भांगरभूंय | प्रतिनिधी
मुख्यमंत्री डॉ. प्रमोद सावंत हांची म्हायती
कला अकादमी संबंदांतलो अहवाल सादर
जाल्यार फुकट कामां करून दिवचीं पडटलीं
भांगरभूंय । प्रतिनिधी
पणजी : कला अकादमीच्या नाटकघरा संबंदांत कृतीदळ आनी सल्लागारांनी सादर केल्ले अहवाल आपल्याक मेळ्ळ्यात. तांचे शिफारशी प्रमाण गरजेचे ते बदल करतले. सल्लागारांनी आतां ज्यो शिफारशी केल्यात, त्यो आदल्या कंत्राटांतल्यो आसत जाल्यार तीं कामां फुकट करून घेवन संबंदीत कंत्राटदाराक काळे वळेरेंत घालतले, अशी म्हायती मुख्यमंत्री डॉ. प्रमोद सावंत हांणी शुक्रारा पत्रकारां कडेन उलयतना दिली.
कृतीदळाचे शिफारशी प्रमाण भौशीक बांदकाम खात्यान (पीडब्ल्यूडी) नेमिल्ले रॉजर ड्रेगो (आवाज यंत्रणा), शितल तळपदे (उजवाड यंत्रणा) आनी राजन भिसे (रंगमाची) ह्या तीन सल्लागारांनी कांय दिसां आदीं नाटकघरांतल्या साबार उणावांचो अहवाल मुख्यमंत्री डॉ. प्रमोद सावंत हांकां सादर केलो.
कला अकादमींत नाटकां सयत ‘इफ्फी’ काळांत चित्रपट लेगीत दाखयतात. ताचो विचार करून संबंदीत सल्लागान नाटक आनी चित्रपट ह्यो दोनूय गजाली दोळ्यां मुखार दवरून नाटकघराची रचना केल्या, पूण हें नाटकघर चित्रपट दाखोवपाचे नदरेन दर्जेगार आसा. नाटकां खातीर मात आवाज आनी उजवाज यंत्रणा योग्य ना. ते खातीर तातूंत बदल करचे. तशेंच नाटकघरांत आशिल्ले एसीचो आवाज नाटक चालू आसतना मायकांत वता आनी ताचें लुकसाण अभिनय करपी कलाकारांक जाता. ते कातीर नाटकघरांतले एसी काडून थंय वेगळे तरेची वेवस्था करची, अश्यो शिफारशी तिनूय सल्लागांनी अहवालांतल्यान केल्ल्यो. ताची दखल घेवन, मुख्यमंत्री डॉ. सावंत हांणी तत्काळ कृतीदळ आनी पीडब्ल्यूडीच्या अधिकाऱ्यांची बसका सल्लागारांचे शिफारशी प्रमाण कामां करून घेवपाचें तशेंच आदल्या कंत्राटदाराक ख्यास्त म्हूण सल्लागारांचे शिफारशींतलीं जी कामां पोरण्या कंत्राटांत आशिल्लीं, तीं ताच्या कडल्यान फुकट करून घेवपाचे निर्देश दिल्ले.
ऑक्टोबर मेरेन सगळीं कामां करून घेतलेः मुख्यमंत्री
कृतीदळ आनी सल्लागारांचे शिफारशीं प्रमाण नाटकघरांतलीं गरजेचीं सगळीं कामां पुराय करपाचे निर्देश आपणे दिल्यात. शिफारशींतलीं जीं कामां आदल्या कंत्राटांत आसलीं, तांच्यो स्वतंत्र निविदा काडून ती फुकट करून दिवपाचे आदेश संबंदीत कंत्राटदाराक दिल्यात. पोरण्या कंत्राटांत नाशिल्लीं कामां सरकार करतलें. कंत्राटदारा कडल्यान ऑक्टोबर मेरेन सगळीं कामां फुकट करून घेतले आनी ते उपरांत ताचें निलंबन करून ताका काळे वळेरेंत घालतले. पोरण्या कंत्राटदाराक फुडल्या चार वर्सां खातीर दिल्लीं कामां फाटीं घेतल्यात, ताका उरिल्ले पयशे लेगीत दिवचे नात, अशें मुख्यमंत्री डॉ. प्रमोद सावंत हांणी सांगलें.
जापसालदार अधिकाऱ्यांचेरूय कारवाय जाय: विजय सरदेसाय
कला अकादमीच्या कामांत भ्रश्टाचार जाल्ल्याचो आपलो दावो मुख्यमंत्री डॉ. प्रमोद सावंत हांणी मान्य केला. हीं कामां निविदा जारी करिनासतनाच मंत्री तशेंच कला अकादमीचे अध्यक्ष गोविंद गावडे हांणी विधानसभेंत जाहीर केलें. ताका लागून निविदा जारी करिनासतना पोरण्या कंत्राटदाराक नाटकघराचें काम ज्या अधिकाऱ्यांनी दिलें, तांचेर कसली कारवाय जातली, हें मुख्यमंत्र्यान स्पस्ट करपाक जाय, अशें आमदार विजय सरदेसाय हांणी हे विशीं उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
