भांगरभूंय | प्रतिनिधी
देवांचो देव महादेवाक धवीं फुलां भावतात आनी गणपतीक तांबडीं फुलां आवडटात म्हणून भावीक, तीं तांकां ओंपतात. धवींफुल्ल व्हड फुलां फुलपी अनंत, धवी जास्वंद, धवो गुलाब आनी धवी मोगरी, जांया सारकीं परमळीत फुलां पोरसांत एकदम सोबून दिसतात. आमच्या पोरसाक एक गिरेस्तपण, पाचवेपण दितात. सरभोंवतणी Positive Vibes सोडटात. Positive Attitude दवरून ह्या जिणेच्या काट्या-कुट्यांनी भरिल्ल्या मार्गार फुडें-फुडें वचपाक बळगें दितात.
पावसाच्या दिसांनी वा ताचे पयलीं, शाराच्या नाजाल्यार वाड्या वेल्या एका कोनशाक, विंगड विंगड तरेचीं झाडां, रोंपे विकपाक विक्रेते बशिल्ले आसतात. चडशे जाण, हातगाड्यार घालून विंगड विंगड तरेचीं रोंपा विकपाक वाड्यावाड्यांनी भोंवत आसतात. तरेतरेचे गुलाब, शेंवती, रोजां आनी सोबेच्या झाडांचो तातूंत आस्पाव आसता. बंगळुरूंतल्यान होलसेल मोलान हाडून, तोंडाक येता तें मोल सांगून गोंयांत विकतात.
फुलिल्ले वा कळे आयिल्ले रोंप ते विकपाक दवरतात आनी आमी पिशें लागिल्ले वरी चड मोलान ते विकते घेतात. तांकां बऱ्या जाग्यार रोयतात. शेण, सारें घालतात, उदक दितात. पूण थोड्या दिसांनी तीं रोंपां ल्हवू ल्हवू मरपाक लागतात.
‘गोवा का तापमान humid है ! बेंगळुरू में वह अच्छे फल फुलते हैं ! उधर का क्लायमेट उनके लिये परफेक्ट हैं ! गोवा मे बहुत बिक्री होती हैं! इस लिये हम लाते हैं!’ जाचे कडल्यान आमी हजारांचीं रोंपां व्हरताले तो नवो म्हाल हाडपाक गेल्लो आनी ताच्या कामगारान उलयतां उलयतां हें Secret Of Trade आमकां सांगून गेलो. ताचे उपरांत आमी हीं रोंपां घेवपाचेंच बंद केलें. हजरांनी दुडु आनी मेहनत उदकांत गेली.
ह्या बेंगळुरूच्या रोंपां वांगडा आमी आमच्या सुपुल्ल्या पोरसांत गांवठी कणेर, व्हडल्या जातीचो अनंत, सोनचाफो, जासवंत हिंवूय झाडां लायल्यांत. पूण तांची चड कुयदात घेवची पडना. पावसांत चार फांदयो हाडून जमनींत पुरत आनी वर्सभर उदक दीत रावत, जाल्यार 365 दीस हीं झाडां चंवरिल्लीं आनी परमळिल्ली दिश्टी पडटात.
बाजरांत हजार जाणांचे हात आनी बुरश्या जाग्यार दवरिल्ल्या म्हारग्या हार, फुलां परस हीं पोरसांत फुलिल्लीं फुलां, पुजा करपा बरोबरच देव-देवतांकय आवडटात अशे आमचो भटजी आमकां सदांच सांगता.
श्रावण म्हयन्याचे दीस…. दोन दीस पावसान विसव घेतिल्ल्यान फांतोडेर उठून हांव Morning Walkकाक भायर सरलों. आंगणांत पावतकूच, माथ्याक आनी मनाक थंडाय दिवपी परमळान म्हाका येवकार दिलो. पोरसाचे मदींच झाडांक उदक शिंपपाक नळ बसयला. ताचे कुशीकच लायिल्ली कणेर चारूय दिकांनी चंवरिल्ली. पाचवेंचार झाड, धव्याफुल्ल कणेरीच्या भारान धवेफुल्ल दिसूंक लागिल्लें. वयांत आयिल्ल्या गोरेपान आनी सुंदर-सोबीत अस्तुरे सारकें. ते कणेरीचे चंवरिल्लें रोंप आपलेच मस्तेंत धुंद आशिल्लें, पूण पळयणाऱ्याचे काळीज पोखरून सोडटालें.
चवथ जशी लागीं पावता तसो तसो, हळडुळो सोनचाफो, धवोफुल्ल अनंत आनी केसरी-धवश्या कोराचो पारजात फुलूंक लागता, चवरूंक लागता. श्रावण म्हयन्यांत ह्या विंगड विंगड फुलांची आनी तांच्या परमळाची जुगलबंदी रंगता. महफिल सजता…..आमकां, खोशयेचे तेंगशेर हुबयता. एक तरेची झिंग हाडटा!
कितलो वेळ तरी, पयलेच फावटी फुलांनी भरिल्ल्या त्या कणेरीच्या झाडाक हांव पळयतच उरलों. तोखणाय करीत रावलों. एक मोगी आपले इश्टिणीक चड तेंपान मेळतटकूच पिशां वरीं जाता… दुसर्याच गिऱ्यार पावता…..कांयच उलयनासतना ताका पळयत रावता. तशीच म्हजी अावतिकाय जाल्ली.
कणेरीचें एक फूल काडलें आनी ताका नाजुकतायेन हाताच्या पोशांत घेवन, ताचो परमळ घेत हांव morning walkकाक गेलों. पूण मन आयकूंक तयार नाशिल्लें. पिशें मन सांगतालें की, कणेरीची, अनंताची, सोनचाफ्याची गांवठी फुलां काड आनी देवघरांतलो देवारो सजय. देवाक तीं ताजीं परमळीत सुंदर अशीं फुलां ओप. तांचो वास घरभर परमळटा आनी ताच्या टवटवीत फुलांनी देवारोय भरिल्लो, पवित्र आनी जिवंत दिसता. देवघराची सोबितकाय वाडयता. दिसाची सुरवात बरी जाता. तुमचे तन-मन आख्खो दीस खोशी उरता. सुंदरतायेची आनी परमळीत जीण जगपाचे वाटेर तुमकां व्हरून सोडटा.
असो भास जाता की सुंदर फुलांनी सजयिल्ल्या रथार बसून, ह्या पवित्र शूभ अशे फांतोडेर देव-देवता, सुर्यदेवते वांगडा आमकां आशिर्वाद दिवपाक ह्या पृथ्वी-थळार अवतरिल्ले आसात….!!
फुल तुम्हे भेजा हैं खत मे, फुल नहिं, मेरा दिल हैं।
प्रियतम मेरे, तुम यह लिखना, क्या यह तुम्हारे काबिल हैं ??
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
