भांगरभूंय | प्रतिनिधी
पणजी : सरकारान विवीध खात्यांक तांचे कडेन कार्यरत आशिल्ल्या सद्याच्या कंत्राटी कर्मचार्यांक मुजतवाड दिवपाची परवानगी दिल्या. खात्यांक तांचे कडेन ३१ ऑक्टोबर २०२५ मेरेन कंत्राटाचेर आशिल्ल्या वा आवट सोर्स केल्ल्या एमटीएस कर्मचार्यांक खात्याचे गरजे प्रमाण वा चडांत चड ३१ ऑक्टोबर २०२६ मेरेन मुजतवाड दिवपाक मेळटली. हे खातीर संबंदीत प्रशासकीय विभागाच्या मंत्र्यांच्या मान्यता आसप गरजेचें आसा. कार्मीक खात्यान हालींच हे विशीं आदेश जारी केला.
आदेशा प्रमाण, मुदतवाड दिवचे पयलीं खातें मुखेल्यांक अशा कंत्राटी नियुक्तीची गरज तपासप गरजेचें. कंत्राटी नियुक्त्यांक मुजतवाड दिवचे पयलीं खातें मुखेल्यांनी मंजूर सुवातेवेली रिती सुवात नेमान भरपा खातीर गोंय कर्मचारी निवड आयोग, गोंय लोकसेवा आयोगाकडेन धाडटले, हाची खात्री करप गरजेचें. तशेंच आउटसोर्स केल्ले ऑफिस बॉय, मेसेंजर आनी ड्रायव्हर, एलडीसी, डेटा एंट्री ऑपरेटर, स्टेनो टायपिस्ट, सचीव हेरांकूय मुजतवाड दितले.
सध्याच्या कंत्राटी वा आवटसोर्स एमटीएस कर्मचार्यांच्या ३१ ऑक्टोबर २०२६ उपरांतचे मुजतवाडी विशींचे प्रस्ताव मुल्यांकना खातीर प्रशासकीय सुधारणा विभागाकडेन धाडटले. उपरांत, ते मंजुरी खातीर कार्मीक आनी वित्त विभागाकडेन धाडटले अशें आदेशांत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
