भांगरभूंय | प्रतिनिधी
कार्मीक खात्याचे सगल्या खात्यांक निर्देश
भांगरभूंय । प्रतिनिधी
पणजीः नोकर भरती खातीर कंम्प्युटराचें गिन्यान गरजेचें आसल्यार उमेदवारांनी इन्फोटॅक म्हामंडळ, केंद्र सरकारची मान्यता आशिल्ले संस्थेंतल्या स महिन्यांच्यो कंम्प्युटर डिप्लोमा घेवप सक्तीचें आसा.
ज्या उमेदवारांनी कंम्प्युटर विशयांत डिग्री वा डिप्लोमा घेतल्या तांकां हातूंत सूट दिल्या. 1 नोव्हेंबर 2025 सावन हो नेम चालीक लागतलो, अशें कार्मीक खात्यान सांगलां.
कार्मीक खात्यान सगल्या खात्यांक काडिल्ल्या परिपत्रकांत म्हणलां, ज्या खात्यांनी आपले नोकर भरती पदा खातीर कंप्युटराचें गिन्यान सक्तीचें केलां तीं खातीं थेट नोकर भरती वेळार कंप्युटराचें गिन्यान निश्चीत करपा खातीर वेगवेगळी प्रक्रिया चालीक लायतात. कंम्प्युटर गिन्यान निश्चीत करपाची प्रक्रिया सुटसुटीत करपा खातीर कांय सुचोवण्यो खात्यान केल्यात. कंप्युटराचें गिन्यान गरजेचें आशिल्ल्या खात्यांनी उण्यांत उण्या स म्हयन्यांचो कंम्प्युटर डिप्लोमा दिवप गरजेचो आसा. उमेदवारा कडेन इन्फोटॅक म्हामंडळ, केंद्र सरकारची मान्यताय आसिल्ल्यो संस्था आनी कुशळटाय उदरगत आनी उद्देजकता संचालनालया खाला येवपी मानव संसाधन विकास फावंडेशनाची मान्यताय आशिल्ल्या संस्थेंतल्यान कंम्प्युटर डिप्लोमा गरजेचो आसा. पूण ज्या उमेदवारां कडेन मान्यताय प्राप्त विद्यापीठ वा तंत्रीक शिक्षण मंडळा कडल्यान कंम्प्युटर सायन्स, कंम्प्युटर एप्लिकेशन्स, म्हायती तंत्रज्ञान, इलेक्ट्रॉनिक्स आनी टॅलेकम्युनिकेशन विशयांत पदवी वा डिप्लोमा आसा तशेंच मान्यताय प्राप्त आयटीआय कडल्यान कंम्प्युटर ऑपरेटर वा प्रॉग्रामींग सहाय्यक विशयांत वेवसाय वा अभ्यासक्रम प्रमाणपत्र आसा तांकां हे अटींतल्यान सूट दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
