भांगरभूंय | प्रतिनिधी
तेहरान : इराणांत बायलांक खूब निर्बंध आसात. भौशीक सुवातेर गावपाचेर बंदी ही तातूंतली एक. अशें आसून लेगीत इश्फान शारांत एक बायल गायली. इराणांतल्या बायलांच्या मानवी हक्कांचेर काम करपी कार्यकर्ते मसीह अलिनजाद हांणी हो व्हिडियो शेअर केला.
जो सध्या सोशल मिडियाचेर व्हायरल जायत आसा. अशें धैर्य आशिल्लीं बायलो एक दीस इराणाच्या नारीविरोधी लोकांक सत्ते वयल्यान काडून उडयतलीं अशें मसिहान बरयलां. शारांतल्या इतिहासीक मशिदींत ही बायल ही गीत गायली.
मशिदींत ही बायल गायता आसतना जायते लोक हाजीर आशिल्ले. कांय जाणांनी ताचो व्हिडियो लेगीत केलो. हाचे उपरांत मशिदीच्या राखणदारान तिका गावपा पसून आडावपाचो यत्न केलो. पूण तिणें ताका प्रतिकार केलो. ती गायत रावली, उपरांत राखणदार स्वताच थंयच्यान गेलो.
फाटल्या वर्सा इराणांत हिजाब विरोधी निशेध जाले उपरांत बायलो आपल्याचेर घाल्ल्या निर्बंधां आड भायर सरतात. पूण मशिदींत गावपी बायलेन तकली हिजाबान धांपिल्ली.
2013 वर्सा इराणाचो सर्वोच्च फुडारी अली खामेनी हाणें फतवो जारी केल्लो. हातूंत कोणाच्याच मनांत चुकीचे विचार निर्माण जायनात तो मेरेन बायलांचें गायन स्विकारतलें. पूण अशें जालें जाल्यार बायलांक एकटीं वा पंगडांत गावंक मेळचें ना. तेन्नासावन बायलांच्या गायनाचेर निर्बंध घाल्यात. आतां हे बायलेचें गायन आयकून कोणाच्या मनांत चुकीचे विचार आयल्यात काय नात, हें घडये उपस्थित लोकांक विचारतले आनी मागीर फुडली कारवाय करतले, अशें दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
