भांगरभूंय | प्रतिनिधी
भलायकी मंत्रीः हडफडें- नागवा उपभलायकी केंद्राचें उक्तावण
म्हापशें: सध्या जीण आनी भलायकेक म्हत्व आसा. अॅम्ब्युलन्स आसूं वा दोतोर, तांचो उणाव भरून काडटले. कंत्राटी पद्दतीचेर नवे 80 दोतोर घेवपाच्या हालचाली चल्ल्यात. ही प्रक्रिया पुराय जाताच गरज आशिल्ल्या सुवातांचेर दोतोरांची नेमणूक करतले, अशें भलायकी मंत्री विश्वजीत राणे हांणी सांगलें.
मंगळारा 20 ऑगस्टाक आयुष्यमान भलायकी मंदीर येवजणे खाला हडफडें- नागवा उपभलायकी केंद्राचें उक्तावण केले उपरांत मंत्री राणे उलयताले. हें उपभलायकी केंद्र वेवसायीक समासजीक बांदीलकी (सीएसआर) येवजणे खाला बांदलां. ह्या वेळार आमदार मायकल लोबो, सरपंच रोशन रेडकार, उपसरपंच सुषमा नागवेंकार, भलायकी खात्याची संचालका रुपा नायक, पर्रा सरपंच चंदानंद हरमलकार, भलायकी केंद्र अधिकारी डॉ. रोशन नाझारेथ, हेर पंच तशेंच कोमुनिदादीचे पदाधिकारी हाजीर आशिल्ले. पर्राचे उपसरपंच डॅनियल लोबो हांणी विश्वजी राणे हांचें चित्र आशिल्ली फोटोफ्रेम मंत्री राणे हांकां भेट म्हूण ह्या वेळार दिली.
कांदोळी मुळाव्या भलायकी केंद्राक सामुदायीक भलायकी केंद्राचो दर्जो मेळोवन दितले. तशेंच हडफडें- नागवा उपभलायकी केंद्रांत पूर्णवेळ दोतोर उपलब्ध करून दितले. लोकांच्या दारा मेरेन भलायकी सेवा दिवचे खातीर आमचें सरकार बांदील आसा. गोंयांतली भलायकी सेवा आनीक सहज करचे खातीर आपले यत्न चल्ल्यात. सगळीं हॉस्पिटलां आनी भलायकी केंद्रां विशीं वैजकी ऑडीटाची बसका बेगिनूच जातली, अशें मंत्री राणे हांणी सांगलें.
सरपंच रोशन रेडकार हांणी सांगलें, थळावे आमदार आनी भलायकी खात्याच्या आदारान सीएसआर खाला हडफडें- नागवा उपभलायकी केंद्राचो सुसज्जपणा दिलां. ते खातीर 39 लाख रुपया खर्च जाल्यात. ह्या उपभलायकी केंद्रांत भलायकी खात्यान ईसीजी मशीन तशेंच अॅलोपॅथी दोतोराची वेवस्था करची. हें उपकेंद्र बांदचे खातीर आपल्या सांगाती पंचायत मंडळान आपलो दोन म्हयन्यांचो पगार दिला, अशें रेडकार हांणी सांगलें.
तंदुरुस्ती खातीर खाणाची संवय बदलचीः लोबो
सध्या काळजाचें दुयेंस, कांक्र ह्या सारकिल्ल्या दुयेंसांचें प्रमाण खूब वाडलां. लोकांनी घरांत रांदिल्लें अन्न जेवचें, आपली खाणाची संवय बदलची. भायलें फास्टफूड वा ऑनलायनी वयल्यान मागयतात तें तेलकट आनी मसाल्याचें भलायकेक घातक अशें अन्न खावप टाळचें. ते वरवीं दुयेंसा पासून पयस रावपाक शकतात, अशें आमदार मायकल लोबो हांणी सांगलें.
मायकल लोबो स्पश्ट उलोवपी व्यक्तीमत्वः राणे
आमदार मायकल लोबो हे स्पश्ट उलोवपी व्यक्तीमत्व आसा. तांणी मंत्रीपदा वेळार बरें काम केलां. तांचो उणाव आमकां जाणवता. ताचे भशेन आपुणूय देवभक्त. तांकां आपल्यो सदांच शुभेत्सा आसतात. तांच्या मनांत कितें आसा, तें पुराय जावंदी, अशें आपणे देवाक सांगलां, अशी प्रतिक्रिया मंत्री विश्वजीत राणे हांणी मंत्रीमंडळ फेरबदलाचेर उलयतना पत्रकारांक दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
