भांगरभूंय | प्रतिनिधी
नवी दिल्ली, खबरां संस्था: कतारान ८ आदल्या भारतीय नौसैनिकांची सुटका केली. हातूंतले सात जाण सोमारा सकाळीं भारतांत परतले. हेरगिरीच्या आरोपा खाला ते कतारांत जल्मठेपेची शिक्षा भोगताले. हाचे पयलीं तांकां फाशीची ख्यास्त दिल्ली.
परराष्ट्र मंत्रालयान सांगलें, कतारांत अटक केल्ल्या दहरा ग्लोबल कंपनी खातीर काम करपी ८ भारतियांक तांची सुटका जाल्ले खातीर भारत सरकार येवकार दिता. तांकां मायदेशी परतपाची परवानगी दिवपाच्या कतारच्या निर्णयाची आमी तोखणाय करतात.
कतारच्या गुप्तचर संस्थेच्या राज्य सुरक्षा ब्युरोन ३० ऑगस्ट २०२२ दिसा नौसैनिकांक अटक केल्ली.
फाशीची शिक्षा जल्मठेपेंत बदलिल्ली
हे सगळे अधिकारी कतारच्या नौदळाक प्रशिक्षण दिवपी Dahra Global Technologies and Consultancy हे खाजगी कंपनींत काम करताले. दहरा संवसारीक संरक्षण सेवा दिता. ओमान हवाई दळाचे निवृत्त स्क्वॉड्रन लीडर खामिस अल अजमी हे तांचे मुखेली. तांकां ८ भारतीय नागरिकां सयत अटकूय जाल्ली. मात नोव्हेंबरांत तांची सुटका जाल्ली.
ह्या सगळ्या अधिकार्यांक अटक केल्या उपरांत ४ म्हयन्यांनी २६ ऑक्टोबर २०२३ दिसा फाशीची ख्यास्त दिल्ली. उपरांत २८ डिसेंबर २०२३ दिसा ती ख्यास्त बंदखणींत बदल्ली.
३० ऑगस्ट २०२२ दिसा अटक, भारत सरकाराक खबर ना
भारतीय दूतावासाक सप्टेंबर २०२२ च्या मजगतीं भारतीय नौसैनिकांच्या अटकेची म्हायती दिल्ली. कॅप्टन नवतेज सिंग गिल, कॅप्टन सौरभ वशिष्ठ, कमांडर पूर्णेंदू तिवार, कॅप्टन बिरेंद्र कुमार वर्मा, कमांडर सुगुणाकर पकाला, कमांडर संजीव गुप्ता, कमांडर अमित नागपाल आनी नाविक रागेश अशीं तांचीं नांवां.
३० सप्टेंबर २०२३ ह्या दिसा तांकां तांच्या कुटुंबीयां कडेन कांय काळ फोनार आपोवपाची परवानगी दिली. तांकां अटक जावन एका म्हयन्या उपरांत ३ ऑक्टोबर २०२३ दिसा पयलेच फावट कॉन्सुलर ऍक्सेस मंजूर केलो. ह्या वेळार भारतीय दूतावासांतल्या एका अधिकार्याक तांकां मेळपाची परवानगी दिली. ३ डिसेंबर २०२३ दिसा कतारांत हाजीर आशिल्ले भारताचे राजदूत निपुल हांणी आठ आदल्या नौसैनिकांची भेट घेतली.
त्या अधिकार्यां विशीं…
१. कॅप्टन नवतेज सिंग गिल: कॅप्टन नवतेज सिंग गिल हे चंदिगडचे. तांचे बापूय निवृत्त लष्करी अधिकारी. ते देशांतल्या प्रसिद्ध डिफेन्स सर्व्हिसेस स्टाफ कॉलेज, वेलिंग्टन, तामिळनाडू हांगा प्रशिक्षक आशिल्ले. तांकां सगळ्यांत उत्कृश्ट कॅडेट म्हणून राष्ट्रपती पुरस्कार भेटयला.
२. कमांडर पूर्णेंदू तिवारी: नौदलाचे सर्वोच्च अधिकारी आशिल्ले. ते नेव्हिगेशनांत तज्ञ आसात. INS मगर हे युद्धनौकेचें नेतृत्व केलां. दहरा कंपनीचे वेवस्थापकीय संचालक सेवानिवृत्त कमांडर पूर्णेंदू तिवारी हांकां २०१९त भारत आनी कतारांतल्या द्विपक्षीय संबंध घट करपाचे तांणी दिल्ले सेवे खातीर प्रवासी भारतीय सन्मान पुरस्कार. हो पुरस्कार तांकां राष्ट्रपती राम नाथ कोविंद हांचे हस्तुकीं भेटयलो. सशस्त्र दळांत हो पुरस्कार मेळपी ते एकलेच व्यक्ती जावन आसा.
३. कमांडर सुगुणाकर पकाला: ५४ पिरायेचे सुगुणाकर पकाला हे विशाखापट्टणम रावपी. नौदल अधिकारी म्हणून तांचो कार्यकाळ उत्कृश्ट आसा. पिरायेच्या १८ व्या वर्सा ते नौदळांत रुू जाले. नोव्हेंबर २०१३ त ते भारतीय नौदळांतल्यान निवृत्त जाले. उपरांत ते कतारची कंपनी अल दाहरा ग्लोबल टेक्नॉलॉजीज अँड कन्सल्टन्सींत रुजू जाले.
४. कमांडर संजीव गुप्ता हे तोफखानो विशेषज्ञ म्हणून वळखतात. कमांडर युनिटच्या ऑपरेशनाचे मुखेली आसात.
५. कमांडर अमित नागपाल नौदळांतल्या दळणवळण आनी इलेक्ट्रॉनीक युद्ध प्रणालींतले तज्ञ आसात.
६. कॅप्टन सौरभ वशिष्ठ हे कुशल तांत्रीक अधिकारी म्हणून वळखतात. तांणी जायतीं कठीण ऑपरेशनां केल्यांत.
७. कॅप्टन बिरेंद्र कुमार वर्मा हे तांच्या नेव्हिगेशन कुशळटाये खातीर वळखतात.
८. नावीक रागेश नौदलळांत देखभाल आनी मदतीचो हात म्हणून काम करताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
