भांगरभूंय | प्रतिनिधी
गोंयचे प्रस्न कशेच सुटनात काय दिसता. सरकार कितेंतरी करूंक सोदता आनी आमचो नानाकार सुरू जाता. ना ना हें करूंक दिवचे नात, तें करूंक दिवचे नात, कशेच दिवचे नात. आतां सरकार जें कितें करूंक सोदता तें सगळेंच वायट आसता? कोणाची तरी तान भागना म्हणून उदकाची तजवीज करूंक जाय. जाल्यार उदक आडावंक बांद घालूंक दिवचे नात. कोयर आमी करतले. सरकारान तो निवळ करूंक जाय, पूण आमच्या गांवांत तो हाडूंक दिवचे नात. कोयरा प्रकल्प आमच्या गांवांत नाका. आमकां कोयराची घाण नाका. आमी कोयरूच करचे नात अशें मात कोणूच म्हणिनात.
आमकां व्हडल्यो व्हडल्यो गाडयो घेवन भोंवक जाय. ते खातीर बरे रूंद रस्तेय जाय, पूण आमी आमची जमीन कशीच दिवचे नात. आनी जे रस्ते रूंद केल्यात ताचेर गाडयो पार्क करून दवरूंक फाटींफुडें पळोवचे नात. हें सगळें पळेतकूच आमकां जालां तरी कितें तेंच कळना. सद्याक गांवांतल्यान हायवे नाका म्हणून भोमाचे लोक आंदोलन करतात. तांकां जायते राजकारणी आनी एनजीओ तेंकोय दितात. ह्या लोकांचो सरकाराचेर इल्लोय भरंवसो ना म्हणपाचें कळटा.
गोंयांत सद्याक खंयूय जागे वतात म्हणपाचें दिसलें म्हणजे ताका विरोध जाता. तसो विरोध जावप सभावीक. कारण आमचे कडेन जमीन आसाच उणी, तीय जर खंयच्याय प्रकल्पा खातीर दिवची पडली तर आमचे फुडले पिळगेचें कितें? हो प्रश्न पडप सभावीक. हाकाच लागून लाखांनी चौरस मिटर जागो खावपी आयआयटी सारके प्रकल्प आमकां जायच काय कितें हाचेर विचार जावप गरजेचें. पूण रस्तो रुंदीकरण हें गरजेचें. आज दर एकल्या कडेन गाडी आशिल्ल्यान रस्तो सामको गरजेचो जाला म्हणटकूच रस्त्याक विरोध करप कितलें सारकें तेंय पळोवचें पडटलें.
आतां हो विरोध जाता कित्याक हाचेर विचार जावप गरजेचें. गोंयांत चडशीं घरां भाटकाराच्या जमनीर आसात. जमनीक दर नाशिल्ली तेन्ना भाटकाराक तोंडयां सांगून बांदिल्लीं हीं घरां. हांतल्या सगळ्याच घरांक घर नंबर बी आसताच अशें ना. सगळें एकमेकांच्या बरेपणान चलतालें. आतां जमनीक दर आयल्या. सहजासहजीं कोणूच आपली जमीन अशीच काडून दिवचो ना. पूण इतलीं वर्सां घरांनी रावप्यांक भायर काडपूय शक्य आसना. म्हणटकूच हांगा जाता कितें जेन्ना खंयचोय प्रकल्प येता तेन्ना भाटकार रोखडोच हरकत ना म्हणपाचें सांगता. ताका दुडू मेळटात न्ही. पूण ते जमनीर जे वसल्यात तांचो विचार कोण करिना. तांचेकडेन जमनीचीं कागदां नाशिल्ल्यान तेय कांयच करूंक शकनात. मागीर ताणीं रावप खंय? सरकारी नेमाप्रमाण तांची घरां कायदेशीर न्ही. तांकां जमनीचें वा घराचें कांयच मेळना. मागीर ताणीं कितें करपाचें?
हांगा आनीक एक गजाल घडटा. सरकार जमीन घेता आनी ती तशीच उरता. केन्नातरी रस्तो रूंद करूंक सोदता तेन्ना कळटा ते जमनीचेर अतिक्रमण जालां. मजेची गजाल म्हणल्यार हें अतिक्रमण जातना कोणूच कांय उलयना वा कसलीच कारवाय करिना. वर्सांसंकिनी हें अतिक्रमण तशेंच उरता. इतलेंच न्ही तर ताका लायट, उदकूय मेळटा. तांचे खातीर वेळ पडल्यार रस्तेय तयार जाता. आनी अतिक्रमण करपी आपणांक हें पचलें म्हूण धरून वता. अकस्मात सरकार जर तें मोडूंक पळेता जाल्यार कोण वोगी रावतलो?
जेन्ना हें अतिक्रमण वा बेकायदेशीर बांधकाम जाता तेन्ना ग्रामपंचायत वा म्युनिसिपालटी, ज्या सरकारी खात्याची ही जमीन ताचे अधिकारी दोळे धांपून कशे बसतात? तांकां लायट, उदक कशें मेळटा? चूक ह्या खात्यांची न्ही? तांचेर कारवाय जावंक नाका आसली? भोमां फकत चार घरांच वतलीं, बाकी आसा तें अतिक्रमण अशें मंत्री सांगता. जर तें अतिक्रमण जाल्यार तें करप्यां वांगडाच तांकां मदत करप्यांचेर कारवाय जावंक नाका? आनी अतिक्रमण केल्ल्यांक दुसरे कडेन कशे जागे दितलें तर सरकार? म्हणजेच सरकार अतिक्रमण करप्यांक प्रोत्साहन दिताशें जालें ना? एकेकडेन अशें प्रोत्साहन मेळप म्हणजे हेरकडेन लोकांक बरें पडटलें. करात अतिक्रमण, सरकार खंयतरी जागो-घर दितलेंच होच ताचो अर्थ जालोना?
आज जें भोमा चललां तेंच फाल्यां दवर्ले जावपाचें आसा. दवर्ले स्कूल कॉंप्लेक्स बांदूक सरकारान जागो घेतला आनी ताचें काम चललां. एकदां सगळीं स्कुलां हांगा आयलीं म्हणजे दवर्लेच्या रस्त्यार ताण येतलो. दवर्लेचो रस्तो रुंद करूंक सरकारान रस्त्याकुशीकचो जागो घेतला. जेन्ना स्कूल कॉंप्लेक्साचें काम सुरू जालें त्याच वेळार ह्या रस्तो रुंदिकरणाक घेतिल्ल्या जाग्याचेर कोणेतरी पांच-स गाळे बांदले. सामचे दवर्ली दिकारपाले पंचायतीकडल्यान पन्नास- साठ मिटरांचेर. रस्त्यावयल्यान वचपी सगळेच पळेतात पूण अजून ताचेर कोणेच जाप काडूंक ना. जाणें गाळे बांदल्या ताणें ते भाड्याकूय दिले. तांकां लायटूय मेळ्ळी. हरशीं जाल्यार सगळे नेम सांबाळून बांदिल्ल्या घराक लायट मेळूंक कठीण जाता. पूण बेकायदेशीर करतल्याक लायट, उदक रोखडेंच मेळटा.
फाल्यां जेन्ना रस्तो रुंदिकरणाचें काम सुरू जातलें, तेन्ना हे लोक नाका नाका करून रस्त्यार येतले. आनी सरकार तांकां खंयतरी जागो आनी कॉंम्पेंसेशन दितलो. म्हणजे सरकार आपलोच जागो परत एक फावट दुपेटीन फारीक करून विकतो घेतलें. हें सगळें अशेंच चलतलें. कारण आमकां मतां सांबाळचेलीं आसा. पंचायतीन खरें म्हणल्यार हाचेर कडक कारवाय करूंक जाय आसली. पूण …..जोंवेर हो पूण वचचो ना तोंवेर सरकारी तिजोरी अशीच रिती जायत रावतली. कोणाच्या बोल्सांत कितें वतलें देवाक खबर पूण सरकाराक कर दिवन दिवन आमचीं बोल्सां मात रितीं जातलीं हातूंत दुबाव ना.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
