भांगरभूंय | प्रतिनिधी
खबरां संस्था
हैदराबादः गोंयांतल्यान तेलंगणांत सोऱ्याची तस्करी करपी कदंबा बस चालक आनी कंडक्टराक मेडकच्या (तेलंगणा) अबकारी खात्याच्या पंगडान आयतारा ताब्यांत घेतले. तांचे कडल्यान एक लाख रुपयांच्या सोऱ्याच्यो बाटल्यो जप्त केल्यो. उल्हास श्रीधर (52) आनी आबासाहेब व्ही. राणे (51) अशीं दुबावितांचीं नांवां आसात.
गोंयांतल्यान हैदराबादेक वचपी जीए 03 एक्स 0478 नंबराची कदंब येरादारी म्हामंडळाचे बशींतल्यान सोऱ्याची तस्करी जाता, अशी खात्रेची म्हायती पंगडाक मेळिल्ली. ते प्रमाण पंगडान तेलंगणाच्या मेडक जिल्ह्यांतल्या कामकोले टोल प्लाझा लागसार ही बस आडावन तपासणी केली. त्या वेळार बशींत विवीध ब्रँण्डाच्यो सोऱ्याच्यो 70 बाटल्यो सांपडल्यो. तांचें बाजारांत मोल एक लाख रुपया जाता. पंगडान त्यो सगळ्यो बाटल्यो जप्त करून बस चालक आनी कंडक्टराक ताब्यांत घेतले.
सोरो प्रतिबंध आनी उत्पादन शुल्क अंमलबजावणी विभागाचे सहाय्यक आयुक्त के. रघुराम हांणी वयली म्हायती दिली. दोनूय दुबावितांनी सोऱ्याची तस्करी करताले, अशी कबुली दिल्या. तेलंगणांतल्या सोऱ्याच्या दरा परस गोंयांतले सोऱ्याचे दर खुबूच उणे आसात. ताका लागून तेलंगणांतल्यान येवपी प्रवाशी सोऱ्याची व्हड प्रमाणांत खरेदी करतात. ताका हे दुबावीत बुकींगाच्या माध्यमांतल्यान उर्बहा दितात, अशें रघुराम हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
