भांगरभूंय | प्रतिनिधी
कृष्णायण
कृष्णाक मारपाक कंसान आपल्या हातांतली तरसाद वयर उखल्ली. तरसादीचो धपको ताचेर बसचे पयलींच कृष्ण फट्ट करून कुशीक सरलो. ताणें त्याच वेळार…
कृष्ण आनी बलराम मागीर कुस्त्यांच्या मंटपांत भितर सरले. तांच्या वांगडा आशिल्ले ‘कृष्ण कृष्ण’ म्हणून आड्डताले तेय बी तशेंच आड्डीत भितर सरले. कंस मंटपांत आशिल्ल्या शिंवासनार बशिल्लो. कृष्णाचे नांव घेवन सगळे लोक आड्डतात तें पळोवन ताका भयंकर राग आयलो. ह्या कृष्णान मथुरेतल्या लोकांकूय आपले वचेन फितयले काय कितें हो प्रस्न कंसाक पडलो. खरें म्हणल्यार तें तशेंच जाल्लें! राज्यातल्या लोकां मदीं कंसा आड खूब राग आशिल्लो. कृष्ण मथुरेंत आयिल्ल्यान त्या रागाक वाचा फुटिल्ली. मथुरेंतल्या लोकांक नवो फुडारी मेळिल्ल्या भशेन दिसूंक लागिल्ले. इतले म्हणसर कृष्णा वांगडा आशिल्लो अक्रूर कंसाच्या शिंवासना कडेन वचून उबो रावलो. कृष्ण, बलराम आनी वृंदावनातले तांचे वांगडी जमिल्ल्या लोकां मदीं वचून बसले.
सगळे लोक बसतकच कंसान चाणूर आनी मुश्टीक हांका कुरु केली. कंसान तशें करिना फुडें ते गव्या रेड्या भशेन आशिल्ले दोनूय मल्ल आखाड्यांत देंवले. आखाड्यांत देंवतकच चाणूरान वृंदावनातले यादव जंय बशिल्ले थंय नदर मारून व्हडल्यान म्हणलें, “वृंदावनातल्या गवळ्यांनो, तुमच्यातले कृष्ण आनी बलराम म्हणून कोण आसात, तांकां ह्या आखाड्यात देंवपाक सांगात. कुस्ती खेळपांत ते बरे असात अशें म्हणटात. तांणी आमच्या इश्टांक, अरिश्ट आनी केशीक मारून उडयल्यात. ते तांणी कशें केलें तें देवाकूच खबर! आतां आमचे आड कुस्ती करपाक धाडात तांकां. कुस्ती कशी खेळप तें आमी तांकां शिकयतात! धाडात, धाडात तांका! चाणूरान अशें म्हणटकच कृष्ण आनी बलराम आपले सुवाते वयल्यान उठले आनी आखाड्यांत देंवले. तांका उठिल्ले पळोवन जमिल्ल्या सगळ्या लोकांनी कृष्ण, कृष्ण म्हणून आड्ड्यो मारपाक सुरवात केला.
आखाड्यांत देंवतकच कृष्ण चाणूरा आड आनी बलराम मुश्टीका आड कुस्ती खेळपाक लागलो. कंसाच्या मल्लां मुखार कृष्ण आनी बलराम सामकें पोराटे कशें दिसताले. पूण कंसाचे मल्ल जड जिवाचे आशिल्ले आनी तांच्यो हालचाली सवकास जाताल्यो. हाचे उरफाटें कृष्ण आनी बलराम वेगान हालचाली करताले. ते खातीर कृष्ण आनी बलरामाक चपक्यांत धरपाचे कंसाच्या मल्लांचे सगळे यत्न फुकट वताले. जमिल्ले सगळे लोक मोट्या मोट्यान आड्डून कृष्ण आनी बलरामाक नेट दिताले. ते खातीर जावपाचे तेंच जालें.
कृष्णान संद मेळना फुडें चाणूराचे तकलेर आपल्या हाताची एकूच मूठ मारली, तसो चाणूर घुंवळ्ळो आनी सकयल पडलो. तसो कृष्णान ताची मान आंवळून ताका मारून उडयलो. ताणें मागीर चाणूराची कूड कुशीक ओडून व्हरून उडयली. चाणूर मेलो तें पळोवन लोकांनी उडयो मारल्यो आनी व्हडल्यान ‘कृष्ण कृष्ण’ म्हणीत आड्डूक लागले. आतां उरिल्लो कंसाचो दुसरो मल्ल मुश्टीर. बलराम आनी ताची कुस्ती अजून सोंपूक नाशिल्ली. लोकांनी आतां बलराम बलराम आश्यो आड्ड्यो मारपाक सुरवात केली.
चाणूराक कृष्णान मारून उडयलो तें पळयतकच कंसाक कांपरे भरलें. आतां मुश्टीराचे कितें जातले काय हाचो विचार कंस करपाक लागलो. कंसा सयत सगळे लोक आतां बलराम आनी मुश्टीर हांची कुस्ती पळोवपान गुंग जाले. तितले म्हणसर कृष्ण केन्ना उडी मारून कंसाच्या शिंवासना कडेन पावलो हें कोणाच्या लक्षांत लेगीत येवंक ना. त्याच खिणाक बलरामान मुश्टीराक सकयल उडोवन ताचो जीव काडिल्लो. मुश्टीर सोंपलो हें पळयतकच लोक आतां कृष्ण खंय आसा काय तें पळोवपाक लागले. पळयता तर कितें! कृष्ण कंसा मुखार उबो राविल्लो. कृष्णाक पळोवन कंस भियेवन शिंवासना वयलो उठलो. ताणें कुशीक आशिल्ली आपली तरसाद हातांत घेतली. कृष्णा कडेन कसलेच शस्त्र नाशिल्लें. कृष्णाक मारपाक कंसान आपल्या हातांतली तरसाद वयर उखल्ली. तरसादीचो धपको ताचेर बसचे पयलींच कृष्ण फट्ट करून कुशीक सरलो. ताणें त्याच वेळार कंसाच्या तरसाद धरिल्ल्या हातार आपल्या हाताचो नेटान धपको दिलो. कंस कळवळ्ळो. ताच्या हातांतली तरसाद सकयल पडली. तो लटपटलो. ताचे तकले वयलो मुकूट सकयल पडलो.
कृष्णान मागीर वेळ व्हगडावंक ना. ताणें कंसाच्या केश्ट्यांक धरून ताका फरफटीत ओडीत आखाड्यांत व्हेलो. कृष्णाचो तो तेन्नाचो अवतार पळोवन कंसाच्या शिपायांक फुडें येवपाचे धाडस जालें ना. सगळे लोक आपले सुवाले वयल्यान कृष्ण कंसाक कसो ओडीत व्हरता तें पळयतूच रावले. कोणाकूच त्या वेळार कितें करचे ते सुचले ना. इतले म्हणसर कृष्ण कंसाच्या पोटार बसलो आनी ताणें आपल्या हाताचो धपको कंसाचे मानेर मारून ताचो जीव काडलो. कंस मरना फुडें वृंदावनांतल्यान आयिल्ल्या कृष्णाच्या वांगड्यांनी ‘कृष्ण, कृष्ण अशो आड्ड्यो मारपाक सुरवात केली.
कंसाक कृष्णान मारलो ह्या रागान ताचे हेर मल्ल एकठांय जावन कृष्णाक मारपाक फुडें येताले. तेन्नाच वृंदावनांतले यादव तरणाटे तांचे दांडे घेवन कृष्णाची राखण करपाक फुडें आयले. थंय आशिल्ल्या कंसाच्या घरच्यांनी कृष्णा आड रागान उलोवपाक सुरवात केली. पूण अक्रूरान तांकां कृष्ण कोण तें सांगलें आनी ओगी केले. मथुरेंतल्या लोकांक हरशी म्हणून कंस साप्प आवडनासलो. ते खातीर कृष्णान ताका मारून उडयलो हाचे तांकां व्हडलेशे कांय दिसलें ना. वयल्यान कंस मरतकच तेय बी कृष्ण, कृष्ण म्हणून जयघोश करपाक लागले. अशे तेरेन वसुदेवाच्या घरभरोवणी वगतार एका साधवान केल्ले भविश्य खरें जालें. वसुदेव- देवकीच्या पुतान कंसाक मारुन उडयल्लो. भाच्यान आपल्या मामाक मारिल्लो.
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
