भांगरभूंय | प्रतिनिधी
कृष्णायण
(आतां मात कृष्णाक मारपाक कितें तरी नवीन येवजण करुंक जाय अशें ताणें मना कडेन थारायलें आनी कंस ते दिकेन विचार करपाक लागलो… आतां मुखार…)
विचार करुन करुन कंसान कृष्णाक कसो मारपाचो हाची येवजण सोदून काडली. जे तरेन कृष्णान शेंकड्यांनी लोकां मुखार अरिश्ट आनी केशीक मारले तेच तरेन कृष्णाकूय सगळ्या हुजरां मारपाचो अशें ताणें थारायलें. हें सांदूंक जाय जाल्यार शेंकड्यांनी लोकांक एकठांय हाडून त्या वगतार कृष्णूय थंय हाजीर आसतलो अशें कितें तरी करचें पडटलें हें ताच्या लक्षांत आयलें. यादवांनी गोवर्धन दोंगराची पुजा दवरिल्ली ते खातीर भोंवतणच्या वाठारांतले लोक एकठांय जाल्लें. ते खेरीज तांणी कुस्त्यांची सर्त दवरिल्ली. राज्यांतल्या लोकांक कुस्तेच्या खेळाचें खूब आकर्शण आशिल्ल्यान लोक तो पळोवपाक ओडून व्हेल्ल्या भशेन थंय गेल्लें. कुस्तेची आवड आशिल्ल्यान कृष्णानूय सर्तींत वांटो घेतिल्लो. कृष्णाक मारपा खातीर आपणाकूय अशेंच कितें तरी करचें पडटलें हें कंसाच्या लक्षांत आयलें.
बरोच विचार केले उपरांत कंसान अक्रूराक आपोवन घेतलो. अक्रूर हो उग्रसेन राजाचो जावंय आनी कंसाचो भावोजी आशिल्लो. तो पयलीं पसून उग्रसेनाच्या दरबारांत काम करपाक लागिल्लो. कंसाचो सभाव आनी तो हेरांक दिता ती वागणूक पळोवन बाकीचे यादव ल्हव ल्हव कंसाचो दरबार सोडून गेल्ले, पूण अक्रूर वचूंक नाशिल्लो. अक्रूर वसुदेवाचो साडू आनी वसुदेव नंदाचो चुलत भाव आशिल्ल्यान अक्रूराच्या सांगण्याक कृष्ण न्हयकार दिवचो ना हें कंसाक खबर आशिल्ले. तेच खातीर ताणें अक्रूराची निवड केल्ली.
अक्रूर येतकच कंसान ताका म्हणलें, “अक्रूरा, म्हजे तुजे कडेन एक काम आसा आनी हें काम तूंच करुंक शकतलो असो म्हाका विस्वास आसा. हांवे धोर्णूयाग करपाचो थारायला. ह्या यागा वेळार म्हजे कडेन आशिल्ल्या व्हडल्या धोणूची पुजा जातली. दंवडी घालून आमच्या राज्यांतल्या सगळ्या लोकांक निमंत्रण दिवया. ह्या यागाच्या निमतान कुस्त्यांचें प्रदर्शनूय दवरुया. राज्यांतल्या व्हडल्या- व्हडल्या मल्लांक ह्या प्रदर्शनांत वांटो घेवपाक लावया. म्हजेय मल्ल हातूंत वांटो घेतले. नंदाचो पूत कृष्ण बरी कुस्ती खेळटा हें तुका खबर आसतलेंच. ताणें म्हज्या अरिश्ट आनी केशी मल्लांक जिते मारल्यात. तेन्ना ताची कुस्ती पळोवची अशें म्हज्या मनांत आयलां. वसुदेवाक हांवे बंदखणींत दवरला हाचो ताका राग आसतलो आनी ते खातीर तो एकाद्रे ह्यो कुस्त्यो पळोवपाक येवचो ना. तेन्ना म्हाका दिसता तुवें वृंदावनांत वचून ताका धोर्णूयागाक घेवन येवचो. तुजे उतर तो भायर उडोवचो ना. तो हांगा आयलो जाल्यार ताका वसुदेवाकूय मेळपाक मेळटलें. तूं तशें ताका सांग.”
कंसान सांगलें तें आयकून अक्रूराक अजाप दिसले. कंसाक मदींच हें कित्याक सुचलें हाचो तो विचार करपाक लागलो. आनी ताच्या लक्षांत तें आयलें. कृष्णाक मथुरेंत आपोवन आपल्या मल्लां कडल्यान सगळ्या लोकां मुखार मारून उडोवपाचो हेतू कंसाचे तकलेंत घुंवता हें अक्रूराक कळ्ळे. मागीर तो आनीक चड कंसा कडेन उलयलो ना. कंसान सांगिल्ल्या प्रमाण आपूण वृंदावनांत वचून कृष्णाक धोर्णूयागाचे निमंत्रण दिता अशें उलोवन अक्रूर कंसाच्या दरबारातल्यांन भायर आयलो.
कांय दीस गेल्या उपरांत कंसान धोर्णूयाग आनी कुस्त्यांचे प्रदर्शन केन्ना धरपाचें तें थारायलें आनी तशी दंवडी ताच्या संबंद राज्यांत दिवपाक लायली. तें जातकच अक्रर कंसाचो निरोप आनी ताचो रथ घेवन वृंदावनांत कृष्णाक निमंत्रण दिवपाक गेलो. बारीक विचार करूंक गेल्यार कंसान धाडिल्ले निमंत्रण म्हणल्यार ताच्या काळाक निमंत्रण आशिल्ले नशीबांत आसा तें केन्ना चुकना म्हणटा तेंच खरें!
सांजेच्या वेळार कंसाचो रथ वृंदावनांत भितर सरलो तो पळोवन वृंदावनांतल्या यादवांक अजाप आनी भंयूय दिसलो. रथांत बशिल्ल्या अक्रूरांक खुबशे यादव वळखताले. रथ नंदाच्या घरा मुखार रावलो आनी रथांतल्यांन अक्रूर सकयल देंवलो तो कांय यादवांनी पळयलो. कंसान अक्रूराक कृष्णा विशीं कितें तरी सांगपाक नंदा कडेन धाडला आसतलो असो तर्क तांणी केलो. ल्हवू ल्हवू कंसाच्या दरबारांत काम करपी अक्रूर कसल्या तरी म्हत्वाच्या कामा खातीर नंदा कडेन आयलां ही बातमी सगळ्या वृंदावनांत पातळ्ळी. कंस धोर्णूयाग करता आनी त्या निमतान ताणें कुस्त्यांचे प्रदर्शन मथुरेंत दवरलां हे सगळ्या यादवांक खबर आशिल्ले. त्या संदर्भात अक्रूर आयला काय कितें हो प्रस्न यादवांच्या मनांत उप्रासलो.
(फुडें चलता)
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
