भांगरभूंय | प्रतिनिधी
तेल अवीव/तेहरान : कतारांतल्या सगल्यांत व्हड ‘लिक्विफायड नॅचरल गॅस’ (एलएनजी) प्रकल्प रास लाफानाचेर इराणान क्षेपणास्त्र हल्लो केलो. ते उपरांत आंतरराष्ट्रीय तेल आनी गॅस बाजारांतली अस्थिरताय अदिकूच खर जाल्या. इराण आनी इझ्रायल- अमेरिका हांचे मदीं चालू आशिल्ल्या झुजाचो व्हड मार आखाती देशांक बसता. इराणान अमेरिकेच्या मालमत्तेक लक्ष्य करपा वांगडाच उर्जा प्रकल्पांचेर हल्ले केल्यात. हाका लागून राजेशाय आशिल्ल्या ह्या देशांनी तिडक उक्तायल्या.
रास लाफाना हो संवसारांतलो व्हड एलएनजी प्रकल्प. थंयचें उत्पादन पुराय तरेन बंद केलां. संवसारभरांत ज्या देशांनी एलएनजीची सगल्यांत चड निर्मिती करतात तातूंत अमेरिका, ऑस्ट्रेलिया आनी रशिये सयत कतारचो लेगीत आस्पाव आसा. मजगतीं, उत्पादन प्रक्रियेंत निर्माण जाल्ली ही पयलीच आडखळ न्हय. मार्चाच्या पयल्या सप्तकांत, इराणान कतारच्या गॅस क्षेत्रांचेर क्षेपणास्त्र हल्ले केल्ले. हाका लागून संवसारांतली सैमीक गॅसाची सगल्यांत व्हड निर्गत करपी कंपनी अशिल्ले ‘कतार एनर्जी’क आपलें उत्पादन बंद करचें पडिल्लें. संवसारांतल्या गॅसाचो सगल्यांत व्हड सांठ्याचो भाग आशिल्ल्या इराणाच्या ‘सावथ पार्म’ गॅस क्षेत्राचेर इझ्रायलान केल्ल्या हल्ल्याक परती जाप म्हूण हे हल्ले केल्ल्याचें म्हणटात.
संवसारांतल्या तेलाच्या वट्ट पुरवणेंतलो पांवटो वांटो घेवन वचपी ‘स्ट्रेट ऑफ हॉर्मूझ’चो मार्ग इराणान बंद केल्ल्यान थंयची येरादारी बंद आसा. हाचो परिणाम म्हूण तेलाच्या मोलांत वाड जाल्या आनी खूब कडेन उणाव निर्माण जाला.
इराणच्या गुप्तचर मंत्र्याक मरण
इराणचे गुप्तचर मंत्री इस्मायल खतीब हांकां इझ्रायली हवाई हल्ल्यांत मरण आयलां. इराणचे राष्ट्राध्यक्ष मसूद पाझाश्कियान हांणी हाका अधिकृत तरेन पुश्टी दिल्या. ही एक भिजूड हत्या, अशें तांणी म्हणलां. हो हल्लो इराणच्या सर्वोच्च नेतृत्वाक लक्ष्य करपाच्या कटाचो भाग आशिल्लो. हाचे आदीं इझ्रायलान इराणचे सुरक्षा अधिकारी अली लारीजानी आनी बसीज कमांडर गुलामरेझा सोलतानी हांकां लक्ष्य करून दोनूय अधिकाऱ्यांक जिवेशी मारिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
