्त दक्षीण गोंयांत प्रतिसाद मेळ्ळा. सध्या 66 बसी मडगांवच्यान काणकोण, कुडचडें, सांगें वाठारांत वतात. दक्षीणे प्रमाणूच उत्तरेंतूय हे येवजणेक बरो प्रतिसाद मेळटलो, हे खातीर म्हामंडळान यत्न करूं येतात. खरें म्हणल्यार कोरोना काळांत आनी उपरांत गोंयची येरादारी पुराय बदलून गेल्या. खाजगी गाडयांचो आंकडो खूबच वाडला. आरटीओन कोरोना पयलीं कितल्यो बसी चलताल्यो आनी आतां जून 2024 त कितल्यो बसी चलतात, ताचो आंकडो जाहीर करपाक जाय. खंयच्यो बसी बंद जाल्यात काय अर्द वाटे वयल्यान परत वतात, तेंय पळोवपाक जाय. गांवगिऱ्या वाठारांतल्यान पणजे, म्हापश्यां, मडगांवां, फोंड्यां येवपी जायत्यो बसी बंद जाल्ल्यो दिसतात. हातूंत खाजगी बसी चड आसात. वरारां आशिल्ल्यो बसी (तांणी तीं रद्द केल्यांत काय तशींच दवरल्यांत तें येरादारी खात्याक खबर आसतलें.) कंपनींक चलतात काय नात ताचोय येरादारी खात्यान अभ्यास करपाक जाय.
फुडल्या 10 वर्सांनी येरादारीचें शिवधोनू घडये कदंब म्हामंडळाक उखलचें पडुये. ते नदरेन तांणी तयारी दवरपाक जाय. गांवगिऱ्या वाठारांत प्रवासी उणे आसूनय फक्त सेवा म्हूण कांय बसी म्हामंडळान चालू दवरल्यात, ही तुस्त करपा सारकी गजाल. पूण थंयच्यो व्हडल्यो बसी काडून मिनी बसी घालूं येतात. चड प्रवासी आकर्शीत करपाचेय यत्न जाय. सकाळच्या आनी सांजच्यावेळार वाळपयच्यान म्हापश्यां वचनासतना भायले भायर पणजी वचपी कदंब बसींक गर्दी आसता. मात व्हाया म्हापशेंच्यान वचपी बसी रिकाम्यो धांवतात. मार्ग शाॅर्ट कट आसा, वेळ वाटावता जाल्यार प्रवासी आकर्शीत जातात. प्रवाशांचो अभ्यास केल्यार कदंब म्हामंडळाचें लुकसाण इल्लें तरी उणें जातलें, हें वेगळें सांगपाक नाका.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
