भांगरभूंय | प्रतिनिधी
पणजीः न्हंय येरादारी खात्याच्या कण्णम जाल्ल्या स फेरीबोटींचो विलो लावपा खातीर काडिल्ले पावणेक शुन्य प्रतिसाद मेळ्ळो. ह्या फेरीबोटींचो विलो लावपा खातीर गोंय कोयर वेवस्थापन म्हामंडळान आतां तिसरे खेपे पावणी घडोवन हाडल्या. 24 फेब्रुवारी सकाळीं 11 वरांचेर ह्या बोटींचे पावणेक सुरवात जातली आनी सगल्यांत चड बोली लावपी कंत्राटदाराक ह्यो फेरीबोटी व्हरपाक मेळटल्यो.
न्हंय येरादारी खात्याच्यो कण्णम जाल्ल्या स फेरीबोटींचो विलो लावपा खातीर कोयर वेवस्थापन म्हामंडळान निविदा काडल्या. ह्या फेरीबोटींचो विलो लावपा खातीर तिसरे खेपे निविदा काडल्या. हाचे पयलीं काडिल्ले निविदेक फावो तितलो प्रतिसाद मेळूंक नाशिल्लो. पावणेची उण्यांत उणें मोल चड आसा अशें कांय कंत्राटदारांक दिशिल्ल्यान तांणी फाट दाखयिल्ली.
दुसरी निविदा 14 जुलयाक काडिल्ली. पूण एकाय कंत्राटदारान ह्यो बोटी विकत्यो घेवपाक रस दाखोवंक ना. आतां तिसरी निविदा जारी करून पावणेच्या मोलांत उण्या बोलीची रक्कम अर्दी केल्या. हे खेपे स कावलाक काडिल्ल्या फेरीबोटींची पावणी जावपाची आसा आनी दरेकी तीन फेरीबाेटींची पावणी दोन लोट्सांनी जातली.
तीन फेरीबोटींची पावणी लावपाचें उण्यांत उणें माेल रु. 6.10 लाख इतलें आशिल्लें आतां तें उणें करून 2.30 लाख इतलें केलां. चडांत चड बोली लावपी कंत्राटदाराक ह्यो फेरीबोटी मेळटल्यो.
पावणेक काडिल्ले फेरीबोटी मदीं बिठ्ठोणा (पीएनजे 585), कोलवा (पीएनजे 482), बेतूल (पीएनजे 605), वागातोर (पीएनजे 535), दुदसागर (पीएनजे 473) आनी केपें (पीएनजे 465) ह्या बोटींचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
