भांगरभूंय | प्रतिनिधी
पणजी : कडशी -मोपा वाठारांत परतल्ल्या ’ओंकार’ हतयान परत आपलो मोर्चा मनशांचे वसणुकेंत व्हेल्ल्यान हांगच्या थळाव्यां मदीं भंयाचें वातावरण निर्माण जालां. दोन दिसां सावन ह्या वाठारांत धुमशेणां घालपी ओमकारान सोमारा फांतोडेर लोकवस्तींत प्रवेश करून थळाव्यांनी घरा. भायर पार्क करून दवरिल्लीं वाहनां मोडून घालीं. हातूंत एके मारुती ओम्नी गाडयेचें आनी दुचाकीचें व्हड लुकसाण जालां. रान विभागाचे कार्यक्षमतेचेर आतां थळाव्यांनी प्रस्न केला.
हे विशीं चड म्हायती प्रमाण, आयज सकाळीं सुमार ६:३० वरांचेर जेन्ना चडशे नागरीक आपल्या सदच्या कामाची सुरवात करताले तेन्नाच ओंकारान येवन सगल्याक वाट लावपाक सुरवात केली. कडशीचे उमेश शंकर गाड हांच्या घरा भायर उबी आशिल्ली मारुती ओम्नी गाडी हतयान लक्ष्य केली. हतयान गाडयेक दिल्लो धपको इतलो नेटान आशिल्लो, हातूंत गाडयेचे हारशे फुटून पत्र्याचेंय व्हडा प्रमाणांत लुकसाण जालें. तशेंच लागींच उबी आशिल्ली गीतेश शेट्ये हांची ’फसिनो’ दुचाकीय हतयान मोडून घाली. हो सगलो प्रकार घडलो तेन्ना थंय कोणूच नाशिल्ल्यान कोणाक कांय जावंक ना. मात मालमत्तेचें व्हडा प्रमाणांत लुकसाण जालें.
हे घडणुकेक लागून ह्या वाठारांत भंयाचें वातावरण आसा. तशेंच ग्रामस्थांचे सुरक्षीततायेचो प्रस्न परत मुखार आयला. फाटल्या कांय दिसां सावन हो हती फकत बागायती, शेतां आनी पिकांचें लुकसाण करतालो. मात आतां तांणी सरळ घरांच्या आंगणांत येवन सामानाचें लुकसाण केलें. सकाळीं भुरगीं वा थळावे कामा निमतान भायर आसतात, अश्या वेळार हती तांचे सामकार आयल्यार तांच्या जिवाचें बरें-वायट जावपाची शक्यताय आशिल्ल्यान थळाव्यांनी तिडक उक्तायली.
रान विभागाक हे घडणुकेची म्हायती दिली. अधिकारी घडणुके सुवातेर दाल जावन पंचनामो करतात. मात, फकत पंचनामे करून आनी लुकसाण भरपाय दिवन हो प्रस्न सुटचो ना, अशी ठाम भुमिका थळाव्यांनी घेतल्या.
रान विभागान हतयाक लोकवस्ती पसून पयस दवरपा खातीर बेगोबेग आडामो वा हतयाक सैमीक वाठारांत परत धाडपा खातीर खर उपाय करचे, अशी मागणी उमेश गाड आनी हेर ग्रामस्थांनी केली. रानजीव आनी मानवी संघर्श आडावपा खातीर प्रशासनान वेळार पावलां उबारलीं ना जाल्यार येवपी काळांत हो संघर्श आनीक खर जावपाचीं चिन्नां दिसपाक लागल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
